2 कुरिन्थियों 5
5
अहांरा स्वर्गीय घर
1काँह्भई अहें जाणाँ ये भई धरतिया पर अहांरा ये शरीर तम्बुये साई आ तिसच जे अहें रैयां ये, जे ये तम्बू नष्ट हुई जांगा, तां अहांजो परमेशरा रिया तरफा ते स्वर्गा च हमेशा खातर इक बणया-बणाया घर मिलणा सै जे माहणुआं रे हत्था ते बणाया नीं गईरा। 2इस खातर तदुआं तक जे अहें इस घरा चे, अहें कराहन्दे रैं काँह्भई येई चाँह ये भई अपणे स्वर्गीय घरा च जाईने बसी जाओ। 3इसी खातर अहें ये चाँह ये भई ताहली जे अहें तिसजो पांगे तां फेरी घरा ते बेघर नीं रैहन्गे।
4कने अहें इस शरीरा च रैहन्दे हुये सै जे तम्बुये साई आ बोझे हेठ दबोईने कराहन्दे रैं, बजह येई भई अहें इसजो छडणा नीं चांहन्दे बल्कि नये शरीरा जो पाणा चाँये ताकि जो किछ नाशवान आ तिस्सो अनन्त जीवन निंगल़ी लो। 5तिने जे अहांजो इस मकसदा रे खातर त्यार कित्तिरा, सै परमेशर इ हाया, तिने जे बयाने रे रुपा च अहांजो पवित्र आत्मा दित्तिरा।
6इस खातर अहांजो पूरा भरोसा, काँह्भई अहें जाणाँ ये भई तदुआं तक जे अहें अपणे शरीरा च रैई कराँ ये, तदुआं तक प्रभुये रे घरा ते दूर ये। 7काँह्भई अहें सै जे विश्वास कराँ ये तिसरे मुतावक जीयें, हलाँकि सै जे अहें देखी सक्कां ये तिसरे मुतावक नीं। 8अहांजो पूरा भरोसा, इस खातर हऊँ बोलां भई अहें अपणे शरीरा जो छड्डिने प्रभु यीशुये सौगी तिसरे घरें रैहणे जो खरा समझां ये।
मसीह रा न्याय आसण
9इस वजह ने अहांरा मकसद येआ भई अहें प्रभुये जो खुश करदे रौ, चाये अहें प्रभुये सौगी स्वर्गा च रौ या इसा धरतिया पर रौ। 10अहें सारयां धरतिया पर रैईने सै जे किछ भला या बुरा काम्म कित्या, तिसरा फल़ पाणे रे खातर मसीह रे न्याय आसणा रे सामणे जरूर हाजर हुणे पौणा।
परमेशरा ने मेल-मलापा री सेवा
11इस खातर प्रभु ते डरदे हुये अहें सच्चाईया पर विश्वास करने रे खातर लोकां ने विनती करदे रै; परमेशर खुद अहौं पूरे तरिके ने जाणा भई अहें केढ़े; कने मेरी आशा येई भई तुहें बी अहांजो ठीक ढंगा ने जाणाँ ये। 12अहें तुहांरे सामणे भीं ते अपणी कोई बडयाई नीं करी रायें, बल्कि तुहांजो इक मौका देई कराँ ये भई तुहें अहां पर घमण्ड करी सक्को; ताकि तुहें तिन्हौं जबाब देई सक्को सै जे मना पर नीं पर दिखावटी गल्लां पर घमण्ड कराँ ये।
13काँह्भई जे कोई अहांने बोलां भई अहें पागल ये तां परमेशरा खातर ये, कने जे दुज्जे लोक बोलां ये भई अहें सयाणे तां सै तुहांरे खातर ये। 14काँह्भई मसीह रा प्यार अहांजो मजबूर करी देआं; काँह्भई अहें ये समझां ये भई मसीह सारयां लोकां रे खातर मरया इसी खातर अहें सारे मरीगे। 15कने सै सारयां लोकां खातर मरया काँह्भई सै लोक जे ज्यून्दे, सै अपणे खातर नीं जीओ, बल्कि तिसरे खातर जीओ सै जे मरने ते बाद भीं ते जिऊंदा हुईग्या।
मसीह च नया जन्म
16इस खातर हुण ते अहें किसी बी माहणुये रा न्याय संसारा रे नजरिये ने नीं करो। इक बगत था ताहली जे अहें मसीह रा न्याय बी संसारा रे नजरिये ने कित्या था। पर हुण अहें मसीह जो संसारा रिया नज़राँ ने नीं देखदे। 17इस खातर जे कोई मसीह पर विश्वास कराँ, तां हुण सै नया माहणु आ; पुराणा जीवन गुजरिग्या; कने नया जीवन शुरु हुईग्या।
18कने फेरी ये सारियां गल्लां तिस परमेशरा रिया तरफा ते हुआ इयां, तिने जे अहें मसीह रे जरिये अप्पूँ च मलाईल्या कने लोकां जो परमेशरा ने मेल-मलापा रा काम्म अहांजो सौंपीत्या। 19यनिके परमेशरे मसीह च हुईने अप्पूँ सौगी संसारा रा मेल-मलाप करील्या, कने तिन्हांरे पापां रा इल्जाम तिन्हां पर नीं लगाया कने तिने मेल-मलापा रा वचन अहांजो सौंपीत्या।
20इस खातर अहें मसीह रे राजदूत ये; मानो परमेशर अहांरे जरिये तुहांजो बिनती करी रां। मसीह रिया तरफा ते अहें तुहांजो निवेदन कराँ ये भई परमेशरा ने मेल-मलाप करी लो। 21परमेशरे मसीह जो अहांरे पापां रे खातर पाप बल़ि बणाया तिने जे कदीं पाप नीं कित्या, ताकि अहें तिसरे जरिये परमेशरा रे सामणे धर्मी समझे जायें।
Currently Selected:
2 कुरिन्थियों 5: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
