रोमियो 8
8
पवित्र आत्मा रे ज्रीए जिन्दगी
1इधी कठे ऐबे जो मसीह यीसू मन्झ विस्वास करहे, तिन्हा पर सजा रा हुक्म नी आ। 2क्यूंकि पवित्र आत्मा तुस्सा जो जिन्दगी देआ, जो मसीह यीसू रे वखा ले आ, होर आस्सा जो पाप होर मौता ले अजाद करी देणा।
3मूसा री व्यवस्था आस्सो नी बचाई सकदी, क्यूंकि पापा रा स्वभाव व्यवस्था जो कमजोर बणा। पर परमेसरे आपणे मह्ठे जो आस्सा पापी लोका री समानता मन्झ एस संसारा मन्झ भेजी किन्हें होर आस्सा रे पापा रे कठे बलिदान करी किन्हें तिन्हें आस्से बचाई दिते। परमेसरे मसीह रे सरीर मन्झ पापा री सजा रा हुक्म देई दितेया। 4परमेसरे ये इधी कठे कितेया कि आस्सा जो पापी स्वभावा रे मताबक नी, पर पवित्र आत्मा रे मताबक चल्हा ऐं, आस्सा मन्झ व्यवस्था रे धार्मिक बिधिया पूरी हुई जाये। 5क्यूंकि जो पापा रे स्वभावा रे मताबक चल्हा ऐं, स्यों पापमय गल्ला पर ध्यान ल्गाहें; पर जो पवित्र आत्मा रे मताबक चल्हा ऐ, स्यों तिन्हा गल्ला पर ध्यान ल्गाहें जो आत्मा जो खरी लगी।
6इधी कठे अगर आस्से पापा रे स्वभाव रे अधीन आ, ता ये आस्सो मौत वखा जो लेई जाई। पर अगर आस्से पवित्र आत्मा रे अधीन आ, ता ये आस्सा जो जिन्दगी होर सांति देईं। 7क्यूंकि पापा रे स्वभाव रे अधीन हूंणा परमेसरा किन्हें बैर रखणा आ, क्यूंकि पाप रा स्वभाव परमेसर री व्यवस्था रे अधीन नी आ, होर ना ही ये व्यवस्था री गल्ला जो मनी सक्हा। 8क्यूंकि जो पापा रे स्वभाव रे अधीन ऐं, स्यों परमेसरा जो खुस नी करी सक्दे।
9पर जेब्की पवित्र आत्मा तुस्सा मन्झ वास करहा, ता तुस्से पापा रे स्वभाव रे अधीन नी ऐं, पर पवित्र आत्मा रे अधीन ऐं। अगर केसी मन्झ पवित्र आत्मा नीआ, ता से मसीह रा नीआ। 10होर अगर मसीह तुस्सा मन्झ वास करहा आ, ता पापा री वजहा ले सरीरा रे मरणे पर भी पवित्र आत्मा तुस्सा जो जिन्दगी देआ, क्यूंकि तुस्से परमेसरा री नजरा मन्झ धर्मा माह्णुं बणाई गईरे।
11होर अगर परमेसरा री आत्मा जिन्हें यीसू जो मरिरे मन्झा ले जिउंदा कितेया तुस्सा मन्झ वास करहा। जेस परमेसरे मसीहा जो मरिरे मन्झ जिउंदा कितेया तेस आपणी आत्मा रे ज्रीए जो तुस्सा मन्झ वास करही, तुस्सा रे मरणे वाले सरीरा जो भी जिउंदा करणा।
पवित्र आत्मा रे ज्रीए परमेसरा रे बच्चे बणना
12इधी कठे हे भाईयो बैहणो, आस्से पाप रे स्वभाव रे कर्जदार नी ऐं कि, आस्से तेसरे मताबक जिन्दगी जीए। 13क्यूंकि अगर तुस्से पापा रे स्वभाव रे मताबक आपणी जिन्दगी जिंघे, ता तुस्सा मरणा, पर अगर पवित्र आत्मा री सामर्था ले तुस्से आपणे पापा रे स्वभाव री इच्छा जो मारघे, ता जिउंदा रैंह्णां।
