1 ABARUOTI 2
2
Ogotebereria kw’omoerio gwa Daudi ase Sulemani
1Ekero engaki y’ogokwa gwa Daudi yaigete ang’e, agachika Sulemani, omwana oye, akamotebia, 2“Inche nabeire ang’e kogenda enchera eria abanto bonsi b’ense bakogenda. Obe omokong’u, bweorokie obe omonto oteneine boronge. 3Obwate onsi aya Omonene, Nyasae oo, agochikire, otaare ase chinchera chiaye, na orende amachiko aye, na emeroberio yaye yonsi, orende noborori bwaye, buna arikire ase amachiko a Musa, erio nario orasesenigwe ase kende gionsi ogokora, na aande onsi ase okogenda. 4Erio Omonene naikeranie ring’ana riaye, riria akwanete asende, agateba: Abana bao kobararende chinchera chiabo, na bataare ase obosio bwane ase obwegenwa ne chinkoro chiabo chionsi, na ase emioyo yabo yonsi, rirorio omonto takobora korwa ase ororeria rwao oyoraikaranse ase ekerogo ki’oboruoti bw’Abaisraeli.
5“Aye nomanyete eki Yoabu, omwana bw’omokungu Seruya, akorete asende, ase ogoita abachiki baria babere b’abarwani esegi b’Abaisraeli: Abineri, mosinto o Neri, na Amasa, mosinto o Yeteri. Noinyorete buna aiterete amanyinga ase engaki y’omorembe buna nigo yarenge engaki y’esegi. Akabeka amanyinga atari na komocha ase orokini rwaye na ase ebikoroto bi’amagoro aye. 6Aye okore onsi koreng’ana nobong’aini bwao, korende tobaisa komotiga agende ne chimbuche chiaye aase abakure ore nomorembe.
7“Korende okorere abana ba Barisilai, Omogileadi, amaya, babe ase egati ya baria bakoragera amo naye, ekiagera ase obosani obo obuya, barabwo nabo bankorerete, ekero narenge gotoma korwa ase Abisalomu, momura omino.
8“Naende boigo nare aroro Simei, mosinto o Gera, omonto bw’egesaku kia Benjamin, korwa Bahurimu. Ere nandagereretie okoragereria okobe ase rituko riria nagendete Mahanaimu; korende ekero achete Yorodani koumerana nainche, nigo namorierete eira y’ogotiana ase Omonene, ngateba: Tinkogoita nomoro. 9Ase ayio bono, tobaisa komobara ng’a tari na komocha, ekiagera aye nomonto omong’aini; nomanye aye omonyene eki ogwenerete gokora asare, motige agende aase abakure ore ne chimbuche, ase engencho y’okomocha kwaye kw’ogoitera amanyinga.”
Ogokwa kwa Daudi
10Daudi akarara ase chisokoro chiaye chiararete, erio agatindekwa ase Omochie o Daudi. 11Engaki Daudi agamberete Abaisraeli nigo yarenge emiaka emerongo ene; akagamba emiaka etano na ebere agwo Heburoni, na agwo Yerusalemu emiaka emerongo etato, na etato. 12Ase ayio, Sulemani agaikaransa ase ekerogo ki’oboruoti gia Daudi ise, na oboruoti bwaye bokaba ne chinguru chinene mono.
Ogokwa kw’Adonia
13Adonia, omomura o Hagiti, akagenda ase Batiseba, ng’ina Sulemani. Omokungu oria akamoboria, “Igo gwachire nomorembe?”
Adonia akairaneria, “Ee, nachire nomorembe.” 14Naende akamotebia, “Nimbwate egento ngokwana naye.”
Omokungu oria akamotebia, “Kwana.”
15Adonia akamotebia, “Nomanyete ng’a oboruoti nobwane bwarenge, na Abaisraeli bonsi igo baganetie mbagambere, korende nonya naboigo, oboruoti bokaonchoka bokaba obwa momura ominto, ekiagera igo bwaba obwaye ase ogwancha kw’Omonene. 16Na bono nimbwate okoboria okomo ngokoboria, tonkania.”
Omokungu oria akamotebia, “Boria.”
17Adonia agakwana, “Nagosabire, genda oborie omoruoti Sulemani ang’e Abisagi, Omosunemu oria, abe mokaane. Nimanyete ng’a takogokania.”
18Batiseba akamoiraneria, “Ayio mbuya; ninkwane nomoruoti ase engencho yao.”
19Ase ayio Batiseba akagenda ase omoruoti Sulemani akwane nere ase engencho y’Adonia. Omoruoti agatenena korotota ng’ina, agatung’ama, akamworokia amasikani; erio agaikaransa ase ekerogo kiaye ki’oboruoti, agachika ng’ina arenterwe ekerogo, na ng’ina agaikaransa ase ensemo y’okoboko gw’okorio kw’omoruoti. 20Erio ng’ina akamotebia, “Nimbwate okoboria goke igo nkorenta asore, tobaisa kwanga.”
Omoruoti akamotebia, “Boria okoboria kwao, baba; tinkwanga aya okoboria.”
21Ng’ina agateba, “Tiga Abisagi, Omosunemu oria, aegwe Adonia, momura omino, abe mokaye.”
22Omoruoti Sulemani akairaneria ng’ina, “Nase ki okoboria ng’a Abisagi, Omosunemu oria, aegwe Adonia abe mokaye? Moborerie aegwe noboruoti boigo, ekiagera ere momura ominto omonene; na Abiatari omokuani, na Yoabu, omwana bw’omokungu Seruya, babwatanire nere.” 23Erio omoruoti Sulemani agatiana ase Omonene, agateba, “Nyasae ang’e egesusuro ekenene onye ring’ana eri riaye aboririe tirigochia kogera asirie obogima bwaye. 24Bono, ekeene buna Omonene are moyo, oria ombekire ase ekerogo ki’oboruoti gia Daudi tata, na gonkong’ia, naende ong’eire oroiboro buna ariete eira, Adonia goika aitwe ase rituko ria rero.”
