1 SAMWELI 12
12
Samweli ogotigana n’Abaisraeli
1Samweli agatebia Abaisraeli bonsi, “Rora, nabeire nkoigwa amang’ana aino; nakorire aya mwamboria, nabekire omoruoti orabagambere. 2Bono omoruoti oino oyio orabaraae. Inche bono nagotire, namerire chimbuche; abamura baane nigo bare amo nainwe. Inche nabeire nkobaraa korwa obosae bwane goika rero iga. 3Bono inche nao inde aa. Inwe mobe kirori asende ase obosio bw’Omonene na obw’omoakwa amaguta oye. Inee! Neng’ombe ya ng’o nairete? Gose netigere ya ng’o nairete? Ning’o naureretie, gose nakorerete bobe? Gose nkorwa ase okoboko kwa ng’o naetwe riaaki rikang’ukoria amaiso aane? Onye nakorete ayio, nimbairanerie ebio nairete.”
4Abanto bakairaneria, “Aye tigwatoriananetie kende, gose tigwatokorerete bobe, gose tikwairete gento ki’omonto onde bwensi.”
5Samweli akabatebia, “Rituko ria rero Omonene nigo are kirori asemore, boigo omoakwa amaguta oye nigo are kirori ng’a inwe timonyoreti gento kende gionsi ase okoboko kwane.”
Barabwo bakairaneria, “Ee, Omonene nere kirori.”
6Samweli agatebia abanto, “Omonene, oria ochorete Musa na Haroni, naende akarenta chisokoro chiaino korwa ase ense ya Misiri, nere kirori. 7Gaki bono tenena, mokire‐kiri, erinde mbasoere ase obosio bw’Omonene ase okobainyoria ogokora gwonsi okoronge, okwo Omonene abakorerete inwe ne chisokoro chiaino. 8Ekero Yakobo asoete Misiri, na Abamisiri bakabachanda, chisokoro chiaino chikarera ase Omonene ng’a achikonye, na Omonene agatoma Musa na Haroni. Barabwo bakabang’anyia korwa Misiri, bakabarenta bamenye ase ense eye. 9Korende barabwo bakeba Omonene, Nyasae obo. Ase igo ere akababeka ase amaboko a Sisera, omotang’ani bw’abarwani b’omochie o Hazori na ay’Abafilisti, na ay’omoruoti bw’Abamoabu, nabarabwo bakabarwania. 10Ase igo bakarera ase Omonene, bakabora; Twakorire ebibe, ekiagera twatigire Omonene; twakoreire chinyasae chiria chikorokwa Baali na Asitaroti. Bono totoorie korwa ase amaboko ’ababisa baito, naintwe ntogokorere aye. 11Erio Omonene agatoma Yeruba‐Baali,#12:11 Yeruba‐Baali nere Gidioni na Baraki, na Yefita, na inche Samweli, akabatooria korwa ase amaboko ’ababisa baino babaetanaine, nainwe mokaba mokomenya ase obotoereru. 12Korende ekero mwaroche Nahasi, omoruoti bw’Abaamoni, ogocha kobarwania mogantebia: Ntorigetie omoruoti oratogambere, nonya Omonene orenge omoruoti oino.
13“Gaki bono morigererie omoruoti oino mwachorire, oyo mwaboria moegwe. Rora, Omonene obekire omoruoti abagambere. 14Komoramoiroke Omonene na komokorera, na koigwa eriogi riaye, na timwanga koigwera amachiko aye, naende onye inwe amo nomoruoti oyo okobagambera mokomotunyana Omonene, Nyasae oino, rirorio nebe buya. 15Motaigwereti eriogi ri’Omonene, korende mokwanga koigwera amachiko aya, rirorio okoboko kwaye nigo korabe mamincha yaino buna kwarenge mamincha ye chisokoro chiaino. 16Bono tenena, mokire‐kiri, morore ring’ana eri rinene Omonene arakore ase amaiso aino. 17Inee! Bono tari engaki ye rigesa ri’engano? Nonya nabo nimosabe Omonene arente enkoba na embura, erinde momanye ng’a mwakorire obobe obonene ase okoboria ng’a moegwe omoruoti.”
18Ase igo Samweli agasaba Omonene, nere agatoma enkoba na embura ase rituko riria. Abanto bonsi bakoboa Omonene, bakoboa na Samweli. 19Bagatebia Samweli, “Tosabere intwe, abasomba bao, ase Omonene, Nyasae oo, erinde titokwa. Twarorire ng’a amo nebibe biaito bionsi twamentire ebibe binde ebiaao bi’okoboria ng’a toegwe omoruoti.”
20Samweli akabairaneria, “Timwoboa! Amaene, mwakorire amabe aya onsi, korende nonya nabo, timobaisa koonchoka gochia ensemo na gotiga koigwera Omonene, korende momokorere ne chinkoro chiaino chionsi. 21Timoonchokera chinyasae chire bosa chitanyare kobakonya gose kobatooria, ekiagera nigo chire bosa. 22Ase engencho y’erieta riaye Omonene takobaanga inwe abanto baye, ekiagera nigo anchete kobakora mobe abaye. 23Amang’ana ayio abe aare nainche ng’a ninkore ebibe ase Omonene ase ogotiga kobasabera inwe. Ribaga ri’ayio nimborokie enchera ere engiya na endonge. 24Moiroke Omonene bweka, momokorere ase obwegenwa bwe chinkoro chiaino chionsi, mobe mokoinyora aya onsi amanene abakoreire. 25Korende onye mokogenderera gokora ebibe, rirorio nigo morasirigwe amo nomoruoti oino.”
Currently Selected:
1 SAMWELI 12: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
