1 ABARUOTI 1
1
Omoruoti Daudi ase obogotu bwaye
1Bono omoruoti Daudi konya ogotire mono, okoorire emiaka emenge; nonya ore kobisigwa amarangeti amange, tarenge koigwa riberera. 2Ase igo abasomba baye bakamotebia, “Tiga aye omonene oito omoruoti origerigwe omoiseke omwekungi; ere abe ogokorenda na kogokorera. Boigo abe ogokorarisia, akobekere riberera.” 3Ase ayio bakarigia ase ense yonsi y’Abaisraeli, banyore omoiseke omwekungi omonyakieni. Bakanyora Abisagi Omosunemu, bakamorenta ase omoruoti. 4Omoiseke oria nigo arenge omonyakieni mono: ere akaba omokoreri bw’omoruoti, korende omoruoti tamenyanete nere.
Adonia okogania ekerogo ki’oboruoti
5Adonia, omwana omomura bwa Hagiti, moga Daudi, akeimokereria igoro omonyene, ogoteba, “Ninche ndabe omoruoti.” Akenyorera chigari na abanto abariini chibarasi, na abanto emerongo etano barabe bagotang’ana bosio bwaye. 6Ise konya tana komotogonyera nonya ng’ake ase okomoboria, “Nase ki gwakora aya na aya?” Boigo Adonia nigo arenge omonto omonyakieni; ere nigo aiboretwe nyuma Abisalomu kaiboirwe. 7Adonia agakwana na Yoabu, omomura bw’omokungu Seruya, na Abiatari omokuani; barabwo bagancherana komokonya. 8Korende Zadoki omokuani, na Benaya, mosinto o Yehoyada, na Nathani omobani, na Simei, na Rei, na abarwani chituoni ba Daudi, barabwo tibabwatanete n’Adonia.
9Adonia akanyenya ching’ondi, ne chiombe, ne chimori chinoru, chikaba ekeng’wanso agwo ang’e n’Egetare gie Ching’iti kere ase ensoko y’Eni‐Rogeli, akarangeria abamura bamwabo bonsi, abwo abamura b’omoruoti, na abanto bonsi abanene b’obogambi bwa Yuda. 10Korende tarangeretie Nathani omobani, gose Benaya, gose abanto baria barenge abarwani chituoni, gose Sulemani, momura omwabo.
Sulemani okobekwa okoba omoruoti
11Nathani akagenda ase Batiseba, akamotebia, “Inee! Aye toraigwa ng’a Adonia, omwana o Hagiti, obeire omoruoti, na Daudi, omonene oito, taramanya amang’ana ayio? 12Ase ayio, bono tiga ngosemie, erinde otoorie obogima bwao obonyene, na obw’omwana oo Sulemani. 13Bono genda, osoe ara rimo ase omoruoti Daudi, omoborie: Inee! Aye omonene one omoruoti, tikwandierete inche, omosomba oo, eira y’ogotiana, ogateba: Sulemani, omwana oo omomura, nere oragambe nyuma yane; ere naikaranse ase ekerogo kiane ki’oboruoti? Nase ki rende Adonia abeire omoruoti? 14Bono nebe ekero aye ogendererete gokwana nomoruoti, nainche boigo ninsoe mbeke amang’ana ao chinguru ase okoenekia ng’a nekeene.”
15Batiseba akagenda ase omoruoti, agasoa akanyomba k’omoruoti. (Bono omoruoti konya obeire omogotu mono, na Abisagi, Omosunemu, nere orenge omokoreri oye.) 16Batiseba agatung’ama inse ase okoorokia amasikani ase omoruoti, na omoruoti akamoboria, “Ninki oganetie?”
