गलातियां 4

1हऊँ ये बखान करगा: तदुआं तक जे इक बालक अपणे पिता रिया जायदाता रा वारस हूणा, पर तदुआं तक जे सै बालक आ सै इक्की दास्सा साई आ, हलाँकि सै सारियां चीजां रा स्वामी आ। 2सै पिता रे जरिये तैह वगता तक देखभाल करने औल़े कने जाँचणे औल़े रे अधीन रैआं।

3तियां इ अहें बी, ताहली जे बच्चयां साई थे, तां दास्सां साई संसारा रे बेकार नियमां रा पालन कराँ थे। 4पर ताहली जे सही बगत आया, तां परमेशरे अपणे पुत्रा जो भेज्या सै जे औरता ते जम्मीरा, कने व्यवस्था रे अधीन जीआ। 5ताकि सै व्यवस्था रे अधीन जीणे औल़े माहणुआं जो छडवाई सक्को, तिसते जे अहें परमेशरा रे गोद लेईरे बच्चे बणी सक्को।

6काँह्भई तुहें परमेशरा रे बच्चे हो, इस खातर परमेशरे अहांरे दिलां च अपणे पुत्रा री आत्मा भेज्जी, सैई आत्मा परमेशरा जो “हे अब्बा, हे पिता, बोलीने पुकाराँ।” 7इस खातर हुण तुहें दास नींये, पर परमेशरा रे पुत्र ये; कने काँह्भई तुहें पुत्र ये, तां परमेशरे तुहांजो वारस बी बणया।

गलातियां रे बारे च पौलुसा री चिन्ता

8पैहले तुहें लोक तां जे परमेशरा जो नीं जाणदे थे, तां तिस वगत तुहें येढ़े देबतयां रे दास थे सै जे हकीकत च परमेशर नीं थे। 9पर हुण परमेशरा सौगी तुहांरा रिश्ता, कने मिन्जो बोलणा चाहिन्दा भई परमेशरे तुहां सौगी रिश्ता बनाणे च पैहल कित्ती, तां तुहें तिन्हां कमजोर कने नकम्मी परम्परा खा जो कजो वापस जाया राँये? क्या तुहें भीं ते तिन्हांरे दास बणने री इच्छा कराँ ये?

10अन्यजाति लोको तुहें परमेशरा जो खुश करने खातर यहूदियां रे खास दिनां, महीनयां, ऋतुआं कने बर्षां जो मन्नां ये। 11तुहांरे बारे च हऊँ चिन्तित आ भई तुहांरे खातर सै जे काम्म मैं कित्तिरा, सै किति सारा वेकार त नीं हुईगरा।

12मेरे साथी विश्वासियो हऊँ तुहांजो विनती कराँ भई अप्पूँजो व्यवस्था ते लग करा तियां जे मैं कित्ती रा, काँह्भई हऊँ व्यवस्था ते तुहां साई अजाद हुईरा। तुहें मेरा किछ बगाड़ीरा नींआ। 13तुहौं त याद हूणा भई हऊँ अपणे शरीरा री कमजोरिया रिया वजह ने पैहली बार तुहांले आया कने खुशखबरी सुणाई। 14हलांकि मेरे शरीरा री कमजोरी तुहांरे खातर समस्या बणी, फेरी बी तुहें मिन्जो छोट्टा नीं समझया कने नांई माहने कोई नफरत कित्ती, बल्कि तुहें परमेशरा रे दूता रे रुपा च मेरा स्वागत कित्या, मन्नो हऊँ खुद मसीह यीशु इ था।

15तिस वगत तुहें बौहत खुश थे! हुण तुहांरिया तिसा खुशिया जो क्या हुया? हऊँ तुहांरे खातर खुद इसा गल्ला रा गवाह भई जे मुमकिन हुन्दा, तां तुहें अपणियां आक्खीं बी नकाल़ीने मिन्जो देई देन्दे। 16तां क्या तुहांजो सच्च बोलणे रिया वजह ने हऊँ तुहांरा दुश्मण हुईगरा?

