1 YOHANA 4

Omoika o Nyasae na omoika bw’omobisa o Kristo

1Abanchani, timwegena kera omoika, moteeme emeika onye neya Nyasae, ekiagera ababani b’oborimo abange basokire gochia ase ense. 2Ase eri nario moramanye Omoika o Nyasae: Kera omoika oyokoorokia Yeso Kristo, ng’a ochire ase omobere, oyio noyo o Nyasae, 3korende kera omoika otakoorokia Yeso igo, oyio tori oyo o Nyasae. Oyio noro omoika bw’omobisa o Kristo; oyio mwaigure ng’a ngocha are, na bono oikire gocha ase ense ime. 4Abana baane, inwe naba Nyasae more, naende mwabuire baria, ekiagera ere oyore ime asemore nomonene kobua ere oyore ime ase ense. 5Abwo nab’ense bare. Ase ayio, ayabagokwana nay’ense, na ense igo ekobaigwa. 6Intwe nigo tore aba Nyasae. Ere oyomanyete Nyasae nigo agotoigwa, na ere oyotari o Nyasae tagotoigwa. Ase eri twamanyire gwatanana Omoika bw’ekeene, na omoika bw’ogosira.

Nyasae nobwanchani

7Abanchani, twanchane, ekiagera obwanchani nigo bokorwa ase Nyasae, na kera oyobwanchire oiboirwe na Nyasae, naende namomanyete Nyasae. 8Oyotancheti, tamomanyeti Nyasae, ekiagera Nyasae nobwanchani. 9Ase eri obwanchani bwa Nyasae bwarorekanire asetore: Nyasae otomire Omwana oye omomoima ase ense, erinde tonyore obogima asare. 10Obo nabwo obwanchani, tari ng’a nintwe twamwanchete Nyasae, korende nere otwanchete intwe, agatoma Omwana oye koba ekeng’wanso gi’okobwatania ase ebibe biaito. 11Abanchani, onye Nyasae otwanchete igo, netogwenerete naintwe boigo gwanchana intwe ase intwe. 12Monto onde tari ororire Nyasae kero kende gionsi. Gatoranchane intwe ase intwe, Nyasae nigo amenyete ime asetore, na obwanchani bwaye bwaikeranigwe ime yaito.

13Ase eri twamanyire ng’a ntomenyete ime asare, nere ime asetore: Ere otoeire Omoika oye. 14Na intwe twarorire, naende twabeire birori ng’a Ise otomire Omwana oye koba Omotooria bw’ense. 15Onde bwensi okoorokia ng’a Yeso n’Omwana o Nyasae, Nyasae nigo amenyete ime asare, na ere ime ase Nyasae. 16Na intwe twamanyire obwanchani obo Nyasae are naborobwo asetore, na kobwegena. Nyasae nobwanchani, na ere oyomenyete ase obwanchani nigo amenyete ime ase Nyasae, na Nyasae ime asare. 17Ase eri obwanchani bwaikeranigwe ime yaito, erinde tobe noboremu ase rituko ri’ekina, ekiagera buna ere are, naboigo naintwe tore ase ense eye. 18Obwanchani tibori nobwoba, korende obwanchani oboikeranu nigo bogoseria obwoba gochia isiko. Naki obwoba mbore negesusuro, na oyore nobwoba taikeraniri ase obwanchani. 19Intwe twanchire, ekiagera ere natwanchete intwe ritang’ani. 20Omonto karatebe, “Nimwanchete Nyasae,” naende ogechete oyomwabo, oyio nomonyaborimo. Ere oyotamwancheti oyomwabo oyio aroche, takonyara komwancha Nyasae oyio atarochi. 21Oko nakwo ogochika twaeirwe nere: Ere oyomwanchete Nyasae anche noyomwabo boigo.

Currently Selected:

1 YOHANA 4: EKEGUSIIBBLE

Highlight

Copy

Compare