14इधी कठे जितने लोक परमेसरा रे आत्मा रे मताबक जीये, स्यों ईं परमेसरा रे बच्चे ऐं। 15क्यूंकि तुस्सा जो गुलामी री आत्मा नी मिलिरी कि, गुलामा साहीं दबारा परमेसरा ले डरे, पर पवित्र आत्मा आस्सो परमेसरा री बच्चे बणाई, जेस ले आस्से परमेसरा जो, “हे बापू, हे बापू,” पुकारी किन्हें बोल्हा ऐं।
16पवित्र आत्मा आपु ई आस्सा री आत्मा साउगी गुआही देहां कि, आस्से परमेसरा रे बच्चे ऐे। 17होर अगर आस्से बच्चे ऐं, ता वारिस भी ऐं, होर परमेसरा रे वारिस होर मसीह रे संगी वारिस ऐं। अगर आस्से मसीह साहीं दुःख सहन करहे ता तेस साउगी आस्से तेसरी महिमा मन्झ भी साझी हुयें।
दुखा ले महिमा तक
18मुंजो पक्का पता कि, जो एस टैम जो दुःख आस्से सहन करहे स्यों तेस महिमा रे साम्हणें कुछ भी नी ऐं, जो परमेसर आस्सा जो देणे वाल़ा आ। 19क्यूंकि सारी रचिरी चीजा बड़ी आसा ले तेस ध्याड़े रा इंतजार करेया करहा ई, जेबे परमेसरा ये जाहिर करी देणा कि तेसरे सच्चे बच्चे कुणहें?
20क्यूंकि परमेसरा री रचिरी सारी चीजे आपणा रचिरा मकसद गुआई दितेया, पर आपणी इच्छा ले नी, पर इधी कठे कि परमेसरे एह्ड़ा कितेया। पर फेरी भी आस्सा जो आस हाई। 21कि परमेसरा रा रचिरी सारी चीजे तेस ध्याड़े रा इंतजार करही जेस ध्याड़े से मौत होर विनासा ले छुटकारा पाई किन्हें परमेसरा री संताना री साउगी महिमामय अजादी रे साझी हूंणा। 22क्यूंकि आस्से जाणहां ऐं कि, आदमा रे पाप करणे रे टैमा ले ऐबे तक परमेसरा री रचिरी सारी चीजे पीड़ा मन्झ करलाया होर तड़फया करहा ई, ठीक जिहां एक जनानिया जो बच्चा जमणे रे पैहले पीड़ा हुई।
23होर सिर्फ परमेसरा री रचिरी चीजे ई नी पर आस्से भी आपणे आपा मन्झ करलाहें हालांकि आस्से मन्झ पवित्र आत्मा वास करहा, जो आऊणें वाली महिमा रा पैहले ले सुआद चखणे रे रूपा मन्झ आस्सा साउगी आ। पर ऐबे आस्से इंतजार करहा ऐं कि परमेसरा आस्से आपणे सच्चे बच्चे बनाणे, होर ये तेबे हूंणा जेबे तेस आस्सा रे सरीरा जो छुटकारा देणा। 24ऐबे परमेसरे आस्सा रा उद्धार कितिरा इधी कठे आस्सा वाले ये आसा ई। पर अगर आस्सा वाले पैहले ले कोई चीज हाई जेसरी आस्से आस रखिरी, ता फेरी आगे जो तेता जो पाणे री आस रखणे री जरूरत नी। क्यूंकि जेस चीजा जो कोई देख्या करहा तेता जो पाणे री आस क्या करणी? 25पर जेस चीजा जो आस्से नी देख्दे, अगर तेता जो पाणे री आस रख्हा ऐं, ता धीरजा किन्हें तेसरा इंतजार भी करहा ऐं।
26होर इंहां ईं पवित्र आत्मा भी आस्सा री कमजोरी मन्झ मदद करहा, क्यूंकि आस्से नी जाणदे कि प्रार्थना किहाँ करणी चहिए। आस्से बयान नी करी सकदे कि किहाँ पवित्र आत्मा आपु ई करलादें हुए आस्सा रे कठे अर्ज करहा। 27होर परमेसर जो सभ कुछ जाणहां से पवित्र आत्मा री मना री गल्ला जो जाणहां। क्यूंकि से पवित्र आत्मा परमेसरा रे पवित्र लोका रे कठे परमेसरा री इच्छा रे मताबक अर्ज करहा।
