गलातियां 3

व्यवस्था या विश्वास

1अरे गलातिया रे विश्वासियो तुहें निरे मूर्ख ये! तुहांजो किने धोखा दित्या? तुहांजो त इसा गल्ला रा पूरा ब्योरा देईतरा था भई किसा वजह ने यीशु मसीह जो सब्बीं रे सामणे क्रूसा पर चढ़ाया था। 2हऊँ तुहांते सिर्फ ये स्वाल पुछणा चाँह भई तुहें पवित्र आत्मा रा बरदान क्या व्यवस्था रा पालन करने ते पाया था या खुशखबरिया रे सुणने कने तिस पर विश्वास करने ते पाया था? 3क्या तुहें इतणे मूर्ख हुई सक्कां ये भई तिसा जिन्दगिया जो जे तुहें पवित्र आत्मा ते शुरु कित्या, तिस्सो हुण खुद अपणिया ताकता ते पूरा करगे?

4तुहें विश्वासी हुणे ते बाद बौहत दुख सैया, कने सच्चीजो हऊँ आशा कराँ भई ये दुख बेकार नीं थे। 5परमेशर सै पवित्र आत्मा जे तुहांजो देआं कने सै जे तुहांरे बिच चमत्कारा रे काम्म कराँ, क्या सै येढ़ा इस खातर कराँ भई तुहें व्यवस्था रा पालन कराँ ये या इस खातर भई तुहें खुशखबरिया जो सुणां ये कने तिस पर विश्वास कराँ ये?

6हुण अब्राहम रे बारे च सोच्चा, “तिने परमेशरा पर विश्वास कित्या कने तिसरे विश्वासा रिया वजह ने परमेशरे तिस्सो धर्मिये रे रुपा च ग्रहण कित्या।” 7तां फेरी तुहें ये समझी लेणा चाहिन्दा, भई अब्राहम री असली औलादां सैई हाईयां सै जे परमेशरा पर विश्वास कराँ ये। 8परमेशरे पवित्रशास्त्रा च पैहले तेई दस्सी तरा था, भई परमेशरा अन्यजातियां जो बी तिन्हांरे विश्वासा रे जरिये धर्मी बनाणा, इस खातर ये गल्लां हुणे ते पैहले परमेशरे पैहले तेई अब्राहमा जो ये खुशखबरी सुणाईती थी “सारी जातियां तेरे जरिये आशीष पाणी।” 9इस खातर सै लोक सै जे विश्वास कराँ ये, विश्वासी अब्राहमा सौगी आशीष पायें।

व्यवस्था रे जरिये शराप

10पर सै लोक सै जे व्यवस्था पालन करने पर भरोसा रक्खां ये, सै त शरापा रे बशा चे। पवित्रशास्त्रा च लिखिरा : “येढ़ा हरेक माहणु शापित आ सै जे व्यवस्था रिया कताबा च लिखी रिया हर गल्ला रा हमेशा पालन नीं करदा।” 11पर ये गल्ल साफ हुईगी भई व्यवस्था रे जरिये परमेशरा रे सामणे कोई धर्मी नीं ठैहरदा, काँह्भई पवित्रशास्त्रा रे मुतावक “धर्मी माहणु विश्वासा रे जरिये जिऊंदा रैहणा।” 12पर व्यवस्था त विश्वासा पर नीं टिक्किरी बल्कि पवित्रशास्त्रा रे मुतावक, “सै जे व्यवस्था जो मनगा, सै तिसरे इ जरिये जिऊंदा रैहणा।”

13मसीह अहांरे खातर शरापित हुणे रे जरिये तिने अहांजो व्यवस्था रे शरापा ते छडवाया, तियां जे पवित्रशास्त्र बोला: “हर कोई सै जे लकड़ा पर टंगाया जां, शापित आ।” 14मसीहे अहांजो इस खातर छडवाया भई अब्राहमा जो दित्तिरी आशीष मसीह यीशुये रे जरिये अन्यजातियां जो मिली सक्को, ताकि विश्वास करने रे जरिये अहें तिस पवित्र आत्मा जो पाई सक्को, तिसरा जे तिने अहांजो देणे रा वायदा कित्तिरा था।