25Omoruoti Sulemani agatoma Benaya, mosinto o Yehoyada, aite Adonia. Benaya akamoita agakwa.
Ogoserigwa kw’Abiatari na ogokwa kwa Yoabu
26Omoruoti agatebia Abiatari omokuani, “Genda Anatoti ase oboremu bwao: aye igo ogwenerete okwe, korende inche tinkogoita ase engaki eye, ekiagera aye nkwabogoretie Esanduku y’Omonene Nyasae bosio bwa Daudi tata, naende ngwachandegete amo na tata ase emechando yaye yonsi.” 27Ase ayio Sulemani agaseria Abiatari taba omokuani ase Omonene. Igo ring’ana riria Omonene konya akwanire agwo Silo igoro ase enyomba ya Eli rigaikeranigwa.
28Ekero Yoabu aigwete amang’ana ayio, agatama gochia ase Eema y’Omonene, akabwaterera emegwekano ye chingunchara chi’egesasimero. Ere igo abwatanete n’Adonia ase okomokonya, korende tabwatanete n’Abisalomu. 29Omoruoti Sulemani agatebigwa, “Yoabu otamire gochia ase Eema y’Omonene, na rora, nao are ase egesasimero.” Erio agatoma Benaya, mosinto o Yehoyada, akamotebia, “Genda oake Yoabu, omoite.” 30Benaya akagenda ase Eema y’Omonene, agatebia Yoabu, “Omoruoti ogochikire osoke isiko.”
Korende Yoabu agakana, “Yaya, aa nao ngokwera.”
Benaya akagenda ase omoruoti, akamotebia amang’ana Yoabu atebete.
31Omoruoti akamotebia, “Kora buna atebire, gachie omoake, omoite na komotindeka. Ase enchera eye onduserie inche na enyomba ya tata egesiomba ase engencho y’amanyinga atari na komocha aria Yoabu aiterete. 32Omonene naite Yoabu ase okomocha kwaye kw’ogoitera amanyinga, ogokora okwo Daudi tata atamanyete. Yoabu nigo aitete nomoro Abineri mosinto o Neri, omochiki bw’abarwani esegi b’Abaisraeli, na Amasa mosinto o Yeteri, omochiki bw’abarwani esegi b’Abayuda. Abanto abwo babere nigo barenge abaronge, naende abaya komobua. 33Ase ayio, egesusuro gi’okomocha kw’ogoitera amanyinga nkebe igoro ase Yoabu, naende kebe igoro ase ororeria rwaye goika kare na kare. Korende ase Daudi, na ororeria rwaye, na enyomba yaye, na ekerogo kiaye ki’obonene, omorembe okorwa ase Omonene nobeo kare na kare.”
34Erio Benaya, mosinto o Yehoyada, akagenda, agaaka Yoabu, akamoita. Nere Yoabu agatindekwa ase enka yaye agwo ase erooro. 35Omoruoti akabeka Benaya, mosinto o Yehoyada, akaba omochiki bw’abarwani esegi ribaga ria Yoabu, na Zadoki omokuani akabekwa ribaga ri’Abiatari.
Ogokwa gwa Simei
36Naende Omoruoti akarangeria Simei, akamotebia, “Eagachere enyomba ime ya Yerusalemu omenyeo, tobaisa korua aroro ogende aande onsi nonya ng’ake. 37Ekiagera ekero kende gionsi orasoke korwa aroro, bwamboke akarooche ga Kidironi, omanye ng’a gioka okwe; okomocha kw’ogoiterwa kw’amanyinga ao nigo korabe okwao.”
38Simei agatebia omoruoti, “Egento gwatebire nekiya; buna aye omonene one omoruoti gwatebire, naboigo inche, omosomba oo, ndakore.” Ase ayio, Simei akamenya ase Yerusalemu amatuko amange.
39Korende ekaba ase omoerio bw’omwaka o gatato abasomba babere ba Simei bagatama, bakagenda ase Akisi, mosinto o Maaka, omoruoti o Gati. Simei agatebigwa ng’a abasomba baye nao bakare agwo Gati. 40Ase igo akaimoka akabekera etigere yaye egeikaransero, akariina igoro asere, akagenda Gati ase Akisi korigia abasomba baye; akabanyora, akabairania inka. 41Ekero Sulemani atebetigwe ng’a Simei narua Yerusalemu, akagenda Gati, naende akairana, 42akamorangeria, akamotebia, “Inche nigo nagotebetie ng’a orie eira y’ogotiana ase Omonene ng’a tobaisa korua Yerusalemu. Naende nkagokurera mono ngateba: Rituko orasoke korwa aroro agwo, na ogende aande onsi, goika okwe. Inee! Tigwanchete ng’a nonyigwere na okore bo? 43Naki otarenda eira yao y’ogotiana ase Omonene amo naya nagochigete?” 44Boigo omoruoti agatebia Simei, “Nomanyete aye omonyene ase enkoro yao ime obobe bwonsi boria gwakorete ase Daudi tata. Omonene nakoiranerie obobe bwao. 45Korende inche omoruoti Sulemani ninsesenigwe, na ekerogo ki’obonene gia Daudi nagekorwe kebe ne chinguru kegenderere botambe ase obosio bw’Omonene.”
46Omoruoti agachika Benaya, mosinto o Yehoyada, na ere akagenda agaaka Simei, akamoita. Ase ayio oboruoti bokabekwa chinguru ase okoboko gwa Sulemani.
Currently Selected:
1 ABARUOTI 2: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