17Batiseba akamotebia, “Omonene one, nkwandierete inche, omosomba oo, eira y’ogotiana ase Omonene, Nyasae oo, ogateba: Sulemani, omwana oo omomura, nere oragambe nyuma yane, nere oraikaranse ase ekerogo kiane ki’oboruoti. 18Na bono rora, Adonia bweeire oboruoti, na aye omonene one omoruoti, tomanyeti amang’ana ayio. 19Okorire ekeng’wanso, onyenyire chiombe, ne chimori chinoru; ne ching’ondi, ase obonge; naende orangeirie abana abamura bonsi b’omoruoti, na Abiatari omokuani, na Yoabu, omochiki bw’abarwani b’esegi, korende tarangereti Sulemani, omosomba oo. 20Na bono, omonene one omoruoti, amaiso ’abanto bonsi b’Abaisraeli naye arigereretie, obatebie ng’a ning’o oraikaranse ase ekerogo kiao ki’oboruoti, aye omoruoti one, nyuma gokwarureo. 21Onye taibo, nebe ekero aye, omonene one omoruoti, gwakure na korarare ase chisokoro chiao chiararete, inche na omwana one Sulemani toche kobarwa koba abamochi abanene.”
22Ekero omokungu oria agendererete gokwana nomoruoti, Nathani omobani agacha aroro agwo. 23Omoruoti agatebigwa, “Nathani omobani, oyo aiga.” Na ekero achete ase obosio bw’omoruoti, agatung’ama inse akaumama. 24Nathani agakwana, akamoboria, “Omonene one omoruoti, Inee, nabo gwatebete ng’a, Adonia nere oragambe nyuma yao, aikaranse ase ekerogo kiao ki’oboruoti? 25Rero ere otirimbokire, onyenyire chiombe, ne chimori chinoru, ne ching’ondi, ase obonge, naende orangeirie abana abamura bonsi b’omoruoti, na abachiki b’abarwani esegi, na Abiatari omokuani; na rora, igo bakoria na konywa ase obosio bwaye bagoteba: Adonia omoruoti ochie kare! 26Korende inche, omosomba oo, na Zadoki omokuani, na Benaya, mosinto o Yehoyada, na Sulemani, omosomba oo, intwe tatorangereti. 27Inee! Ring’ana eri igo riakorirwe, naye omonene one omoruoti toratotebia intwe abasomba bao ng’a ning’o oraikaranse ase ekerogo kiao abe omoruoti nyuma yao?”
28Omoruoti Daudi akairaneria, “Rangeria Batiseba achiche asende.” Ase ayio Batiseba agacha ase obosio bw’omoruoti, agatenenao. 29Na omoruoti akaria eira y’ogotiana, agateba, “Ekeene, buna Omonene are moyo, oria otooretie obogima bwane korwa ase emechando yonsi, 30buna nakorierete eira y’ogotiana ase Omonene, Nyasae bw’Abaisraeli, ngateba: Sulemani omwana oo, nere oragambe nyuma yane, na rero boigo ngokoriera inde eira eyio eyio.”
31Erio Batiseba agatung’ama inse, akaumama ase okoorokia amasikani ase omoruoti, agakwana, “Tiga aye omonene one, omoruoti Daudi, ochie kare!”
32Omoruoti agateba, “Indangererie Zadoki omokuani, na Nathani omobani, na Benaya, mosinto o Yehoyada.” Erio abanto abwo bagacha ase obosio bw’omoruoti. 33Ere akabatebia, “Imoka mogende nabasomba baane, moriinie Sulemani, omwana one, ase eyombo yane, erio momotirimbokie gochia Gihoni. 34Aroro agwo Zadoki omokuani na Nathani omobani bamoake amaguta ase okomwatanana abe omoruoti okogambera Abaisraeli. Erio mobugie ebitureri bi’omochengo, motebe: Sulemani omoruoti ochie kare! 35Nyuma y’ayio momokoobe gocha aiga nka asende, nere aikaranse ase ekerogo kiane ki’oboruoti, ekiagera nere orabe omoruoti ase ribaga riane; nere nachorire agambere Abaisraeli na Abayuda.” 36Benaya, mosinto o Yehoyada, akairaneria omoruoti, “Amina. Tiga Omonene, Nyasae bw’omonene one omoruoti, anchere ayio. 37Buna koreng’ana Omonene abeire amo naye, omonene one, naboigo abe amo na Sulemani, erio akore ekerogo kiaye ki’oboruoti kebe ekenene goetania ekerogo kiao aye omoruoti Daudi, omonene one.”
