गलातियां 1

नमस्कार

1हऊँ पौलुस, तुहांजो ये चिट्ठी लिखां कने हऊँ इक प्रेरित आ। हऊँ न माहणुआं रिया तरफा ते कने न माहणुआं रे जरिये चुणीरा, बल्कि यीशु मसीह कने परमेशर पिता रे जरिये चुणया गईरा, तिने जे मसीह यीशुये जो मूईरयां चते जिऊंदा कित्या। 2हऊँ कने जितने साथी विश्वासी मेरे सौगी ये गलातिया प्रदेशा री कलीसियां जो नमस्कार कराँ ये।

3हऊँ प्राथना कराँ भई अहांरे पिता परमेशर कने प्रभु यीशु मसीह तुहांजो अनुग्रह कने शान्ति देओ। 4अहांरे परमेशर कने पिता रिया इच्छा रे मुतावक मसीह यीशुये खुद अप्पूँजो अहांरे पापां रे खातर बलिदान करित्या ताकि सै अहांजो अजकला रे इस बुरे संसारा ते छडवाये। 5परमेशरा रा गुणगान कने बडयाई सदा हुन्दी रौ। आमीन।

कोई दुज्जी खुशखबरी नीं

6हऊँ तुहांरे बारे च हैरान आ! भई तुहें लोक इतणी जल्दी तिस परमेशरा जो छड्डया राँये तिने जे तुहांजो मसीह रे अनुग्रह रे जरिये सद्दया, कने किसी होर सन्देशा जो सै जे खुशखबरी बोल्या जां तिसजो तुहें ग्रहण करया राँये। 7असल च कोई दुज्जी खुशखबरी त हाई नीं, पर कई लोक येढ़े सै जे तुहांजो भरमाये रायें कने मसीह रिया खुशखबरिया च हेरा-फेरी करने रा जतन करया रायें।

8पर चाये अहें हो या स्वर्गा ते कोई दूत हो, जे तुहांजो अहांरे जरिये सणवाई रिया खुशखबरिया ते बखरी खुशखबरी सुणावां, तां परमेशर तिस्सो सजा देओ। 9तियां जे अहें बोल्ली चुक्कीरे, तियां इ हऊँ हुण भीं बोलां, भई तुहें ग्रहण कित्ती रिया खुशखबरिया जो छड्डिने जे कोई होर खुशखबरी सुणावां, तां परमेशर तिस्सो सजा देओ। 10साफ तौर पर, हऊँ लोकां जो खुश करने री कोशिश नीं करदा, पर परमेशरा जो खुश करना चाँह। हकीकत च हऊँ लोकां जो खुश नीं करना चाहन्दा, जे हऊँ हुण तक लोकां जोई खुश करदा रैहन्दा, तां हऊँ मसीह रा सेवक नीं हुन्दा।

पौलुस कियां प्रेरित बणया

11मेरे साथी विश्वासियो, हऊँ चाँह भई तुहें ये जाणो भई सै खुशखबरी जे मैं सुणाई सै माहणुआं रिया तरफा ते नीं आईरी। 12काँह्भई मैं इसजो नां किसी माहणुये ते लेआ कने नां किसी ते सिक्खया, बल्कि खुद यीशु मसीहे इसजो माह पर परगट कित्या।

13यहूदी धर्मा च हऊँ पैहले कियां जीया राँ था, तिस्सो तुहें सुणी चुक्कीरे, कने तुहें ये बी जाणाँ ये भई मैं परमेशरा रिया कलीसिया जो कितना सताईरा कने तिसारा नौं नशाण तक मटयाणे री कोशिश कित्ती। 14हऊँ यहूदी धर्मा च अपणी जाति औल़यां ते सै जे मेरिया उम्रा रे थे, जादा बधदा गया कने मेरे पूर्वजां ते सै जे रिवाज मिन्जो मिले, तिन्हां च मेरी बौहत आस्था थी।

15पर परमेशर तिने जे मेरे जमणे ते पैहले इ मिन्जो चुणया कने तिने अपणे अनुग्रह ने मिन्जो सद्दया। 16कने ताहली जे परमेशरा री इच्छा हुई भई सै माह पर अपणे पुत्रा जो परगट करो ताकि हऊँ अन्यजातियां रे बिच तिसरिया खुशखबरिया रा प्रचार करूँ। तिस बगत इकदम मैं माहणुआं ते कोई राय नीं लैई। 17कने नांई सै जे माह्ते पैहले प्रेरित थे, तिन्हांने मिलणे खातर हऊँ यरूशलेम नगरा च गया, बल्कि इकदम हऊँ अरब देशा जो गया कने फेरी तित्थी ते मुड़ीने दमिश्क नगरा जो आईग्या।

18फेरी तिन्नां साल्लां ते बाद हऊँ कैफा यनि पतरसा ने मिलणे खातर यरूशलेम पुज्जया, कने पन्द्रह दिन तक तिसले रैया। 19पर तित्थी हऊँ प्रभुये रे भाईये याकूब जो छड्डिने किसी बी दुज्जे प्रेरिता ने नीं मिलया। 20हऊँ परमेशरा रे सामणे सगन्द खाई ने बोलां भई जो किछ जे हऊँ लिखिराँ तिसच कोई गल्ल झूट्ठ नीं।

21हऊँ यरूशलेम छडणे ते बाद सीरिया कने किलिकिया रे प्रदेशां च गया। 22पर यहूदा प्रदेशा रियां कलीसियां रे विश्वासी मेरने कदीं नीं मिले थे। 23पर सै लोकां जो गलान्दे सुणां थे, “सै माहणु सै जे पैहले अहांजो सतां था, हुण सैई तिस विश्वासा रा प्रचार करी कराँ, तिस्सो जे तिने पैहले खत्म करने री कोशिश कित्ती थी।” 24कने सै मेरे बारे च परमेशरा री महिमा कराँ थे।

Currently Selected:

गलातियां 1: KFSNT

Highlight

Copy

Compare