रोमियो 9
9
इस्राएल रा मसीह जो नी मनणा
1-3ऐबे अगर परमेसरा रे प्यारा ले कोई आस्सो लग नी करी सकदा, ता किधियो इस्राएल देसा रे लोक परमेसरा ले दूर हुई गये जो मेरे आपणे यहूदी लोक ऐं, मुंजो एस गल्ला ले बौह्त दुःख आ होर मेरे दिला मन्झ तिन्हारे रे कठे बौह्त बोझ आ। मेरे आपणे लोका रे छुटकारे कठे अगर मेरे पर दोस लगे या हांऊँ मसीह ले लग भी कितेया जांऊँ, तेबे भी हांऊँ एता रे कठे त्यार आ। होर हांऊँ सच्च बोला कि मसीह मेरा गुआह आ। मेरी अंतरात्मा होर पवित्र आत्मा भी एस गल्ला री गुआही देआ कि हांऊँ झूठ नी बोलदा। 4स्यों मेरे साहीं इस्राएल देसा रे लोक ऐं। परमेसरे आपणे बच्चे हूंणे रे कठे स्यों चुणिरे। तिन्हें तिन्हा पर आपणी महिमा जाहिर कितिरी। परमेसरे तिन्हा किन्हें वाचा बान्ही होर तिन्हो आपणी व्यवस्था दिति, स्यों सच्चाई किन्हें परमेसरा री अराधना करहे होर तिन्हें परमेसरा ले वादे पाईरे। 5अब्राहम, इसहाक होर याकूब जेह्ड़े बडे लोक तिन्हारे बापदादे ऐं, होर मसीह भी माह्णुं हूंणे रे नाते इस्राएल देसा रा था। परमेसर जो सभी ले गास राज करहा, तेसरी बड़ाई जुग-जुग हुन्दी रहे। आमीन।
इस्राएल देसा रे लोका री नाहं परमेसरा रा मकसद
6परमेसरे आपणा वादा पूरा कितेया, क्यूंकि इस्राएल देसा रे लोका रे सारे बंस सच्चे परमेसरा रे लोक नी ऐं। 7होर अब्राहमा रे बंसा मन्झ जमणे री वजहा ले ही सभ परमेसरा रे बच्चे नी बणी जांदे, पर पवित्र सास्त्रा मन्झ परमेसरे अब्राहमा किन्हें बोलिरा कि, “जो इसहाक रे बंस मन्झ जमघे से ही तेरे बच्चे मनी जाणे।” 8मतलब जो कुदरती रूपा अब्राहमा ले जम्मे, स्यों परमेसरा रे बच्चे हो ये जरूरी नी आ। पर जो वादे रे बच्चे, स्यों ही अब्राहमा रे बच्चे गिणे जाहें। 9क्यूंकि परमेसरे ये वादा कितिरा था कि, “मां अगली साल एस टैम दबारा आऊंणा, होर तेबे सारा रा एक मह्ठा जमणा।”
10होर ये मह्ठा आस्सा रा बापदादा इसहाक था, इसहाक होर रिबका रे जअणुं बच्चे हुए। 11-12होर हल्ली तक ना ता बच्चे जम्मिरे थे, होर ना तिन्हें बच्चे कुछ भला या बुरा कितिरा था, परमेसरे रिबका किन्हें बोलेया कि “तेरे जेठे मह्ठे छोटे मह्ठे री सेऊआ करणी।” परमेसरे ये गल जाहिर करणे रे कठे बोली कि से आपणे मना री इच्छा ले लोका जो चुणा, ना कि तिन्हारे कितिरे केसी कामा री वजहा ले। 13ये गल ठीक ही जिहां पवित्र सास्त्रा मन्झ लिखिरी परमेसर बोला कि, “मैं याकूबा किन्हें एसावा ले ज्यादा प्यार कितेया।”
इस्राएल रा नाहं करणा, होर परमेसरा रा न्याय
14इन्हा गल्ला जो मना मन्झ रखी किन्हें क्या आस्से एह्ड़ा बोलिए कि, परमेसर जिन्हा जो चुणणा चांहा जेबे से तिन्हा लोका जो चुणा, ता क्या से अन्याय करहा? नी कधी नी! 15क्यूंकि परमेसरे मूसा किन्हें बोल्या,
“हांऊँ जेस केसी पर दया करणा चाहूँ, मां तेस पर दया करणी,
होर जेस केसी पर तरस करणा चाहूँ तेस पर ही तरस करणी।”
16इधी कठे ये माह्णुं री इच्छा होर कोसिसा पर नी, पर परमेसरा पर निर्भर आ कि से केस पर दया करणा चांहा। 17क्यूंकि पवित्र सास्त्रा मन्झ परमेसरे मिस्र देसा रे राजा (फिरौन) किन्हें बोल्या था कि, “मैं तू इधी कठे राजा बणाईरा, ताकि हांऊँ आपणी सामर्थ तुजो दसी सकूं, होर संसारा रे सारे लोक मेरी बढ़ाई करी सके।” 18ता फेरी, से जेस पर चाहां, तेस पर दया करहा; होर जेस जो चाहां, तेस जो ढीठ बणाई देआ।
19तेबे कुछ लोका मेरे किन्हें बोलणा अगर एह्ड़ा ता परमेसर किहाँ बोली सका कि, “आस्से दोसी ऐं?” कोई भी परमेसरा जो तेसरी इच्छा पूरी करणे ले नी रोकी सकदा। 20पर हे मेरे दोस्त, हांऊँ तेरे ले पूछा तू कुणहां, जो परमेसरा पर सुआल करहा। क्या घड़ीरी चीजा घड़नेवाल़े किन्हें बोली सक्हा ई कि, “तैं हांऊँ एह्ड़ा किधियो घड़ेया?” 21क्या कुम्हारा जो माटे पर हक नी हाया कि एक ई ढेले मन्झा ले, एक भांडा खास मकसदा रे कठे, होर दूजा आम मकसदा रे कठे बणाये? ता एता मन्झ हरानी री केह्ड़ी गल ई?