38Ase ayio, Zadoki omokuani, na Nathani omobani, na Benaya, mosinto o Yehoyada, na Abakereti, na Abapeleti bagatirimboka, bakariinia Sulemani ase eyombo y’omoruoti, erio bakamoira Gihoni. 39Aroro agwo Zadoki omokuani akabogoria orogunchara rw’amaguta korwa ase Eema y’Omosangererekano, agaaka Sulemani amaguta ayio ase okomwatanana. Erio bakabugia egetureri, na abanto bonsi bagateba, “Omoruoti Sulemani ochie kare!” 40Abanto bonsi bagatiira bakamotunyana, bakobugia ebiroria, bakaba nomochengo omonene mono, goika riroba rigatitira ase amariogi abo.
41Adonia na abageni bonsi baria barenge amo nere, ekero bakoorire omoyega obo, bakaigwa amariogi aria. Na ekero Yoabu ayaigwete amo nebiroria, akaboria, “Ninki engencho y’amariogi aya amanene are ase omochie?” 42Ekero agendererete gokwana, rora, Yonathani, mosinto bw’Abiatari omokuani, agacha agwo. Adonia akamotebia, “Inchuo aiga ime, ekiagera aye nomonto bw’amasikani ore, okorenta amang’ana amaya.”
43Yonathani akairaneria Adonia, “Taibo, amang’ana tari amaya, ekiagera omonene oito, omoruoti Daudi, obekire Sulemani obeire omoruoti. 44Omoruoti otomire amo nere Zadoki omokuani, na Nathani omobani, na Benaya, mosinto o Yehoyada, na Abakereti, na Abapeleti, nabarabwo bariinirie Sulemani ase eyombo y’omoruoti. 45Zadoki omokuani na Nathani omobani bamoakire amaguta agwo Gihoni, nere obeire omoruoti. Barabwo batiirire korwa agwo, bagochenga, goika omochie bwonsi obeire namariogi amanene ay’omochengo; nayio naro kwaigure. 46Sulemani nere oikaransire ase ekerogo ki’oboruoti. 47Nonya naboigo, abasomba b’omoruoti nigo bacha kogokera omonene oito, omoruoti Daudi, bagoteba: Nyasae oo akore erieta ria Sulemani rimanyekane mono kobua eriao, naende akore ekerogo ki’oboruoti gia Sulemani kebue ekiao. Ere omoruoti nigo asasimete kare borere bwaye, 48agateba: Atogigwe Omonene, Nyasae bw’Abaisraeli, oyo oeire oyomo ase oroiboro rwane ribaga goikaransa ase ekerogo kiane ki’oboruoti rituko ria rero, nainche neroreire ayio namaiso aane.”
49Erio abageni bonsi b’Adonia bakaiguswa ase omoondoko, bakaimoka, na kera omonto akagenda enchera yaye. 50Adonia akoboa Sulemani mono, akaimoka, akagenda kobwata emegwekano ye chingunchara chi’egesasimero. 51Sulemani agatebigwa ng’a Adonia omoirokire na obwatire emegwekano ye chingunchara chi’egesasimero, ogoteba: “Ritang’ani tiga omoruoti Sulemani andiere eira y’ogotiana ng’a takong’ita inche, omosomba oye, nomoro.”
52Sulemani agateba, “Karanyorekane ore omonto bw’ekeene, nonya nagatukia akamo k’omotwe oye tigakogwa inse; korende obobe koboranyorekane asare, goika akwe.” 53Erio omoruoti Sulemani agatoma abanto nabarabwo bakamorusia agwo ase egesasimero, bakamorenta. Ere agacha agatung’ama, akaumama ase okoorokia amasikani ase omoruoti Sulemani, na Sulemani akamotebia, “Genda nka bwoo.”
Currently Selected:
1 ABARUOTI 1: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
