1 SAMWELI 1
1
Elikana na abanto b’enka yaye agwo Silo
1Narenge omonto ore korokwa Elikana korwa ase egesaku gi’Efraimu, omenyete Ramataimu‐Sofimu, ase ense y’ebitunwa y’Efraimu. Ere nigo arenge mosinto o Yerohamu bw’Elihu, o Tohu, o Sufu, Omoefraimu. 2Elikana nabwate abakungu babere, Hana na Penina. Penina nabwate abana, korende Hana tabwate bana. 3Kera omwaka omonto oyio nigo arenge gotiira korwa ase omochie oye, ogenda gosasima na korua ebing’wanso ase Omonene bw’Emeganda agwo Silo. Aroro agwo Ofini na Finehasi, abamura babere ba Eli, nigo barenge abakuani b’Omonene. 4Kera engaki Elikana arenge korua ekeng’wanso, nigo arenge koa Penina amo nabana baye, abamura na abaiseke, kera oyomo egetari kiaye. 5Korende ase Hana nigo arenge komoa ebitari bibere, ekiagera nigo amwanchete nonya Omonene omotangete koibora abana. 6Penina, moibori omwabo, nigo anarete goichania Hana ase okomochaya, ekiagera Omonene konya omotangire koibora. 7Nabo agendererete gokora omwaka ase omwaka. Ekero barenge kogenda gosasima ase enyomba y’Omonene, Penina akaba ogoichania Hana, na Hana nigo arenge kona‐korera goika takoria gento. 8Erio Elikana akamoboria, “Nase ki okona‐korera? Naki otari koria endagera? Naende oichanete iga? Inee! Inche tindi buya asore goetania abana abamura ikomi?”
Hana na Eli
9-10Rituko erimo nyuma kobakoorire koragera na konywa aaria Silo, Hana akaimoka, na ase emechando yaye akarera mono ore nobororo, agasaba Omonene. Eli nao aikaransete ase ekerogo kiaye ang’e nomotobwa bw’egesieri gie Hekalu y’Omonene. 11Hana akaria eira, agakwana, “Aye Omonene bw’Emeganda, ondigererie inche omosomba oo ase emechando yane! Tonyeba! Korang’e omwana omomura, nigo ndamorue abe oyoo, aye Omonene; ase amatuko onsi ay’obogima bwaye takogingirwa etukia yaye.”
12Buna omokungu oyio agendererete gosaba Omonene, Eli akaba origereretie omonwa oye. 13Hana nigo arenge gosabera enkoro yaye ime bokiriru; akaba okomonya‐monyia ebikoba biaye rioka, korende riogi tiriare koigweka. Ase ayio Eli agakaga ng’a nigo atindire, 14akamotebia, “Ngoika ririri oragenderere gotinda? Tiga ogotinda kwao, otindoke!”
15Hana akamoiraneria, “Taibo, omonene one, inche nomokungu inde nobororo ase enkoro yane. Tinyweti edivai gose ekenyugwa kende kegotindia. Nigo nabeire ngosaba na kobeka emechando yane yonsi ase Omonene. 16Tokaga ng’a inche, omosomba oo, nomokungu otagwenereti, naki ase engaki eye yonsi nabeire ngokwana ase engencho y’emechando yane na ogoichana kwane.”
17Erio Eli akamoiraneria, akamotebia, “Genda nomorembe, na Nyasae bw’Abaisraeli nakoe aya kwamosabire.”
18Hana akabora, “Tiga inche, omosomba oo, inyore ogwancherwa ase obosio bwao.” Erio omokungu oria akarua aase agwo, akagenda koragera, gose taba oichanete naende.
Okoiborwa gwa Samweli na ogwatananwa kwaye ase Omonene
19Rituko ria kabere Elikana na abanto baye bakaimoka mambia chuni, bagasasima ase obosio bw’Omonene. Erio bakairana gochia nka sobo agwo Rama. Elikana akaba na Hana mokaye, na Omonene akaba omoinyorete. 20Hana akaba morito, na ekero engaki yaigete akaibora omwana omoisia, akamoroka Samweli, agateba, “Nekiagera namosabete korwa ase Omonene.”
21Elikana amo nabanto b’enka yaye bakagenda naende koruera Omonene ekeng’wanso gia kera omwaka na goikerania eira bariete. 22Korende ase engaki eyio Hana tagendeteo, agatebia omosacha oye, “Ninganye goika ntache omwana, erio nario ndamoire imoorokie ase obosio bw’Omonene, erinde imotige amenye aroro botambe.”
23Elikana, omosacha oye, akamotebia, “Kora aya orarore are buya; ganya goika otache omwana. Tiga Omonene aikeranie ring’ana riaye.” Erio omokungu oria agatigara nka korera omwana goika akamotacha.
24Ekero omwana oria atachirwe, Hana akamoira ase enyomba y’Omonene agwo Silo, akaira na eeri yakoorire emiaka etato, na obosie ebimunu emerongo ebere, na ekerandi kiaroisirie korwa ase risankwa kere nedivai. Omwana oria omomura nigo arenge omoke. 25Erio bakanyenya eeri eria, na bakaa Eli omwana oria. 26Hana agatebia Eli, “Omonene one, inyigwa. Amaene, buna ogendererete koba moyo, inche nomokungu oria natenenete aiga ase obosio bwao, narenge gosaba Omonene. 27Nigo nasabete ng’a ng’egwe omwana oyo omomura, na Omonene akaigwa ogosaba kwane. 28Ase ayio namorentire ase Omonene. Ase obogima bwaye bwonsi abe oyoye.”
Erio bagasasima Omonene aroro agwo.
Currently Selected:
1 SAMWELI 1: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
