फिलिप्पियां 2

मसीह री दीनता कने महानता

1जे मसीह च तुहांरा कोई उत्साह हया, कने जे तिसरे प्यारा ते कोई सुख आ, जे पवित्र आत्मा सौगी तुहांरी संगती हई, कने जे मसीह तुहांरे प्रति कोई करुणा कने दया दस्सी, 2तां इक मन रैईने कने इक इ प्रेम, कने मना च इक हुईने कने इक इ मकसद रखीने मेरा ये आनन्द पूरा करा। 3हिरख कने घमण्डा ने किछ बी मता करदे, बल्कि नम्र बणा कने दुज्जेयां जो अप्पूँ ते खरा समझा। 4हर इक्की जो सिर्फ ये नीं सोचणा चाहिन्दा भई तिसरे खातर क्या भला, पर हरेक जो ये बी सोचणा चाहिन्दा भई दुज्यां रे खातर क्या भला। 5तेढ़ा जे यीशु मसीह रा स्वाभाव था तुहांरा स्वाभाव बी तेढ़ा इ हूणा चाहिन्दा;

6भले इ परमेशरा साई तिसरा स्वाभाव था,

फेरी बी तिने परमेशरा रे बराबर हुणे री सारी शक्तियां कने अपणे खास अधिकाराँ जो रखणे पर जोर नीं दित्या।

7बल्कि तिने त अपणा सब किछ त्याग करीने इक सेवका रा रुप धारील्या,

कने माहणुये साई छोट्टा बणीग्या।

8कने तिने माहणुये रे रुपा च प्रगट हुईने अप्पूँजो नम्र कित्या कने परमेशरा रा आज्ञाकारी हुईने सै मरने रे खातर त्यार हुआ,

कने अपराधिये साई क्रूसा पर मरया।

9इस खातर परमेशरे तिस्सो सब्बींते ऊच्ची पदवी दित्ति

कने तिस्सो सै नौं दित्या तिसरा जे सारयां नौंवां ते जादा आदर कने अधिकार आ।

10ताकि सब प्राणी यीशुये रा आदर करने खातर गोडयां रे भार झुको,

चाये सै स्वर्गा रे हो, चाये धरतिया परा रे, या धरतिया रे थल्ले रे हो।

11कने सारे लोक पिता परमेशरा री महिमा रे खातर सारे लोक स्वीकार करो भई यीशु मसीह इ प्रभु आ।

संसारा च जोतिया साई चमको

12इस खातर मेरे प्यारे मित्रो, ताहली जे हऊँ तुहांजो सौगी था ताहली तियां जे तुहें हुक्मां रा पालन कित्या, हुण ताहली जे भई हऊँ तुहां सौगी निआं तां तुहें होर जादा लगना ने तिन्हांरा पालन करा। परमेशरा रे प्रति पूरे आदर भावा ने अपणे छुटकारे जो पूरा करने रे खातर तुहें लोक काम्म करदे जावा। 13काँह्भई परमेशर इ तुहां च काम्म करया राँ कने सैई तुहौं परमेशरा जो खुश करने री इच्छा कने शक्ति देईराँ। 14सारे काम्म बिणा कोई शकैत या लड़ाई झगड़ा कित्ते बगैर करदे रौआ, 15ताकि तुहें निर्दोष कने पवित्र बणी जाओ, कने इस टेढे-मेडे कने अड़ियल लोकां रे बिच परमेशरा रे निर्दोष बच्चे बणी जावा, तिन्हांरे बिच तुहें जीवन देणे औल़ा वचन लेईने संसारा च बल़दे दीपकां साई दिस्या कराँ ये, 16भई ताहली जे मसीह वापस औणा तां मेरा घमण्ड करने री वजह ये हूणा भई मेरी मेहणत कने मेरा प्रयास बेकार नीं हुया। 17जे मिन्जो तुहांरे विश्वास रुपी बलिदान्ना कने सेवा सौगी अपणा खून बी बहाणे पौ तां बी मिन्जो खुशी हूणी, कने तुहां सब्बीं सौगी मौज कराँ। 18इयां इ तुहें बी खुश रौआ कने मेरे सौगी मौज करा।

तिमुथियुस कने इपफ्रुदीतुस

19मिन्जो प्रभु यीशुये च आशा इ भई हऊँ तिमुथियुस जो तुहांले जल्द भेजगा, ताकि तुहांरे बारे च खबर सुणीने हऊँ उत्साहित हुई सक्कूँ। 20काँह्भई मेरले तिमुथियुस साई कोई होर माहणु निआं सै जे हकीकत च तुहांरे कल्याण री परवाह कराँ। 21काँह्भई यीशु मसीह क्या चाँह इस बारे च सोचणे रे वजाये हरेक माहणु सिर्फ येई सोच्चां भई सै खुद क्या चाँह। 22तुहें तिसरे चरित्रा जो जाणाँ ये भई खुशखबरिया रे प्रचारा च मेरे सौगी तिने तियां इ सेवा कित्तिरी, तियां जे इक वेटा अपणे पिता सौगी कराँ। 23हऊँ आशा कराँ भई तियां जे मिन्जो पता लगी जो भई मेरने क्या हुणे औल़ा, तां मांह तिस्सो इकदम तुहांले भेजी देणा। 24कने मिन्जो प्रभुये च भरोसा भई मांह खुद तुहांले जल्दी औणा।

25हऊँ ये जरूरी समझां भई इपफ्रदीतुस जो तुहांले भेज्जूँ सै जे मेरा भाई कने मेरे सौगी काम्म करने औल़ा, कने सै जे मेरे सौगी इक सैनका साई आ, सै जे तुहांरा बी सनेहा देणे औल़ा, तिस्सो जे तुहें मेरियां जरूरतां रा ख्याल रखणे रे खातर मेरले भेज्या था। 26काँह्भई सै तुहां सब्बीं जो देखणा चाँह था, इसा वजह ते सै परेशान था, काँह्भई तुहें सुणया था भई सै बमार था। 27हाँ, सै बीमार त था, कने सै बी इतणा भई तियां जे मरने इ औल़ा था, पर परमेशरे तिस्सो दया करीने ठीक कित्या, सिर्फ तिस पर इ नीं बल्कि माह पर बी दया कित्ती ताकि हऊँ पैहले ते दुखी हुणे ते जादा दुखी न हुई सक्कूँ। 28इस खातर हऊँ तिस्सो तुहांले भेजणे जो बौहत उत्सुक आ भई ताहली जे तुहें तिसजो देक्खो तां इक बार भीं खुश हुई सक्को कने मेरी चिन्ता घटी जो। 29इस खातर तुहें प्रभु च तिसरा बड़िया खुशिया ने स्वागत करा कने येढ़े लोकां रा आदर करदे रैहणा चाहिन्दा। 30तिने मसीह रे कम्मां खातर मौती रा सामणा कित्या कने अपणिया जिन्दगिया जो खतरे च पाईत्या ताकि सै सहायता जे तुहें खुद मिन्जो नीं देई सक्के, तिस्सो इपफ्रदीतुस पूरा करी सक्को।

Currently Selected:

फिलिप्पियां 2: KFSNT

Highlight

Copy

Compare