17व्यवस्था पर चलाणे औल़े तुहां च बौहत गैहरी रुची लें, पर तिन्हांरा मकसद ठीक निआं। सै तुहांजो माह्ते लग करना चाँये, ताकि तुहें तिन्हांरे चेले बणी जाओ। 18कोई किसी च हमेशा गैहरी रुची लेन्दा रौओ, येत इक खरी गल्ल इ, पर ये किसी खरे खातर हूणा चाहिन्दा, कने सिर्फ तिस इ बगत नीं, ताहलियां तक जे हऊँ तुहां सौगी आ।

19मेरे प्यारे बच्चो, तियां जे इक औरत बच्चा जणने रे वगत पीड़ा जो अनुभव कराँ इ, तियां इ हऊँ भीं तुहांरे खातर इक बार पीड़ सैईराँ। मांह तिसा पीड़ा च तदुआं तक रैहणा तदुआं तक जे तुहें पूरे तरिके ने मसीह साई नीं बणी जान्दे। 20हऊँ चाँह भई हुण तुहांले आई पुज्जुँ कने तुहांजो लग तरिके ने गल्ल-बात करूँ, काँह्भई हऊँ नीं समझी पाईराँ भई तुहांजो क्या बोलूं।

सारा कने हाजिरा रा उदाहरण

21व्यवस्था रे अधीन रैहणे औल़यां ते हऊँ पुछणा चाँह; क्या तुहें नीं सुणदे भई व्यवस्था क्या बोलां इ? 22पवित्रशास्त्रा च लिखिरा भई अब्राहम रे दो पुत्र थे, इक्की रा जन्म दासिया ते हुया था कने दुज्जे रा जन्म अजाद जनाना ते हुया था। 23पर सै जे दासिया ते जम्मया, सै माहणुये रिया सोच्चा रे मुतावक जम्मया; कने सै जे अजाद जनाना ते जम्मया, सै परमेशरा रे वायदे रे मुतावक जम्मया।

24हुण इन्हां दुईं जनानां री, परमेशरा रियां दुईं वाचां ने तुलना कित्ती जाई सक्कां इ। तिसरे बच्चे जे दासता च जम्मे सै हाजिरा इ कने हाजिरा सिनै पहाड़ा पर बन्हीरी वाचा रा प्रतीक इ। 25कने हाजिरा मानो अरब रा सिनै पहाड़ा आ, सै अज्जके यरूशलेम री तरफ ईशारा कराँ इ काँह्भई सै अपणे बच्चयां सौगी दासता रा जीवन भुगती राईं।

26पर स्वर्गा रा यरूशलेम अजाद जनाना सारा साई आ कने तिसरे बच्चे दास नींये। ये यरूशलेम अहां रिया माता साई आ। 27काँह्भई पवित्रशास्त्रा च लिखिरा :

“अरे बांझ औरत, खुशी मना, तैं किसी बच्चे जो नीं जणया,

खुशिया ने चीख, तैं बच्चा जणने री पीड़ नीं अनुभव कित्ती,

काँह्भई सुहागणां रिया अपेक्षा छड्डी रिया जनाना रे बच्चे जादा हुणे।”

28मेरे साथी विश्वासियो, अहें इसहाका साई परमेशरा रे वायदे री सन्तान ये। 29कने तियां जे तिस बगत माहणुये रिया इच्छा रे मुतावक जम्मीरा, आत्मा रे मुतावक जम्मीरे जो सतां था, तियां इ हुण बी हुआं।

30पर पवित्रशास्त्र क्या बोलां? “इसा दासिया जो कने इसारे पुत्रा जो बाहर कड्डा, काँह्भई ये दासी पुत्र त अजाद जनाना रे सौगी वारस नीं हूणा।” 31इस खातर मेरे साथी विश्वासियो, अहें तिसा दासिया रे पुत्र नींये, बल्कि अहें त अजाद जनाना री सन्तान ये।

Currently Selected:

गलातियां 4: KFSNT

Highlight

Copy

Compare