1 SAMWELI 13
13
Abaisraeli bakorwania Abafilisti
1Saulo konya ogambire omwaka oyomo, na omwaka o kabere ekero agendererete kogambera Abaisraeli, 2agachora abanto chilifu isato. Ase abwo abanto chilifu ibere bakaba amo nere agwo Mikimasi na ase ense y’ebitunwa ya Beteli, na abanto elifu eyemo bakaba amo na Yonathani aaria Gibea, ase orogongo rwa Benjamin. Abatigarete akabaa ribaga bakagenda kera omonto nka bwoye.
3Yonathani agaita omotang’ani bw’abarwani b’Abafilisti agwo Gibea, na Abafilisti bakaigwa amang’ana ayio. Saulo akabugia egetureri ase ense eria yonsi, agateba, “Tiga Abaibirania baigwe.” 4Ase igo Abaisraeli bonsi bakaigwa amang’ana agokwanwa ng’a Saulo oitire omotang’ani bw’abarwani b’Abafilisti, naende ng’a Abaisraeli babeire okogechia ase Abafilisti. Abanto bakarangerigwa babwatane na Saulo bagende Giligali.
5Erio Abafilisti bagasangererekana amo barwanie Abaisraeli. Nigo barenge ne chigari chilifu emerongo etato (30,000), na abariini chibarasi chilifu isano nemo (6,000), na abarwani bande abange buna omokenye ore engegu y’enyancha. Barabwo bagacha, bagatoora agwo Mikimasi, moocha ya Beti‐Aveni. 6Abaisraeli bagachia korora ng’a bamigirwe nobokong’u, bagatang’ang’a na kwebisa ase amabwago, na ase chinsana na ebitare ime, nonya nase chingoro na ase amakuruma. 7Abaibirania bande bakaamboka Yorodan, bakagenda ase ense ya Gadi na Gileadi. Korende Saulo ere nao atigarete agwo Giligali, na abanto bonsi abamotunyanete baare koiguswa ase obwoba. 8Saulo akaganya Samweli amatuko atano na abere, buna Samweli konya amotebirie, na ekiagera Samweli atebanete abanto bagachaka goserebekana na gotiga Saulo. 9Ase igo Saulo agateba, “Ndetere aa ekeng’wanso ki’ogosambwa na eki’omorembe.” Erio akarua ekeng’wanso keria ki’ogosambwa. 10Erio agwo ekero akoorire korua ekeng’wanso keria, Samweli agacha. Saulo akagenda komorotota na komokwania. 11Samweli akamoboria, “Inki eke gwakorire?”
Saulo akamoiraneria, “Nigo narora ng’a abanto ngotama bare korwa asende, naende naye gwatebana, tocheti ase engaki eria gwatebete ng’a nochiche. Boigo Abafilisti konya basangererekanire agwo Mikimasi. 12Erio nkarengereria: Bono Abafilisti mbabaise gocha asende aa Giligali ritang’ani ntaraboria ogwancherwa korwa ase Omonene. Ase igo ayio akambetereria korua ekeng’wanso ki’ogosambwa.”
13Samweli akamotebia, “Gwakorire egento ki’oboriri. Tikwabwatete ogochika okwo Omonene, Nyasae oo, akoete. Onye nkwaigwerete, Omonene anga nakora oboruoti bwao bobe obokong’u, bogenderere kobao botambe ase Abaisraeli. 14Korende bono oboruoti bwao tibokogenderera. Omonene bwerigeirie omonto onde omogokirie ase enkoro yaye, omochikire ng’a abe okogambera abanto baye, ekiagera aye toigwereti aya Omonene agochigete.”
15Erio Samweli akaimoka, akarua Giligali, akagenda Gibea ase orogongo rwa Benjamin. Na Saulo akabara abanto abatigarete amo nere, na barabwo nigo barenge koreng’ana amagana atano na rimo. 16Saulo, na Yonathani momura oye, amo nabanto barenge amo nabarabwo bakabeera agwo Geba o Benjamin, korende Abafilisti bagatoora agwo Mikimasi. 17Ebiombe bitato bi’abarwani bikarua ase egetwori ki’Abafilisti; ekeombe ekemo gekaonchoka gochia Ofura, ase ense ya Sauli, 18na egia kabere gekagenda Beti‐Horoni, na ekende gochia ase orobebe rorochie Rikura ria Seboimu na erooro.
19Ase engaki eria omoturi ebioma tarenge ase ense yonsi y’Abaisraeli, ekiagera Abafilisti nigo boboete ng’a Abaisraeli mbabaise gweturera emioro gose amatimo. 20Korende kera oyomo bw’Abaisraeli, oyo oganetie gotieria obokombe bwaye, gose ekoyo, gose egesire, gose omoyio oye, goika agende ase Abafilisti. 21Nigo barenge goakana ekeng’ese gi’esekeli ase ogotiererigwa obokombe na ekoyo, na ebing’ese bibere bi’esekeli, ase ogotiererigwa egesire, na kogechoma ase ogokerambora. 22Bono ase rituko ri’esegi onde tarenge ase abarwani ba Saulo na Yonathani, nonya noyomo, obwate omoro gose ritimo. Saulo bweka na Yonathani, momoura oye, nabwo barenge nabio.
23Ekeombe ki’abarwani b’Abafilisti kegatomwa korenda enchera egochia ase Mikimasi.
Currently Selected:
1 SAMWELI 13: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
