1 SAMWELI 4
4
Ogosakorwa gw’Esanduku ere ne chibao chirikire Okobwatana kw’Omonene
1Abaisraeli bakagenda korwania Abafilisti. Barabwo bagatoora agwo Ebeni‐Eseri, na Abafilisti agwo Afeki. 2Abafilisti bakeroberia korwania Abaisraeli. Esegi egatindia, na Abafilisti bakabua Abaisraeli, bagaita abanto chilifu inye. 3Ekero abarwani abatigarete bairanete gocha ase egetwori, abagaaka b’Abaisraeli bagateba, “Nase ki Omonene atotiga twabugwa n’Abafilisti ase rituko ria rero? Togende torente korwa Silo Esanduku eria ere ne chibao chirikire okobwatana kw’Omonene, erinde eche ebe egati yaito na gototooria korwa ase amaboko ’ababisa baito.” 4Erio abanto bagatomwa Silo, bakarenta Esanduku eria y’Omonene bw’Emeganda, oyio omenyete nobonene bwaye igoro y’abakerubi; na Hofini na Finehasi, abamura babere ba Eli, bagacha amo n’Esanduku eria.
5Ekero Esanduku eria y’Okobwatana kw’Omonene yaigete ase egetwori, Abaisraeli bonsi bagaaka amariogi amanene goika ense ekoga. 6Abafilisti bagachia koigwa amariogi aria agoakwa bakaborania, “Ninki engencho y’ogoakwa kw’amariogi ayio amanene ase egetwori ki’Abaibirania?” Ekero banyorete amang’ana ng’a n’Esanduku y’Omonene yarentirwe ase egetwori, 7bakaondoka mono, bagakwana, “Enyasae yachire ase egetwori keria.” Naende bagateba, “Obobe nobwaito! Egento kenga buna ekio tikiana gokorekana asetore nonya ng’ake. 8Obobe nobwaito! Ning’o oratotoorie korwa ase amaboko e chinyasae echio chire nokobua gotoetania? 9Chinyasae echio nachio chiagete Abamisiri namaakwa amange aaria ase erooro. Korende inwe Abafilisti, motenene bokong’u buna abasacha, ede timoa abasomba b’Abaibirania baria, buna barabwo barenge abasomba baino. Ee, motenene buna abasacha, morwane!”
10Ase igo Abafilisti bakarwana bokong’u, na Abaisraeli bakabugwa, bagatama kera oyomo gochia ase enka yaye. Okobugwa okwo nigo kwarenge okonene mono. Abarwani b’Abaisraeli chilifu emerongo etato bagaitwa bagakwa. 11Esanduku ya Nyasae ekairwa, na Hofini na Finehasi, abamura babere ba Eli, bagaitwa.
Ogokwa kwa Eli
12Omonto oyomo bw’egesaku kia Benjamin agatama korwa ase esegi, akaminyoka gochia Silo, agaikao rituko erio erio, ore ne chianga chiatandoire, na obegete ebuse ase omotwe oye. 13Ekero omonto oria aigeteo, Eli nigo arenge oikaransete ase ekerogo kiaye agwo enchera ensemo otengerete, ekiagera nigo arenge nobwoba ase engencho y’Esanduku eria ya Nyasae. Na ekero omonto oria arentete amang’ana ayio akorekire, abanto bonsi b’omochie bakarera mono. 14Erio Eli akaigwa okorera kw’abanto, akaboria, “Eriogi eri ri’okorera okonene neria ki?” Erio omonto oria akaayerera gochia ase Eli komotebia amang’ana ayio. 15(Eli konya okoorire emiaka emerongo kianda, na etano na etato; amaiso aye konya aukoire; ase ayio tarenge konyara korora.) 16Omonto oria agatebia Eli, “Ninche narua ase esegi, natama korwao ase rituko ria rero.”
Erio Eli akamoboria, “Omwana one, naki esegi yagenderera?”
17Erio oria orentete amang’ana akamoiraneria, “Abaisraeli batamire korwa ase Abafilisti, abanto abange baitirwe; Hofini na Finehasi, abana bao babere, bakure; boigo Esanduku ya Nyasae yairirwe.”
18Ekero omonto oria atorete Esanduku eria ya Nyasae, Eli akagwa gochia magega korwa ase ekerogo, agwo ase egeita ensemo, akabuneka ebigoti agakwa, ekiagera konya ogotire mono, naende nigo arenge omorito. Ere konya ogambeire Abaisraeli ase engaki y’emiaka emerongo ene.
Ogokwa kwa moga Finehasi
19Bono moga Finehasi, omomura o Eli, nigo arenge morito; engaki yaye y’okogonkia konya yabereire ang’e. Ekero aigwete amang’ana ng’a ise biara amo nomosacha oye bakure, obororo bw’okobina bokamochera, agatung’ama inse, akagonkia. 20Ekero arenge ang’e nogokwa, abakungu abarenge komokonya ase okomoiboria bakamotebia, “Toiroka, ekiagera kwaiboire omwana omomura.” Korende omokungu oria tabairaneria gento, gose tategerera amang’ana abo. 21Akaroka omwana oria I‐Kabodi,#4:21 I‐Kabodi, engencho yaye: obonene tiboiyo ogoteba, “Obonene bwarure ase Abaisraeli.” Nigo akwanete igo, ekiagera Esanduku eria ya Nyasae konya yairirwe, boigo ekiagera ise biara konya okure, na omosacha oye konya oitirwe. 22Agateba, “Obonene bwarure ase Abaisraeli,” ekiagera Esanduku eria ya Nyasae konya yairirwe.
Currently Selected:
1 SAMWELI 4: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
