रोमियो 10
10
इस्राएल देसा रे लोका जो खुसी री खबरा री जरूरत
1हे भाईयो होर बैहणो, मेरे मना री इच्छा होर मेरे आपणे यहूदी लोका रे कठे मेरी प्रार्थना ई कि, परमेसर तिन्हारा उद्धार करहे। 2क्यूंकि हांऊँ तिन्हारी गुआही देहां कि, स्यों परमेसरा रे कठे हिम्मत रखे, पर परमेसरा री सेऊआ करणे री सही समझ तिन्हा वाले नी। 3क्यूंकि स्यों एस गल्ला जो नी मनणा चाहंदे कि परमेसरा किहाँ आपणी नजरा मन्झ लोका जो धर्मी माह्णुं बणा, इधी कठे स्यों आपणे तरीके ले धर्मी हूंणे री कोसिस करहे। क्यूंकि स्यों एस गल्ला जो नी मनणा चाहें थे कि किहाँ परमेसर लोका जो आपणी नजरा मन्झ धर्मी माह्णुं बणा।
4क्यूंकि मसीह रे आऊणें ले व्यवस्था रा मकसद पूरा हुआ। होर इधी कठे अगर कोई मसीह पर विस्वास करहा ता परमेसर तेजो आपणी नजरा मन्झ धर्मी माह्णुं बणा।
सभी रे कठे उद्धार
5मूसे नबिये व्यवस्था जो मन्नदे हुए धर्मी माह्णुं बणने रे बारे मन्झ पवित्र सास्त्रा मन्झ ये लिखिरा कि, “जो माह्णुं व्यवस्था रे हुक्मा जो मन्हा, तेस एस वजहा ले ई जिउंदे रैहणां।” 6पर विस्वासा रे ज्रीए परमेसरा रे नजरा मन्झ धर्मी माह्णुं बणने रे बारे मन्झ पवित्र सास्त्रा ये लिखिरा कि, “तू ये देख्या बोलदा कि मसीहा जो हेठ ल्याऊणे रे कठे स्वर्गा जो केस जाणा?” 7होर ये भी देख्या बोलदा कि, “हेठ पताल लोका मन्झ मसीह जो मरिरे मन्झा ले जिउंदा करणे रे कठे केस जाणा?” 8पर एह्ड़ा लिखिरा कि,
“परमेसरा रा वचन तेरे वाले आ, होर तेजो तुस्से आपणे मुंहा ले बोली सके होर आपणे दिला मन्झ मन्हां ईं सके।”
ये सेई विस्वासा रा बचन आ, जो आस्से प्रचार करहा ऐं। 9अगर तू लोका रे साम्हणें यीसू जो प्रभु मन्हां ईं ले, होर आपणे मना मन्झ ये भी विस्वास करहे कि, परमेसरे मसीह जो मरिरे मन्झा ले जिउंदा कितेया, ता परमेसरा पक्का तुस्सा रा उद्धार करणा। 10होर आस्से आपणे मना ले विस्वास करहे, होर इधी कठे ही परमेसरे आस्सो आपणी नजरा मन्झ धर्मी माह्णुं बणाया। आस्से ये अंगीकार करहे होर मसीह पर विस्वास करहे, इधी कठे आस्सा रा उद्धार हुणा।
11क्यूंकि यसायाह नबिये पवित्र सास्त्र मन्झ मसीह रे बारे मन्झ ये लिखिरा कि, “जो कोई तेस पर विस्वास करघा, तेस सर्मिन्दा नी हूंणां।” 12यहूदी लोका होर गैर-यहूदी लोका मन्झ कुछ फर्क नी हाया, इधी कठे कि परमेसर सभिरा प्रभु आ; होर जो मदद रे कठे तेजो हाका पाए तिन्हो बौह्त आसीस देआ। 13क्यूंकि पवित्र सास्त्रा मन्झ लिखिरा, “जो कोई प्रभु जो मदद रे कठे हाका पांगा, तेसरा उद्धार हूंणा।”
इस्राएल देसा रे लोका रा खुसी री खबरा जो नाहं करणा
14पर जिन्हें लोके प्रभु यीसू मसीह पर विस्वास नी कितेया, ता तिन्हा से मददा रे कठे किधियो हाका पाणी? अगर तिन्हें प्रभु रे बारे मन्झ नी सुणिरा ता तेस पर विस्वास किहाँ करणा? होर स्यों किहाँ सुणी सके जेबे तक कि तिन्हो कोई प्रभु रे बारे मन्झ नी सुणाये? 15होर कोई तिन्हा वाले जाई किन्हें किधियो सुणाये, जेबे तक कि प्रभुऐ स्यों नी भेजिरे हो? होर इधी कठे पवित्र सास्त्रा मन्झ लिखिरा, “तिन्हा लोका रे पैर कितने बांके ऐं, जो खरी खबरा री खुसी री खबर ल्याए!”
16पर सभीए तेस खुसी री खबरा पर विस्वास नी कितेया। यसायाह नबी बोल्हा कि, “हे प्रभु, आस्सा री खबरा पर केसिए विस्वास नी कितेया।” 17इधी कठे विस्वास एस खबरा जो सुणने ले आहूँआं, होर ये खबर से बचन आ जो मसीह रे बारे मन्झ दसी।
18पर हांऊँ तुस्सा किन्हें बोला कि पक्का यहूदी लोके मसीह रे बारे मन्झ सुणेया ता हूँगा। क्यूंकि पवित्र सास्त्रा मन्झ लिखिरा कि,
“तिन्हारी अवाज सारी धरती पर,
होर तिन्हारे बचन संसारा रे हर जगहा पूजी गये।”
19फेरी हांऊँ तुस्सा ले पूछा कि, क्या इस्राएल देसा रे लोक मसीह रे बारे मन्झ नी जाणदे थे? सभी ले पैहले ता ये गल प्रभुए मूसा नबिये किन्हें बोलिरी थी,
“मां तुस्सा यहूदी लोका रे मना मन्झ गैर-यहूदी लोका रे ज्रीए जो हकीकता मन्झ एक जाति भी नी, जलनी पैदा करणी,
होर मां नर्क्कली जाति लोका रे ज्रीए तुस्सा रे मना मन्झ गुस्सा पैदा करणा।”
20फेरी यसायाह नबिये बड़ी हिम्मता साउगी ये बोल्या जो परमेसरे तेस किन्हें बोलिरा था,
“जो मुंजो तोप्दे नी थे, तिन्हें हांऊँ पाई लया;
होर जो मुंजो पुछदे भी नी थे, तिन्हा पर हांऊँ जाहिर हुई गया।”
21पर इस्राएल देसा रे लोका रे बारे मन्झ परमेसरे यसायाह नबी रे ज्रीए ये भी बोल्हा कि, “हांऊँ सारा ध्याड़ा आपणे हाथ एक हुक्म नी मनणे वाले होर मेरे बरखलाप रैहणे वाली प्रजा री तरफ पसारे रैंहयां कि वापस तिन्हो आपणे वाले आऊणें रे कठे सादी सकूं।”
Currently Selected:
रोमियो 10: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