28होर आस्से जाणहां ऐं कि जो लोक परमेसरा किन्हें प्यार रख्हा ऐं, होर जो परमेसरा री इच्छा रे मताबक चुणिरे तिन्हारे कठे सब गल्ला मिली किन्हें भलाई पैदा करहा ई। 29क्यूंकि जिन्हों परमेसरे पैहले ले चुणी लितिरा तिन्हो आपणे मह्ठे साहीं बणने रे कठे पैहले ले ठैहराई भी आ, ताकि यीसू मसीह परमेसरा रे बाकि संताना रा जेठा बणे। 30फेरी जिन्हा जो तिन्हें पैहले ले ठैहराया, तिन्हा जो चुणिरा भी आ, होर जिन्हों चुणिरा, परमेसरे स्यों आपणी नजरा मन्झ धर्मी माह्णुं भी बणाईरे, होर जिन्हों परमेसरे आपणी नजरा मन्झ धर्मी माह्णुं बणाईरा, तिन्हा जो आपणी महिमा रे साझीदार भी बणाया।
परमेसरा रा अनंत प्यार
31ता आस्से इन्हा गल्ला जो ध्यान रखदे हुए बोली सके कि, अगर परमेसर आस्सा वखा जो आ, ता कोई आस्सा रा व्रोध नी करी सकदा। 32परमेसरे आपणे निज मह्ठे जो भी नी बचाया, पर आस्से सभी रे कठे से व्रोधीया ले पकड़वाया। ता परमेसरे जो कुछ देणे रा वादा आस्सा किन्हें कितिरा से सभ कुछ देणा।
33परमेसरा रे साम्हणें आस्से चुणिरे पर कोई दोस नी लगाई सकदा। क्यूंकि परमेसरे ही आस्सो आपणी नजरा मन्झ धर्मी माह्णुं बणाईरे। 34कोई आस्सा पर सजा रा हुक्म नी देई सकदा। क्यूंकि मसीह यीसू ही से आ जो मरी गया होर मरिरे मन्झा ले भी जिउंदा हुई गया। से परमेसरा रे सीधी वखा जो आ, होर आस्सा रे कठे अर्ज भी करहा।
35कुछ भी आस्सो मसीहा रे प्यारा ले लग नी करी सकदा। ना दुःख, ना संकट, ना उपद्रव, ना अकाल, ना नंगाईया, ना जोख्म, होर ना खतरा ना मौत। 36ये आस्सा साउगी तिहां ही हुआ करेया जिहां दाऊदे पवित्र सास्त्रा मन्झ परमेसरा किन्हें बोल्या,
“हे परमेसर तुस्सा रे कारण आस्सा पर हर टैम मरणे रा खतरा बणी रैंहयां; आस्से मारी जाणे वाली भेडा साहीं समझे जाहें।”
37पर इन्हा सभी गल्ला ले आस्से मसीह रे ज्रीए जिन्हें जे आस्सा किन्हें प्यार कितेया, जयवन्ता ले भी बढ़ी किन्हें आ। 38-39क्यूंकि हांऊँ पक्का जाणहां कि, आस्सो परमेसरा रे प्यारा ले कोई लग नी करी सकदा, जो आस्सा रे प्रभु मसीह यीसू रे ज्रीए जाहिर हुईरा। चाहे आस्से मरी जाए, या जिउंदे रहे तेता ले कोई फर्क नी आ; ना स्वर्गदूत, ना प्रधानतायें, ना वर्तमान, ना भविस्य, ना सामर्थ, ना ऊंचाई, ना गैहराई होर ना कोई होर रचिरी चीजा आस्सो परमेसरा रे प्यारा ले लग करी सकी।
Currently Selected:
रोमियो 8: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
