2 SAMWELI 24
24
Daudi ogokora omobaro bw’abanto na kobarika
(1 Am ’Eb 21:1–27)
1Naende Omonene akaba nendamwamu enene igoro y’Abaisraeli, agasukia enkoro ya Daudi akamotebia, “Genda obare Abaisraeli na Abayuda.” 2Ase igo omoruoti agatebia Yoabu, omotang’ani bw’emeganda yaye y’abarwani, “Bono etanana ase egati y’ebisaku bionsi bi’Abaisraeli, korwa Dani goika Beeri‐Seba, mobare abanto, erinde imanye omobaro obo.”
3Korende Yoabu akairaneria omoruoti, “Omonene, Nyasae oo, amente abanto ara amagana atakobareka, na aye omonene one omoruoti obe moyo goika oyarore. Korende naki ring’ana eri riakogwenera aye omonene one omoruoti?” 4Korende ring’ana ri’omoruoti rikaba ne chinguru igoro ya Yoabu na abatang’ani b’abarwani. Ase igo Yoabu na abatang’ani bande bakarua ase omoruoti, bakagenda kobara Abaisraeli.
5Barabwo bakaamboka Yorodan, bagatoora Aroeri, na korwa ase omochie oyio agwo ase egati ye rikura bakagenda Gadi, naende gochia Yeseri, 6Erio bakagenda Gileadi na ase ense ya Tatimu‐Hodisi. Naende bakagenda Dani, na korwa Dani bagaetanana bagaika Sidoni. 7Bakagenda Turo, omochie ore ne chindwaki, na ase emechie yonsi y’Abahivi, na ey’Abakanani. Nyuma y’ayio bakagenda Beeri‐Seba ase ense y’Abayuda, ensemo ya sugusu. 8Nyuma y’emetienyi kianda na amatuko emerongo ebere, ekero baetananire ense yonsi, bakairana Yerusalemu. 9Yoabu akaa omoruoti omobaro bw’abanto abaare konyara korwana esegi nemioro. Ase Abaisraeli nigo barenge abanto chilifu amagana atano na atato (800,000), na ase Abayuda chilifu amagana atano (500,000).
10Ekero Daudi akoorire kobara abanto, enkoro yaye ekamogambia. Erio agatebia Omonene, “Nakorire ebibe ebinene ase aya nakorire; korende bono Omonene, nagosabire onyabere inche omosomba oo, naki nigo nakorire egento ki’oboriri mono.”
11Ekero Daudi abogete mambia, ring’ana ri’Omonene rigachera Gadi, omobani, oyorenge omorori o Daudi, rikamotebia, 12“Genda okwane na Daudi, omotebie ng’a inche Omonene nigo ngoteba iga: Nabekire asore amang’ana atato; ase ayio chora erimo, eri ndagokorere.”
13Erio Gadi akagenda ase Daudi, akamomanyia amang’ana ayio, akamotebia, “Nigo origetie enchara eche ase ense yao emiaka etato?#24:13 Etato: Ekeibirania nigo kerikire “etano na ebere”: (etato, rora 1 Am ’Eb 21:12) Gose nigo origetie otame korwa ase ababisa bao emetienyi etato? Gose nigo origetie oborwaire obobe bw’ogoita abanto bosoe ense yao amatuko atato? Bono rengereria mono na ong’e amairanerio imoirere oyio ontomete.”
14Daudi akairaneria Gadi, “Inche nasoire ase emechando emenene. Gaki, bono, tiga togwe ase okoboko kw’Omonene, ekiagera amabera aye namanene; korende ase amaboko a mwanyabanto tintageti ingweo.” 15Erio Omonene akarentera Abaisraeli oborwaire obobe, na borobwo bogaita abanto korwa mambia goika engaki yaragetwe; abanto chilifu emerongo etano na ebere (70,000) bagakwa korwa Dani goika Beeri‐Seba. 16Ekero omomalaika aramborete okoboko kwaye asirie Yerusalemu, Omonene akaonchora ebirengererio biaye ase amabe ayio, agatebia omomalaika oria orenge gosiria abanto, “Bono aisanire, ororobia okoboko kwao.” Omomalaika konya oikire ang’e nekeooreri ki’Arauna Omoyebusi.
17Ekero Daudi aroche omomalaika oria orenge goita abanto, agatebia Omonene, “Rora, ninche inde omonyabibe, ninche nakorire obobe obo, korende ching’ondi echi chiane, inki chiakorete? Okoboko kwao tiga kobe igoro yane, na igoro y’enyomba ya tata.”
18Ase rituko erio Gadi akagenda ase Daudi, akamotebia, “Imoka oagachere Omonene egesasimero agwo ase ekeooreri ki’Arauna Omoyebusi.” 19Ase igo Daudi akaigwera amang’ana aya Omonene achigete goetera ase Gadi. 20Arauna agachia korigereria akarora omoruoti na abasomba baye bagotiira gocha asare. Erio agasoka, agatung’ama inse, akaumama ase obosio bw’omoruoti. 21Arauna akamoboria, “Omonene one, naki gwachire aa asende inche omosomba oo?”
Daudi akamoiraneria, “Nigo nachire ngore ekeooreri kiao, ing’agachere Omonene egesasimero aiga, erinde amaakwa atangwe korwa ase abanto.”
22Erio Arauna akairaneria Daudi, “Omonene one omoruoti, ira eki oraganie ase ekeng’wanso. Rora chiombe echi ase ekeng’wanso ki’ogosambwa, na ebikorero ebi bi’okoora amo namakorogoto bibe chinko okogesambera.” 23Arauna akaa omoruoti ebinto ebio bionsi, akamotebia, “Tiga Omonene Nyasae oo agwanchere.”
24Korende omoruoti akairaneria Arauna, “Yaya taibo, korende nigo nkobigora korwa asore ase rigori bikoonigwa: tinkoruera Omonene Nyasae ekeng’wanso ki’ogosambwa nebinto ntagoreti ase rigori.” Igo Daudi akagora ekeooreri ekio amo ne chiombe ase chibesa, chisekeli chie chifeta emerongo etano. 25Na Daudi akaagachera Omonene egesasimero, akarua ekeng’wanso ki’ogosambwa, na eki’omorembe. Ase ayio Omonene akaigwa ogosaba gw’ense eria, na amarwaire agatangwa korwa ase Abaisraeli.
Currently Selected:
2 SAMWELI 24: EKEGUSIIBBLE
Highlight
Copy
Compare
Share
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