व्यवस्था कने वायदा

15मेरे साथी विश्वासियो, हुण हऊँ तुहांजो हर रोज के जीवना ते इक उदाहरण देई कराँ, देक्खा, ताहली जे दो माहणु इक बसीयत बणां यें कने सै तिस्सो पक्का कराँ ये, तां कोई बी माहणु तिसजो बदली नीं सकदा कने किछ जोड़ी बी नीं सकदा। परमेशरा रा ये वायदा बी येढ़ा इ हाया। 16तियां इ परमेशरे अपणे वायदे अब्राहम कने तिसरे बंशा ने कित्ते। पवित्रशास्त्र ये नीं बोलदा, “भई तेरे बंशां जो” सै जे बौहत लोकां रे बारे च बोलां, पर ताहली जे पवित्रशास्त्र बोलां “तेरे बंशा जो” ये इक्की माहणुये रे बारे च बोलां सै जे मसीह आ।

17मेरा मतलब येआ भई परमेशरे अब्राहमा ने बाचा बन्ही, व्यवस्था सै जे परमेशरे मूसा जो चार सौ तीह साल्लां ते बाद दित्ति थी ये व्यवस्था बाचा जो तोड़ी नीं सकदी कने तियां इ वायदे जो बेकार नीं बणाई सकदी। 18काँह्भई परमेशर अपणी आशीष तुहांजो नीं देन्दा काँह्भई तुहें मूसा रिया व्यवस्था रा पालन कित्तिरा, पर सै ये इस खातर देआं काँह्भई तिने ये वायदा कित्तिरा। तियां इ परमेशरे ये आशीष अब्राहमा जो दित्ति काँह्भई परमेशरे तिस सौगी ये वायदा कित्या था।

19फेरी भला व्यवस्था कजो दित्ति गई थी? लोक कितणे पापी ये, ये दसणे खातर व्यवस्था दित्ति गई थी, पर व्यवस्था तिस वंशा रे औणे तक बणीरी रौ तिसने जे वायदा कित्या गया था। परमेशरे अपणी व्यवस्था स्वर्गदूता रे जरिये मूसा जो दित्ति, सै जे परमेशर कने लोकां रे बिच इक बिचौल़िया था। 20हुण देक्खा, बिचौल़िये रा काम्म त दुईं रे बिच हुआं, पर परमेशर त इक इ हाया।

व्यवस्था रा मकसद

21क्या इसरा ये मतलब आ भई व्यवस्था परमेशरा रे वायदे रे बिरोधा ची? कदीं मनी! काँह्भई जे येढ़ि व्यवस्था दित्तिरी हुन्दी सै जे लोकां च जीवना रा संचार करी सक्कां इ, तां इसरा पालन करने रे जरिये अहें परमेशरा रे सामणे धर्मी हुई जान्दे। 22पर पवित्रशास्त्र घोषणा कराँ भई सै सारे संसारा रे लोक पापा रिया शक्तिया रे अधीन आ, ताकि परमेशरे सै जे वायदा कित्तिरा तिस्सो तिन्हौं देई सक्को सै जे यीशु मसीह पर विश्वास कराँ ये।

23मसीह रे औणे ते पैहले, अहां यहूदियां जो बन्दी बणाया गया था कने व्यवस्था अहांरी रखवाल़ी करया राँ थी। परमेशरे मसीह जो अहां पर परगट करने तक व्यवस्थे अहौं बन्दियां साई बणाईने रखया 24इस खातर मसीह रे औणे तक अहांरा मार्गदर्शक कने अहांरी मदद करने खातर व्यवस्था अहांजो दित्ति गईरी थी, ताकि विश्वासा रे जरिये अहें परमेशरा रे सामणे धर्मी बणी सक्को। 25पर हुण मसीह आई चुक्कीरा कने अहें तिस पर विश्वास करी सक्कां ये, तां हुण अहांरा मार्गदर्शन कने अहांरी मदद करने खातर व्यवस्था री जरूरत नीं रैई।

26यीशु मसीह पर विश्वास करने रे जरिये तुहें सारे परमेशरा री सन्तान ये।

27काँह्भई तुहें सारे तिन्हें जे मसीह रा बपतिस्मा लेई लरा, मसीह रे चरित्रा जो धारण करी लरा। 28हुण नां कोई यहूदी रैया कने नां यूनानी, नां कोई दास रैया, नां अजाद, नां मर्द नां जनाना, काँह्भई मसीह यीशुये च तुहें सारे इक ये। 29कने काँह्भई तुहें मसीह रे, तां फेरी तुहें अब्राहम रे वंश ये, कने परमेशरे सै जे वायदा अब्राहमा ने कित्या था, तिस वायदे रे बारस बी ये।

Currently Selected:

गलातियां 3: KFSNT

Highlight

Copy

Compare