1 SAMWELI 11
11
Saulo okobua Abaamoni
1Nahasi Omoamoni akagenda, agaetanana Yabesi ase ense ya Gileadi koyorwania esegi. Abanto bonsi ba Yabesi bakamotebia, “Kora okobwatana naintwe, erio tobe inse asore togokorere.”
2Nahasi akabairaneria, “Ninkore okobwatana nainwe komoranche ng’a ndusie eriso ria borio ria kera oyomo oino, erinde ndetere Abaisraeli bonsi obosooku.”
3Abagaaka ba Yabesi bakamotebia, “Toe ribaga ri’amatuko atano na abere, erinde totome abanto ase chingongo chionsi chi’Abaisraeli. Onde atatogeti oratotoorie, rirorio twerue asore.”
4Abatomwa baria bagaika Gibea ase Saulo amenyete, bagatebia abanto b’aroro amang’ana ayio, na abanto bonsi bakarera mono. 5Ase ekero ekio Saulo nigo arenge ogocha korwa mogondo ogotema chiombe chiaye, akaboria, “Inki kiaba abanto aba bakorera iga?” Ase ayio bakamotebia amang’ana aria abanto ba Yabesi barentete. 6Ekero Saulo aigwete amang’ana ayio, Omoika o Nyasae ogacha igoro asare, okamobeka chinguru; erio Saulo akaba nendamwamu enene. 7Akabwata chiombe ibere, agachinachana ebing’ese, erio akaa abanto ebing’ese biria, nabarabwo bakabiira ase chingongo chionsi chi’Abaisraeli, bagateba amang’ana aye, “Omonto onde bwensi otambwateti inche Saulo amo na Samweli, chiombe chiaye nabo chiranachanwe iga.”
Erio omoondoko bw’Omonene okabwata abanto, nabarabwo bagacha amo buna omonto oyomo. 8Ekero Saulo abarete Abaisraeli agwo Bezeki, nigo barenge chilifu amagana atato (300,000), na Abayuda chilifu emerongo etato (30,000). 9Agatebia abanto baria batometwe, “Motebie abanto ba Yabesi o Gileadi: Ankio mobaso gati namonyore obosibore.” Abatomwa baria bakairana, bagatebia abanto ba Yabesi amang’ana ayio, na barabwo bakaba nomogoko omonene, 10bagatebia Abaamoni, “Ankio inatwerue asemore, motokorere ande onsi morarore arabe buya asemore.”
11Rituko ria kabere Saulo akaroberia abanto baye ase ebiombe bitato, na barabwo bagacha mambia kobogokiamoka, bagasoa ase egetwori ki’Abaamoni, bakabaita kogenderera goika mobaso gati. Abwo batigarete bagesiarera, gose onde tatigara ore nonde amo.
12Erio Abaisraeli bagatebia Samweli, “Mbarabi baria bakanete ng’a Saulo takobagambera. Renta abanto abwo, tobaite.”
13Korende Saulo agakana, agateba, “Monto onde tari oraitwe ase rituko ria rero, ekiagera Omonene orentire obobui ase Abaisraeli.” 14Samweli agatebia abanto, “Inchuo togende Giligali, erinde toirore oboruoti obo tobokore bobe oboyia.” 15Ase igo abanto bonsi bakagenda Giligali, na aroro agwo ase obosio bw’Omonene bakabeka Saulo akaba omoruoti. Boigo bakarua ebing’wanso bi’omorembe agwo ase obosio bw’Omonene, na Saulo amo n’Abaisraeli bonsi bakaba nomogoko omonene mono.
Currently Selected:
1 SAMWELI 11: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
