रोमियो 14
14
अजादी री बिधिया
1विस्वासा मन्झ कमजोर आदमी जो तेसरे व्यक्तिगत राय पर बगैर सक करी किन्हें अपनाई लो। 2क्यूंकि एकी जो विस्वास आ कि, सभ कुछ खाणा ठीक आ, पर जो विस्वासा मन्झ कमजोर आ, से साग-सब्जी ई खांहां।
3से, जे माह्णुं सब कुछ खांहां तेजो नीची नजरा ले नी देखा, जो सब कुछ नी खांदा; एस तरीके ले, से जे सब कुछ नी खांदा, तेस पर दोस नी लगाए जो सब कुछ खांहां, क्यूंकि परमेसरे तिन्हा दुहीं जो अपनाहां। 4परमेसर आस्सा सभीरा माल्क आ, होर आस्से सब तेसरे सेऊआदार ऐं होर तू परमेसरा रे दूजे सेऊआदारा पर दोस नी ल्गाई सकदा। तेसरा मजबूत रैंह्णां या पई जाणा तेसरे माल्का पर निर्भर करहा, जेब्की से मजबूत करी दितेया जाणा; क्यूंकि परमेसर तेस जो मजबूत करी सक्हा।
5एस तरीके ले कुछ लोक एक ध्याड़े जो दूजे ले बढ़ी किन्हें मन्हें, होर कोई सभ ध्याड़े जो एकी साहीं मन्हें। होर आपणे मना मन्झ पक्का करी लेया कि से जे सोची करहा से ठीक आ। 6जो माह्णुं केसी ध्याड़े जो मन्हां, से प्रभु जो इज्जत देणे रे कठे मन्हां। होर जो सभ कुछ खांहां, से प्रभु जो इज्जत देणे रे कठे खांहां, क्यूंकि से परमेसरा रा धन्यावाद करहा। होर जो साग-पात खांहां, से भी प्रभु जो इज्जत देणे रे कठे खांहां, होर से भी परमेसरा रा धन्यावाद करहा।
7-8क्यूंकि आस्से सभ आपणे प्रभु रे, अगर आस्से जिउंदे रहे या मरी भी जाये ता ये आस्सा रे प्रभु री इज्जत रे कठे, ना कि आपणी इज्जत रे कठे। 9मसीह इधी कठे मरेया होर दबारा जिउंदा भी हुई गया कि, मरिरे होर जिउंदे लोक दुंहें यीसू मसीह जो ही प्रभु मने।
10तू तुस्से आपणे विस्वासी भाई होर बैहणा पर किधियो दोस ल्गाहां? या तू फेरी किधियो आपणे विस्वासी भाई होर बैहणा जो निचा बोल्हा? परमेसरा आस्सा सभीरा न्याय करणा। 11क्यूंकि पवित्र सास्त्रा मन्झ लिखिरा,
“प्रभु बोल्हा, मेरी जिन्दगी री कसम कि हर एक माह्णुंआं मेरे साम्हणें घुटना टेकणा,
होर हर एक माह्णुंआं परमेसरा रा अंगीकार करणा।”
12ता फेरी आस्सा सभी जो आपणे-आपणे कामा रा लेखा परमेसरा जो देणा पऊणा।
13ता अगे जो आस्से एक दूजे पर दोस नी लगाए पर तुस्से येई ठाणी लऊआ कि तुस्सा री वजहा ले कोई विस्वासी भाई होर बैहण पाप करहे या परमेसरा पर विस्वास करणा ना छाडी दे।
प्यारा री बिधिया
14हांऊँ जाणहां, होर प्रभु यीसू री तरफा ले मुंजो पक्का हुईरा कि, कोई खाणा आपणे आपा ले असुद्ध नी ई, पर जो केसी खाणे जो असुद्ध समझ्हा, तेसरे कठे से खाणा असुद्ध ई। 15अगर तेरा भाई या बैहण तुस्सा रे खाणे रे वजहा ले दुःखी हुंहाँ, ता तेरे बर्ताव मन्झ प्यारा नी आ। क्यूंकि तुस्सा रे खाणे री वजहा ले अगर कोई भाई होर बैहण परमेसरा जो मनणा छाडी दे ता तू तेस खाणे जो मत खा। मसीह तिन्हा विस्वासी भाई होर बैहण रे कठे भी मरीरा।
16अगर तुस्सा रे विचार ले कोई काम सही आ, पर दूजा तेजो गलत समझा ता तेस कामा जो करणा छाडी दे। 17क्यूंकि परमेसरा रे राजा मन्झ खाणा पीणा बडा नी आ; एता रे बजाय, परमेसरा री नजरा मन्झ धर्मी माह्णुं बणना, सांति होर पवित्र आत्मा मन्झ खुसी, ये गल्ला बडी ई।
18जो कोई इंहां मसीह री सेऊआ करहा ता परमेसरा तेस ले खुस हुई जां होर माह्णुं भी तेसरे बारे मन्झ खरा बोल्हा। 19इधी कठे आस्से तिन्हा कामा जो करणे री कोसिस करहे जेस ले लोक एक दूजे किन्हें सांति किन्हें रहे, होर एक दूजे रे विस्वासा जो मजबूत करी सके।
20तुस्से जेहड़ा खाणा, खाणा चाहें तेता री वजहा ले परमेसरा रा काम नी बगाड़ा; खाणे मन्झ सब कुछ सुद्ध ता हाया, पर तुस्से जो खाएं तेस वजहा ले कोई होर परमेसरा पर विस्वास करणा छाडी दे, ता से गल बुरी ई।
21खरा ता ये आ कि, तू ना मास खाए, होर ना अंगूरा रा रस पिये, ना होर कुछ एह्ड़ा करहे, जेस ले तेरा भाई या बैहण परमेसरा पर विस्वास करणा छाडी दे।
22तेरा इन्हा गल्ला जो लेई किन्हें जो विस्वास हो, से तेरे होर तेरे परमेसरा रे बीचा री गल ई। धन्य आ से, जो तेस गल्ला मन्झ, जेस जो से सही समझ्हा, से तेस गल्ला रे कठे आपणे आपा जो दोसी नी मनदा। 23पर अगर तुस्सा रे मना मन्झ सक आ कि क्या खाणा या नी खाणा, पर फेरी भी खाई ले ता तुस्से पाप करहे, क्यूंकि तुस्से आपणे विस्वासा रे मताबक नी करदे। होर अगर तुस्से एह्ड़ा काम करहे जेस पर तुस्सा जो विस्वासा आ कि से सही नी आ, ता से पाप आ।
Currently Selected:
रोमियो 14: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
