रोमियो 13

अधिकारिया रे अधीन हूंणा

1हर एक माह्णुं तिन्हारे सासन करणे वाले अधिकारिया रे अधीन रहे; क्यूंकि कोई हक एह्ड़ा नी आ, जो परमेसरा री तरफा ले नी हो; होर जो लोक हाल्ले हक मन्झ ऐं, स्यों परमेसरा रे ज्रीए ही नियुक्त किते गईरे। 2इधी कठे अगर कोई तिन्हारा विरोध करहा जिन्हों सासन करणे रे हक दितिरे, ता से परमेसरा रे नियमा रा विरोध करहा, होर विरोध करणे वाले सजा पाणी।

3अगर कोई खरे कामा करहा, ता तेजो अधिकारी रा डर नी आ अगर बुरा करहा ता तेबे तेजो डर मन्ना चहिए। अगर तू अधिकारी ले बेखौफ रैंह्णां चाहां, ता खरा काम कर होर तेस तेरी तारीफ करणी; 4जो सत्ता मन्झ बैठिरे अधिकारी ऐं स्यों तुस्सा री भलाई रे कठे परमेसरा रे ज्रीए नियुक्त किते गईरे सेऊआदार ऐं। पर अगर तू बुरे काम करहे, ता डर; क्यूंकि तिन्हा वाले तुजो सजा देणे रा हक आ। स्यों सेऊआदार परमेसरा रे ज्रीए नियुक्त किते गईरे ताकि स्यों बुरे काम करणे वाले जो सजा देई सके। 5इधी कठे तिन्हारे अधीन रैंह्णां जरूरी आ, ना सिर्फ सजा रे डरा री वजहा ले, पर इधी कठे भी कि तुस्से आपणी अंतरात्मा रे साम्हणें सच्चे रही सको।

6इधी कठे तुस्से अधिकारिया जो कर भी देआ, क्यूंकि स्यों परमेसरा रे सेऊआदार ऐं, होर हमेसा आपणी जिम्मेदारी जो पूरा करणे मन्झ लगिरे रैंहयां ऐं। 7इधी कठे हर केसी जो जितना तिन्हारा हक आ, तितना देणा जरूरी आ, होर सब प्रकारा रे करा जो भरी देआ; होर तिन्हा अधिकारिया रा डर मनी किन्हें तिन्हारा आदर करा।

एक दूजे किन्हें प्यार

8एकी दूजे किन्हें प्यार करणे रे अलावा तुस्से केसी होरी गल्ला मन्झ केसी रा भी कर्जदार मत बणा, क्यूंकि जो दूजे किन्हें प्यार रख्हा, तिन्हें ई परमेसरा री दितिरी व्यवस्था री सारे हुकमा जो पूरा कितेया। 9क्यूंकि मूसा री व्यवस्था मन्झ एह्ड़े कई सारे हुक्म दितिरे जिहां कि, “व्यभिचार नी करणा, हत्या नी करणा, चोरी नी करणा, लालच नी करणा।” होर इन्हारे अलावा होर सारे हुक्म भी ऐं, ता सभिरा न्चोड़ एस हुक्मा मन्झ पाया जाहाँ कि, “आपणे पड़ोसी साउगी आपणे साहीं प्यार रखा।” 10अगर तुस्से आपणे पड़ोसी किन्हें प्यार करहे ता तेसरी बुराई नी करदे, इधी कठे जो प्यार करहा से परमेसरा री दितिरी व्यवस्था री गल्ला जो पूरी करहा।

टैम नेडे आ

11परमेसरा रा आस्सा जो एस बुरे संसारा ले उद्धार करणे रा टैम नेडे आ, होर इन्हा गल्ला जो जाणी किन्हें एक दूजे किन्हें प्यार करहा। क्यूंकि आस्से जेबे पैहली बारी विस्वास कितेया था, तेबे ले आस्सा रा उद्धार रा टैम होर भी नेडे आ। इन्हा गल्ला जो समझ्दे हुए निंद्रा ले जागिरे लोका साहीं त्यार होर चौकन्ने रहूआ। 12एह्ड़ा लगहा कि रात बौह्त बीती गईरी हो, होर ध्याड़ा निकलणे वाल़ा आ, होर मसीह रा वापस आऊणें रा ध्याड़ा नेडे आ; इधी कठे लोक नह्यारे मन्झ रही किन्हें जो बुरे कामा जो करहे तिन्हो छाडी दे, होर प्रयासे मन्झ रही किन्हें बुरे कामा ले लड़ने रे कठे हथियार बान्ही लऊआ।

13होर आस्सो एह्ड़े जीणा चहिए जिहां आस्से ध्याड़ीया रे प्रयासे मन्झ जीणे वाले, ना कि न्याहरे मन्झ रही किन्हें बुरे काम करी किन्हें जीणे वाले। इधी कठे आस्सा मन्झ रंगरलिया, पी किन्हें मुतालणा, व्यभिचार, लुचपना, झगड़े होर जल्नी नी हूणीं चहिए। 14बल्की प्रभु यीसू मसीह रूपी हथियार जो पैन्ही लऊआ, ता तुस्सा पाप रे स्वभावा री इच्छा जो पूरी करणे री कोसिस नी करणी।

Currently Selected:

रोमियो 13: MJLNT

Highlight

Compare

Copy