गलातियां 2

होरसी प्रेरितां रे जरिये पौलुसा जो मान्यता

1चौदा साल्लां बाद हऊँ बरनबासा सौगी फेरी भीं यरूशलेम नगरा च गया, कने तीतुस जो बी हऊँ सौगी लेईग्या। 2हऊँ परमेशरा रे दर्शणा रिया वजह ने ऊत्थी गया था। कने ताहली जे हऊँ तित्थी था, हऊँ कल्हिया जेईया कलीसिया रे अगुवेयां ने मिलया कने हऊँ अन्यजातियां रे बिच जिस खुशखबरिया रा जे प्रचार कराँ, तिसा इ खुशखबरिया रा मैं बखान कित्या। ताकि येढ़ा नीं हो भई सै काम्म जे मैं पिछले दिनां च कित्या था कने लगातार करदा रैहन्गा, सै बेकार नीं हुई जाओ।

3पर तीतुस जो बी सै जे मेरे सौगी था कने सै जे यूनानी था, फेरी भीं तिस्सो खतना करने जो मजबूर नीं कित्या। 4पर ये तिन्हां झूठयां भाईयां#2:4 झूठयां भाईयां यनि ये यहूदी लोक ये सै जे बोलां थे भई सै मसीह पर विश्वास कराँ ये, पर सै ये बी विश्वास कराँ थे भई छुटकारा पाणे खातर अहां सारयां जो मूसा रिया व्यवस्था रा पालन करना‍‍ चाहिन्दा। रिया वजह ने समस्या हुई, सै जे अहांरे बिच चोराँ साई आईने घुसीगरे थे, भई तिसा अजादिया रा सै जे यीशु मसीह च अहांजो मिलीरी, तिसारा भेत पाईने अहांजो फेरी भीं यहूदी व्यवस्था रा दास बणाई सक्को। 5पर अहें इक पल बी तिन्हांरे अधीन नीं हुये, ताकि तुहें लगातार खुशखबरिया रिया सच्चाईया च जी सक्को।

6पर तिन्हौं जे लोक अगुवे समझां थे (सै चाये केढ़े बी थे मिन्जो इसते किछ फर्क नीं पौन्दा, परमेशर किसी री तरफदारी नीं करदा) इन्हां अगुवेयां ते मिन्जो कोई नई गल्ल नीं मिली। 7पर इसरे उलट ताहली जे तिन्हें अगुवेयां देख्या भई तियां जे परमेशरे पतरसा जो खतना कित्ती रयां लोकां#2:7 खतना कित्ती रयां लोकां यनि यहूदियां जो खुशखबरी सुनाणे रा काम्म सौंपया था, तियां इ परमेशरे गैर-यहूदी लोकां जो खुशखबरी सुनाणे रा काम्म मिन्जो दित्या। 8परमेशरे तियां जे पतरसा जो खतना कित्ती रयां लोकां खातर इक प्रेरित बणाया, तियां इ परमेशरे मिन्जो बी अन्यजातियां रे खातर प्रेरित बणाया।

9इस तरिके ने तिन्हें माह पर परमेशरा रे तिस अनुग्रह जो समझील्या कने कलीसिया रे अगुवे समझे जाणे औल़े याकूब, कैफा, कने यूहन्ने, मिन्जो कने बरनबासा जो सहयोगी बणाईने भेज्या। कने सै सहमत हुईगे भई अहें अन्यजातियां रे बिच उपदेश देन्दे रौ कने सै खतना कित्ती रयां लोकां रे बिच। 10तिन्हें अहांने बस येई विनती कित्ती भई अहें यरूशलेम च रैहणे औल़े गरीब विश्वासियां री मदद करिये, कने येई आ सै जे हऊँ करना चाँह था।

पौलुसा रे जरिये पतरसा रा बरोध

11पर ताहली जे कैफा अन्ताकिया नगरा च आया, तां मैं तिसरे मुँआ पर बोलित्या काँह्भई सै दोषी था। 12काँह्भई याकूब रिया तरफा ते भेज्जीरे किछ लोकां रे पुज्जणे ते पैहले पतरस अन्यजातियां ने सौगी खां पीं था। पर ताहली जे सै लोक आये तां खतना कित्तिरे लोकां रे डरा रे मारे सै पिच्छे हटिग्या कने तिन्हाते कनारा करने लगया।

13बाकी यहूदी विश्वासियें बी इस दिखावे च पतरसा रा साथ दित्या। येत्थी तक भई इस दिखावे रिया बजह ने बरनबास बी कपटी हुईने भटकिग्या। 14मैं ताहली जे ये देख्या भई खुशखबरिया रिया सच्चाईया रे मुतावक सै सिधे रस्ते पर नीं चलीरे, तां मैं सारयां रे सामणे कैफा जो गलाया, “तां जे तू यहूदी हुईने बी अन्यजातियां साई जीवन जीआं, तां फेरी अन्यजातियां जो यहूदियां रे रीति-रिवाजा पर चलने जो कजो बोलां?”

बिश्वासा रे जरिये धर्मी ठहरना

15अहें त जन्म जात यहूदी ये, कने पापी अन्यजातियां चाते नींये। 16फेरी भीं अहें ये जाणाँ ये भई कोई माहणु व्यवस्था रे कम्मां ते नीं, पर सिर्फ यीशु मसीह पर विश्वास करने रिया बजह ने धर्मी बणां, अहें खुद बी इस खातर यीशु मसीह पर विश्वास कित्या भई अहें व्यवस्था रे कम्मां ते नीं, पर मसीह पर विश्वास करने ते धर्मी बणो; काँह्भई व्यवस्था रे कम्मां ते कोई बी माहणु धर्मी नीं हूणा।

17पर ताहली जे अहें यीशु मसीह पर विश्वास करीने धर्मी हूणा चाँये, तां जे अहें खुद इ पापी बणी जाओ, तां क्या इसरा मतलब येआ भई मसीह पापां जो बढ़ावा देआं? कदीं मनी! 18काँह्भई सै किछ जे मैं गिराईतरा जे भीं तिस्सो बणां, तां हऊँ खुद अपणे अप्पूँजो अपराधी साबित कराँ। 19काँह्भई हऊँ व्यवस्था रे जरिये व्यवस्था रे खातर मरी चुक्कीरा ताकि हऊँ परमेशरा रे खातर जी सक्कूँ।

20हऊँ मसीह सौगी क्रूसा पर चढ़ाया गईरा, हुण हऊँ जिऊंदा निआं, पर मसीह माह च जिऊंदा; कने इस शरीरा च हुण हऊँ सै जिन्दगी जे जी कराँ, सै सिर्फ तिस विश्वासा ने जीवित आ सै जे परमेशरा रे पुत्रा पर आ, तिने जे माहने प्यार कित्या कने खुद अप्पूँजो मेरे खातर अर्पण कित्या। 21हऊँ परमेशरा रे अनुग्रह रा इन्कार नीं करी रां; काँह्भई जे लोक व्यवस्था रा पालन करने रे जरिये धर्मी हुन्दे, तां मसीह रा मरना बेकार हुन्दा।

Currently Selected:

गलातियां 2: KFSNT

Highlight

Copy

Compare