1 YOHANA 3

1Rora, nobwanchani bore naki, obwo Tata atoeire, ng’a torokwe abana ba Nyasae, na naboigo tore! Naki ekegerete ense etatomanyeti neke, ng’a temomanyeti ere. 2Abanchani, bono nabana ba Nyasae tore, korende teraorokigwa buna torache koba. Naki twamanyire ng’a ekero araorokigwe natogwekane nere, ekiagera natomorore buna are. 3Na monto onde bwensi omosemeretie nigo agwechena buna Kristo are omochenu.

4Onde bwensi ogokora ebibe, nigo agosaria amachiko, ekiagera ebibe nogosaria kw’amachiko. 5Na inwe mwamanyire ng’a Kristo nigo aorogetigwe erinde arusie ebibe biaito, na bibe tibiri ime yaye. 6Onde bwensi omenyete ime asare tagokora ebibe; onde bwensi ogokora ebibe tamorochi, nonya nkomomanya tamomanyeti. 7Abana baane, monto onde tabaisa kobang’aina. Ere oyogokora oboronge nigo are omonyene oboronge, buna Kristo are omonyene oboronge. 8Ere oyogokora ebibe noyo o Saitani, ekiagera Saitani nigo akorete ebibe korwa omochakano. Ekiagerete Omwana o Nyasae akaorokigwa neke, ng’a asarie emeremo ya Saitani. 9Kera omonto oiboirwe na Nyasae tagokora ebibe, ekiagera oroiboro rwa Nyasae ndotigarete ime yaye, gose takonyara gokora ebibe, ekiagera oiboirwe na Nyasae. 10Ase eri abana ba Nyasae nigo bare maiso marore, na abana ba Saitani boigo: Onde bwensi otari gokora boronge tarueti ase Nyasae, nonya noyo otancheti oyomwabo.

Twanchane intwe ase intwe

11Naki aya naro amang’ana mwaigwete korwa ritang’ani, ng’a twanchane intwe ase intwe. 12Titoba buna Kaini, oyorenge bw’oria omobe, agaita oyomwabo. Ere nigo amoitete ase ki? Igo amoitete ekiagera ogokora kwaye kwarenge okobe, na okw’oyomwabo nigo kwarenge okwa boronge. 13Timokumia, baminto, onye ense ekobagecha. 14Intwe twamanyire ng’a twaetire korwa ase amakweri, twasoire ase obogima, ekiagera twanchire abaminto. Oyotancheti nigo amenyete ase amakweri. 15Onde bwensi ogechete oyomwabo oyio nomoiti, na inwe momanyete ng’a omoiti tari nobogima bwa kare na kare ime yaye. 16Ase eri twamanyire obwanchani: Kristo nigo aruete obogima bwaye ase engencho yaito. Naboigo naintwe ntogwenerete korua obogima bwaito ase engencho y’abaminto. 17Korende oyore nebinto bi’ense, na arore oyomwabo oremeire, gotamororera amabera, Inee, naki obwanchani bwa Nyasae borabe ime asare oyio? 18Abana baane, titwancha ase amang’ana gose ase ogokwana, korende ase ogokora, na ase ekeene.

Oboremu ase obosio bwa Nyasae

19Ase eri natomanye ng’a nigo tore ab’ekeene, na ase obosio bwaye natoremie chinkoro chiaito. 20Onye chinkoro chiaito chigotogambia, Nyasae nomonene kobua chinkoro chiaito, na ere nigo amanyete onsi. 21Abanchani, onye chinkoro chiaito tichigotogambia, rirorio ntore noboremu ase obosio bwa Nyasae, 22na rinde rionsi togosaba nigo tokorinyora korwa asare, ekiagera ntobwatete amachiko aye, naende igo tokoyakora ayakomogwenera. 23Na oko nakwo ogochika kwaye, ng’a toriegene erieta ri’Omwana oye Yeso Kristo, na gwanchana intwe ase intwe buna atochikerete. 24Na bonsi ababwatete amachiko aye nigo bamenyete ime asare na ere ime asebare. Na igo twamanyire ng’a ere nigo amenyete ime asetore, twayamanyire korwa ase Omoika oria atoeire.

Currently Selected:

1 YOHANA 3: EKEGUSIIBBLE

Highlight

Copy

Compare