1 SAMWELI 10
10
1Erio Samueli akaimokia echuba y’amaguta, akaumorera Saulo ase omotwe, akamonyunyunta, akamotebia, “Omonene ogoakire amaguta obe omotang’ani bw’Abaisraeli, abanto baye. Aye nogambere abanto b’Omonene na kobatooria korwa ase amaboko ’ababisa babo babaetanaine. Eke nakio kerabe ekemanyererio asore ng’a Omonene ogoakire amaguta ng’a obe omotang’ani igoro ase abanto bare omwando oye: 2Ekero okorua aa asende rero noumerane nabanto babere ang’e nembeera ya Raeli, ase orogongo rwa Benjamin ase Selisa. Barabwo nigo baragotebie ng’a chitigere chiria mwagendete korigia chiatokire. Iso otigire gochichandekera, na bono naye achandekerete, ogoteba: Naki ndakore indore omwana one? 3Erio norueo, ogenderere orogendo, oike ase omote onga buna omotontera ore agwo Tabori. Aroro agwo noumerane nabanto batato bagotiira gochia gosasima Nyasae agwo Beteli. Oyomo obo nabe obwate chimanwa chie chimbori isato, na oyonde obogoretie emegati etato, na oyonde ekerandi keroisirie korwa ase risankwa kere nedivai. 4Barabwo mbagokwanie, bakoe emegati ebere, noyianche, oyebogorie korwa ase amaboko abo. 5Nyuma y’ayio nogende gochia ekegoro kia Nyasae agwo Gibea, ase egetwori ki’Abafilisti kere. Agwo ase egesoero ki’omochie noumerane nekeombe ki’ababani bagotirimboka korwa ase ekegoro aase agwo ebing’wanso bikoruerwa, babe bakobugia amakano ne chikonu, na ebiroria, na amakano ’ebirigisa. Barabwo mbabe bakobaboka ase okobana. 6Erio Omoika bw’Omonene noche igoro yao ne chinguru; naye nobane amo nabarabwo, na oonchorwe obe kore ne chingencho ching’ao. 7Bono ekero ebimanyererio ebio birakoreke asore, okore rinde rionsi orarore, ekiagera Nyasae nigo are amo naye. 8Erio ontang’anere gotirimboka gochia Giligali. Inche ninchiche aroro asore ase okorua ebing’wanso bi’ogosambwa na ebi’omorembe. Onganye aroro ase engaki y’amatuko atano na abere goika inchiche asore, nkworokie aya ogwenerete gokora.”
9Ekaba ekero Saulo eonchorete gotigana na Samweli, Nyasae akaa Saulo enkoro ere ne chingencho ching’ao, na ebimanyererio biria bionsi bigakoreka ase rituko riria. 10Ekero Saulo amo nomosomba oye baigete Gibea, ekeombe ekenene ki’ababani gekaumerana nere. Omoika o Nyasae ogacha igoro asare ne chinguru, nere agachaka kobaboka ase okobana ase egati y’ababani baria. 11Abanto bonsi abwo konya bamomanyete agwo ritang’ani, ekero bamoroche okobana amo nababani baria, bagakwana barabwo ase barabwo, “Mang’ana ki aya amonyorire omwana o Kisi? Inee! Saulo nere nabeire oyomo bw’ababani?” 12Omonto omenyete aase aria akaboria, “Ise nere ng’o?” Ase engencho eyio amang’ana akaba agokwanwa iga: “Inee! Saulo nere nabeire oyomo bw’ababani?” 13Ekero Saulo akoorire kobaboka ase okobana, agatiira gochia ase ekegoro aase ebing’wanso biare koruerwa.
14Ise moke Saulo akaboria Saulo na omosomba oye, “Ng’ai mwachiete?”
Saulo akairaneria, “Nechitigere twagendete korigia, na ekero totachinyorete, tokagenda ase Samweli.”
15Ise moke akamotebia, “Koranche ontebie aya Samweli abatebetie.”
16Saulo akamoiraneria, “Nigo atotebetie boronge ng’a chitigere chianyorekanire.” Korende amang’ana aya Samweli akwanete igoro y’oboruoti tamoyatebetie.
Saulo ogokwanigwa kabeire omoruoti
17Erio Samweli akarangeria Abaisraeli basangererekane amo ase obosio bw’Omonene agwo Misipa, 18akabatebia, “Omonene, Nyasae bw’Abaisraeli, otebire iga: Inche nigo nabang’anyetie korwa Misiri, nkabatooria korwa ase amaboko ’abanto b’amaruoti ande onsi, abwo barenge kobachanda. 19Korende bono mwangire Nyasae oino oria obatooretie korwa ase obokong’u bwonsi na ogochandwa, mwatebire ng’a: Tobekere omoruoti atogambere. Gaki bono sangererekana ase obosio bw’Omonene, egesaku ase egesaku, na eamate ase eamate.”
20Ase igo Samweli akarenta ebisaku bionsi bi’Abaisraeli ang’e, na egesaku kia Benjamin kegachorwa ase ogoakerwa obomera. 21Ekero arentire egesaku kia Benjamin ang’e, obomera bokagwera eamate ya Matiri, na ase eamate ya Matiri obomera bokagwera Saulo, omomura o Kisi, korende abanto bagachia komorigia tibamonyora. 22Erio naende bakaboria Omonene, “Inee! Omonto oyio nachete aa?”
Omonene akairaneria, “Rigereria oyio bwebisete ase ebinto bikogachwa.”
23Ase ayio bakaminyoka bakamorusia aroro, na ekero atenenete ase egati y’abanto bamoroche ng’a naetanetie abanto bande bonsi ase obotambe bw’omotwe korwa amareko gochia igoro. 24Samweli agatebia abanto bonsi, “Aiga moroche ere oyio Omonene achorire. Monto onde tari aa ase egati y’abanto aba bonsi omoreng’aine.”
Erio abanto bonsi bagaaka eriogi, bakabora, “Omoruoti oyo achie kare!”
25Erio Samweli agatebia abanto buna oboruoti bogwenerete kogambwa, na akarika emeroberio eyio ase ebuku akayebeka ase obosio bw’Omonene. Nyuma y’ayio Samweli akaa abanto ribaga, kera oyomo agende inka bwoye. 26Saulo nere akagenda nka bwoye aria Gibea. Abanto bande abanene, abwo Nyasae konya akwanire ne chinkoro chiabo, bakamotunyana. 27Korende abanto bande abarenge ababe bakabora, “Naki oyo arakore atotoorie?” Barabwo bakamochaya, tibamoirera biegwa binde. Korende ere akaba buna taigwete aya bakwanete.
Currently Selected:
1 SAMWELI 10: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