22एह्ड़ा ही परमेसरे आस्सा साउगी भी कितिरा। से आपणा गुस्सा दसणे चांहां था होर आपणी सामर्थ जाहिर करणा चांहां था। से तिन्हा जो बड़े धीरज रखी किन्हें सैहां था, जिन्हा पर तेसरा गुस्सा जाहिर हूंणे वाल़ा था, होर जो विनास हूंणे रे लायक थे। 23होर से आपणी महान महिमा जो तिन्हा लोका पर जाहिर करणा चाहां था, जिन्हा पर तिन्हें दया किती, होर जो पैहले ले ही तेसरे महिमा मन्झ साझी हूंणे रे कठे चुणिरे थे। 24मतलब आस्सा पर जिन्हा जो तिन्हें ना सिर्फ यहूदी लोका मन्झा ले पर अन्यजाति लोका मन्झा ले भी चुणेया। 25अन्यजाति लोका रे बारे मन्झ परमेसर होसे नबी री कताबा मन्झ भी बोल्हा,
“जो मेरी प्रजा नी थी, तिन्हा जो मां आपणी प्रजा बोलणा,
होर जो प्रजा लाडली नी थी, तेस्सा जो लाडली बोलणा।
26होर एह्ड़ा हूंणां कि जेस जगहा मन्झ तिन्हा किन्हें ये बोल्या गईरा था कि, तू आस्सा री प्रजा नी हाई,
तेस ई जगहा मन्झ तिन्हा जिउंदे परमेसरा रे बच्चे कैहलाणे।”
27होर यसायाह नबिये इस्राएल देसा रे लोका रे बारे मन्झ हाका पाई किन्हें बोल्हा,
“चाहे इस्राएल देसा रे लोका री गिणती समुद्रा रे रेते रे बराबर हो,
तेबे भी तिन्हा मन्झा ले कम ही बचणे।
28क्यूंकि प्रभुआ आपणा न्याय धरती रे सभ लोका पर पूरी तरहा ले
होर जल्दी ई पूरा करणा।”
29जिहां यसायाह नबीये पैहले भी बोलिरा था,
“सर्वसक्तिमान प्रभु अगर आस्सा जो बंस नी देंदा,
ता आस्से सदोम होर गमोरा सैहरा रे लोका साहीं हुई जांदे,
जिन्हों प्रभुए पूरी तरहा नास करी दितेया था।”
इस्राएल देसा रे लोका रा विस्वास नी करणा
30इन्हा गल्ला जो मना मन्झ रखी किन्हें आस्से ये बोल्हे कि, अन्यजाति लोक आपणे आपा जो परमेसरा री नजरा मन्झ धर्मी माह्णुं बणने री कोसिस नी करदे थे, पर स्यों यीसू पर विस्वास करणे रे ज्रीए परमेसरा री नजरा मन्झ धर्मी माह्णुं बणे। 31पर इस्राएल देसा रे लोक, जो मूसा री व्यवस्था रा पालन करी किन्हें परमेसरा री नजरा मन्झ धर्मी माह्णुं बणने री कोसिस किती पर स्यों कामयाब नी हुई सके।
32पर एह्ड़ा किहाँ हुआ? ये इधी कठे हुआ कि स्यों लोक विस्वासा ले नी पर भले कामा किन्हें परमेसरा री नजरा मन्झ धर्मी बणने री कोसिस करहा ऐं थे। तिन्हें लोके यीसू मसीह जो नी अपनाहां जो तेस पात्थरा साहीं ऐं जेस ले ठोकर लगी। 33जिहां परमेसर पवित्र सास्त्रा मन्झ यीसू मसीह रे बारे मन्झ बोल्हा,
“देखा हांऊँ सिय्योन#9:33 एसरा दूजा नाऊँ यरुस्लेम सैहर आ सैहरा मन्झ लोका जो ठेस लगणे वाल़ा एक पात्थर, होर ठोकर खाणे री चटान रख्हा,
होर जो तेस पर विस्वास करघा, तेस कधी भी सर्मिन्दा नी हूंणां।”
Currently Selected:
रोमियो 9: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
