2 कुरिन्थियों 6
6
1परमेशरा सौगी काम्म करने रे नाते अहें तुहां लोकां ने बिनती कराँ ये भई परमेशरा रा सै अनुग्रह जे तुहांजो मिलीरा, तिस्सो बेकार नीं जाणे देआ। 2काँह्भई पवित्रशास्त्रा च परमेशर बोलां,
“मैं ठीक वगता पर तेरी सुणी ली कने हऊँ छुटकारे रे दिन तिज्जो सहारा देणे आया।”
देक्खा। “सही वगत” येई हाया। देक्खा। “छुटकारे रा दिन येई हाया।”
3अहांरा स्वाभाव किसी बी तरिके ने किसी रे खातर अड़चन नीं बणदा, ताकि अहांरी सेवकाईया पर कोई दोष नीं लाओ। 4पर हरेक गल्ला च अहें ये दस्सां ये भई अहें परमेशरा रे सच्चे सेबक ये। अहें धीरजा सौगी पीड़ा सैहणे च, गरीबिया च, कष्टां च, 5कोड़े खान्दे हुये, जेल्लां च रैहन्दे हुये, अशान्तिया रे बिच, मेहणत करदे हुये, कईं रातीं तक बिणा सोये, उपवासा च, 6पवित्रता ते, ज्ञाना ते, धीरजा ते, दयालुता ते, पवित्र आत्मा ते, सच्चे प्यारा ने, 7सच्चे बचना ने, कने परमेशरा रिया सामर्था ने, धार्मिकता रे हत्थियार सै जे अपणे सज्जे कने खब्बे हत्थां चे, 8अहें आदरा कने निरादरा रे बिच, बेज्जतिया कने सम्माना च अपणे बारे च हमेशा सच्च बोल्या, पर किछ लोकें अहांजो भरमाणे औल़े समझया; 9किछ लोक अहांजो अंजाण समझां ये, जबकि अहौं सारे जाणाँ ये; अहें मूईरे समझे जायें, पर फेरी भीं अहें जिऊंदा ये; अहांजो सजा त दित्ति जाँई, पर अहें प्राणा ते मारे नीं जान्दे। 10अहें दुखां रे वगता च बी, हमेशा खुश ये; हलाँकि अहें गरीब ये, फेरी बी बौहत लोकां जो आत्मिकता च अमीर बणाई दें। लोक समझां ये अहांले किछ निआं, जबकि अहांले त सब किछ आ।
11कुरिन्थ नगरा च रैहणे औल़े लोको, अहें तुहांजो किछ बी छुपान्दे नींये, काँह्भई अहें तुहांजो अपणे पूरे दिला ने प्यार कराँ ये। 12अहांरा प्यार तुहांरे खातर घट नीं हुईरा; पर तुहें अहांने प्यार करना घट करी तरा। 13तुहांजो अपणा बच्चा समझदे हुये हऊँ बोलीराँ भई तुहें बी अहांजो अपणे दिला ते प्यार करा।
अहें परमेशरा रा मन्दर ये
14अविश्वासियां ने बौहत करीवी रिश्ता नीं रक्खा, काँह्भई धर्मिये कने अधर्मिये री भला क्या बराबरी हुई? या लोई रे कने अन्धेरे रे बिच भला मित्रता कियां हुई सक्कां इ? 15इयां इ मसीह रा शैतान्ना ने क्या तालमेल? यनिके विश्वासिया रा अविश्वासिये ने क्या नाता? 16परमेशरा रे मन्दरा रा मूर्तियां ने क्या नाता? काँह्भई अहें खुद तिस जीवित परमेशरा रे मन्दर ये; तियां जे परमेशरे पवित्रशास्त्रा च बोल्या,
“माह तिन्हां लोकां च बसणा कने तिन्हां सौगी हमेशा रैहणा;
कने हऊँ तिन्हांरा परमेशर हूणा कने सै मेरे लोक हुणे।”
17इस खातर पवित्रशास्त्रा रे जरिये प्रभु बोलां, “तुहें अविश्वासी लोकां रे बिच्चा ते निकल़ीने बाहर औआ सै जे मेरा अनुशरण नीं करदे,
तिन्हांते अप्पूँजो लग करा; हुण तुहें कदीं किछ बी नीं छूआ, सै जे अपवित्र आ,
तांई मांह तुहें ग्रहण करने;
18कने हऊँ तुहांरा पिता हूणा, कने तुहें मेरे बेटे कने बेटियां हुणे।
ये सर्वशक्तिमान परमेशरा रा वचन आ।”
Currently Selected:
2 कुरिन्थियों 6: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
