रोमियो 12
12
परमेसरा जो जिउंदा बलिदान
1इधी कठे हे भाईयो होर बैहणो, हांऊँ तुस्सा किन्हें परमेसरा री दया याद दिलाई किन्हें बिनती करहा कि आपणे आपा जो ही जिउंदे होर पवित्र, होर परमेसरा जो खुस करणे वाले बलिदान रे रूपा मन्झ चढ़ाऊआ; येई परमेसरा री अराधना करणे रा सच्चा तरीका आ। 2होर एस संसारा रे लोका साहीं नी बणा; पर परमेसर तुस्सा री सोचा जो बदली दे, जेस ले तुस्सा री जिन्दगी भी बधली जाए। तेबे तुस्से, तुस्सा रे कठे परमेसरा री जो खरी, होर खुस करणे वाली, होर सिद्ध इच्छा जो आपणे अनुभवा ले जाणी लेणा।
आत्मिक वरदाना ले परमेसरा री सेऊआ
3क्यूंकि हांऊँ तेस अनुग्रहा री वजहा ले जो मुंजो मिलीरा, तुस्सा मन्झा ले हर एकी किन्हें बोल्हा कि, जेह्ड़ा समझणा चहिए, तेता ले बढ़ी किन्हें कोई भी आपणे आपा जो नी समझे। एता रे बजाय खरी समझ रखी किन्हें होर परमेसरे जितना विस्वास तुस्सा जो दितिरा तेसरे ही मताबक आपणे आपा जो समझा। 4क्यूंकि जिहां आस्सा रे सरीरा मन्झ बौह्त सारे अंग ऐं, होर सभ अंगा रा काम एकी साहीं नी आ। 5तिहां ईं आस्से जो मसीह मन्झ विस्वासी ऐं, आस्से सब मसीह रे सरीरा रे अंग ऐं, होर आस्से सभ एक दूजे किन्हें जुड़ीरे भी ऐं।
6होर जेब्की तेस अनुग्रहा रे मताबक जो परमेसरे आस्सा जो दितिरा, आस्सा जो लग-लग दान मिलिरा। जेस जो परमेसरे भविस्यवाणी करणे रा दान दितिरा, से तिन्हा ही गल्ला जो बोले जेस पर तेजो विस्वासा कि परमेसरे तेस किन्हें बोलिरी। 7अगर एक दूजे री सेऊआ करणे रा दान मिलिरा हो, ता सेऊआ मन्झ लगिरे रहो, अगर कोई स्खाणे रा दान मिलिरा हो, ता स्खाणे मन्झ लगिरे रहो। 8होर अगर होंसला देणे रे दान मिलिरा हो, से होंसला देणे मन्झ लगिरा रहे; होर अगर जरूरत मंद लोका जो मदद करणे रा दान मिलिरा हो, से पुरे मना ले करहे। होर अगर परमेसरे तुस्सा जो अगुवाई करणे रे दान दितिरा हो, ता से तेस जिम्मेदारी जो खरे ढंगा किन्हें निभाए, होर अगर दया करणे रा दान मिलिरा हो, ता से खुसी किन्हें करहे।
मसीही व्यवहार
9केसी से प्यारा करणे रा ढोंग मत करहा; बुराई ले नफरत करहा; भले करणे मन्झ लगे रहूआ। 10एक दूजे किन्हें एह्ड़ा प्यार करहा जिहां से तुस्सा रा सक्का भाई बैहण हो; लगातार आदर करणे मन्झ एक दूजे ले बढ़ी चला।
11खूब मेहनत करहा पर आलसी मत बणा, जोसा मन्झ भर्ही किन्हें परमेसरा री सेऊआ करदे रहुआ; होर पुरे मना किन्हें करदे रहुआ। 12खुस रैहया क्यूंकि तुस्सा वाले बौह्त बड़ी आस ई; दुःखा मन्झ सबर रखा; प्रार्थना मन्झ लगातार लगी रैहया। 13परमेसरा रे पवित्र लोका जो जिन्हा चीजा री कमी हो, तेता जो पूरी करणे मन्झ तिन्हारी मदद करा; अजनबीया#12:13 मसीह प्यारा जो दसणे रे कठे सफर करी किन्हें सेऊआ करणे वाले मसीही अजनबीया जो आपणे घरा मन्झ रखणे रा रुआज था, क्यूंकि तिन्हा ध्याड़े मन्झ सरांय नी हुन्दी थी होर एह्ड़ी जगहा मन्झ रैहणा खतरनाक हुआ था रा आदर-खातर करणे मन्झ लगी रैहया।
14आपणे सताणे वाले जो स्राप नी देआ पर आसरीवाद देआ। 15खुसी मनाणे वाले साउगी खुसी मनाऊआ होर रोणे वाले साउगी रोआ। 16आपु मन्झ एकता रखा; बडयाई करणे वाले नी बणा; पर नम्र दीन लोका साउगी संगती रखा; आपणी नजरा मन्झ बुद्धिमान मत बणा।
17बुराई रे बदले केसी किन्हें बुराई नी करा; जो गल्ला सभी लोका रे कठे खरी ई, तिन्हा गल्ला री फिकर करा। 18जेथी तक हुई सको, सभ माह्णुं साउगी तुस्से मेल मिलाप रखा।
19हे लाडले भाईयो होर बैहणो, “आपणा बदला आपणे आप नी लैणा; पर परमेसरा जो तुस्सा रा बदला लेणा” क्यूंकि पवित्र सास्त्रा मन्झ प्रभु बोल्हा, “बदला लैणा मेरा काम आ, मां बदला चुकाणा।”
20क्यूंकि पवित्र सास्त्रा मन्झ ये भी लिखिरा,
“पर अगर तेरा दुस्मण भूखा हो ता तेस जो खाणा खुआऊआ;
होर अगर से प्यासा हो, ता तेस जो पाणी प्याऊआ;
क्यूंकि एह्ड़ा करणे ले तेस सर्मिन्दे हुणा।”
21बुराई ले मत हारा पर भलाई किन्हें बुराई जो जीती लऊआ।
Currently Selected:
रोमियो 12: MJLNT
Highlight
Share
Compare
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
