रोमियो 7
7
सादीसुधा जिन्दगी ले उदाहरण
1हे भाईयो बैहणो, तुस्से बिधियो जो जाणांहे कि जेबे तक माह्णुं जिउंदा रैंहयां, तेबे तक ही मूसा री व्यवस्था रा हक तिन्हारा पर रैंहयां।
2-3उदाहरणा रे कठे बिधि रे मताबक एक जन्नानी आपणे लाड़े किन्हें जिन्दे जी तेस किन्हें बझीरी। पर जेबे तेस्सा रा लाड़ा मरी जां, ता से केसी होरी किन्हें ब्याह करणे रे कठे अजाद ई। हालांकि अगर लाड़े रे जिन्दे जी से केसी दूजे माह्णुं वाले चली जाईं, ता तेस्सा जो व्यभिचारणी बोल्या जां।
4ता हे मेरे भाईयो होर बैहणो, जेबे तुस्से मसीह साउगी मरी गये तेबे तुस्से व्यवस्था रे कठे मरिरे बणी गये, ताकि तुस्से मसीह रे हुई जाओ, जो मरिरे मन्झा ले जिउंदा हुई गईरा। होर तुस्से परमेसरा री सेऊआ करी सके। 5क्यूंकि जेबे आस्से पापा रे स्वभावा रे अधीन थे, ता व्यवस्था सक्ति पाई किन्हें आस्सा री पापा री इच्छा जो बढ़ाई देईं थी, जो मौता वखा जो लेई जाईं थी।
6जेस व्यवस्था री कैदा मन्झ आस्से थे तेता रे कठे आस्से मरी गये। होर ऐबे व्यवस्था ले छुटी गये ताकि ऐबे आस्से पवित्र आत्मा रे मताबक नौंईं रीती किन्हें परमेसरा सेऊआ करी सके, ना कि तेस्सा पुराणी रीती पर जेबे आस्से लिखिरी व्यवस्था जो मन्ने थे।
मूसा री व्यवस्था होर पाप
7ता आस्से क्या बोलिए? क्या मूसा री व्यवस्था पाप ई? नी कधी नी! पर ये व्यवस्था ई थी जिन्हें मेरे पाप मेरे पर जाहिर किते। अगर व्यवस्था मन्झ ये नी लिखिरा हुंदा कि, “लालच मत कर, ता हांऊँ नी जाणी पांदा कि लालच करणा पाप आ।” 8पर पापे मौका पाई किन्हें हुक्मा रे ज्रीए मेरे मन्झ सभ किस्मा रा लालच पैदा कितेया, क्यूंकि मूसा री व्यवस्था रे बगैर पाप मुर्दा आ।
9एक टैम था जेबे हांऊँ बगैर मूसा री व्यवस्था जाणे जिया था, पर जेबे हांऊँ व्यवस्था जो जाणी गया, ता पाप मेरे पर असर करदा लगेया, होर एता ले एह्ड़ा लगेया कि हांऊँ मरी गया। 10होर जिन्हा हुकमा जो परमेसरे दितिरा था कि हांऊँ जिउंदा रहूँ, से ही मुंजो मरणे री सजा देई गई।
11क्यूंकि पापे मौका पाई किन्हें हुक्मा रे ज्रीए हांऊँ धोखा दितेया, होर एह्ड़ा लगा कि एता रे ज्रीए हांऊँ मरी ही गया। 12इधी कठे आस्से बोली सके कि मूसा री व्यवस्था पवित्र ई, होर हुक्म भी पवित्र, धर्मी होर खरा आ।
पापा ले बचाणे मन्झ व्यवस्था नाकामयाब
13ता क्या से व्यवस्था जो खरी, मेरे मरणे री वजहा बणी? नी कधी नी! पापे ही एह्ड़ा कितेया। पापे ही तेस व्यवस्था जो लेई किन्हें जो खरी, मुंजो मौत देई गई। एह्ड़ा करणे ले पापे जाहिर कितेया कि तेसरी असलीयत क्या ई, होर हुक्मे ये जाहिर कितेया कि पाप बौह्त ज्यादा बुरा। 14क्यूंकि आस्से जाणहां ऐं कि मूसा री व्यवस्था ता आत्मिक ई, पर हांऊँ सिर्फ एक माह्णुं आ होर पापा रा गुलाम आ।
15होर जो कुछ हांऊँ करहा, तेता जो हांऊँ नी समझ्दा, होर जो कुछ हांऊँ करणा चाहां, से हांऊँ हमेसा नी करदा, होर जेस चीजा ले मुंजो नफरत हुंहाँ ईं, सेई चीज हांऊँ हमेसा करहा। 16होर अगर जो हांऊँ नी चाहन्दा स्यों ही बुरे काम करहा, ता हांऊँ मनी लैहां कि, मूसा री व्यवस्था खरी ई।
17ता एह्ड़ी हालता मन्झ जो तेस बुरे काम जो करहा से हांऊँ नी, पर जो मेरे अंदर पाप बस्सिरा से ही करहा। 18क्यूंकि हांऊँ जाणहां कि, जो पापा रा स्वभाव मेरे मन्झ आ से कोई खरी चीज नी करदी, भले काम करणे री इच्छा ता मेरे मन्झ हाई, पर खरे काम मेरे ले बणदे।
19क्यूंकि जेस खरे कामा करणे री इच्छा हांऊँ करहा, से ता हांऊँ नी करदा, पर जेस बुराई रे काम करणे री इच्छा हांऊँ नी करदा सेई हांऊँ करदा रैंहयां। 20पर अगर हांऊँ तेह्ड़ा ई करहा जेसरी इच्छा हांऊँ नी करदा, ता तेता रा करणे वाल़ा हांऊँ नी हाया, पर पाप जो मेरे मन्झ बस्सिरा। 21एस वजहा ले मुंजो एस सच्च रा पता लगा कि, जेबे हांऊँ भलाई करणे री इच्छा करहा, ता हांऊँ बुरा ही करहा।
22क्यूंकि हांऊँ पूरे दिला ले ता परमेसरा री व्यवस्था पर खुस रैंहयां। 23पर मुंजो आपणे सरीरा रे अंगा मन्झ पापा रा स्वभाव सुझ्हा, जो परमेसरा री व्यवस्था किन्हें लड़हा, होर ये पापा रा स्वभाव जो मेरे सरीरा मन्झ बस्सिरा से मुंजो आपणा कैदी बणा।
24हांऊँ केह्ड़ा बदनसीब माह्णुंआं! कोस हांऊँ एस सरीरा मन्झ बस्सिरे पापा रे स्वभावा ले बचाणा जो मौत लेई आहूँआं? 25हांऊँ परमेसरा रा धन्यावाद करहा जिन्हें प्रभु यीसू मसीह रे ज्रीए हांऊँ बचाया, सारा मतलब ये आ कि हांऊँ आपणे दिला ले चाहां कि परमेसरा री व्यवस्था जो मन्नू, पर पापा रे स्वभावा री वजहा ले हांऊँ पापा रा गुलाम आ।
Currently Selected:
रोमियो 7: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
