2 कुरिन्थियों 7

1मेरे प्यारे मित्रो, काँह्भई परमेशरे अहांने ये वायदे कित्तिरे, इस खातर औआ सै जे किछ अहांरे शरीरा कने आत्मा जो अपवित्र कराँ तिसजो धोई देईये, कने परमेशरा रा आदर करदे हुये पूरे तरिके ने पवित्र जीवन जीओ।

पौलुसा रा आनन्द

2अहांजो अपणे दिला ने प्यार करा, अहें किसी रा किछ बी नीं बगाड़ीरा; अहें किसी ने बी कोई अन्याय नीं कित्या, कने नांई अहें किसी ने कोई छल-कपट कित्या। 3हऊँ तुहांजो दोषी बनाणे खातर येढ़ा नीं बोलीराँ, काँह्भई हऊँ तुहांजो दस्सी बैठिरा भई अहें तुहौं दिला ते प्यार कराँ ये। येत्थी तक भई अहें तुहां सौगी जीणे मरने जो त्यार ये। 4मिन्जो लगां भई हऊँ तुहांजो साफ तरिके ने बोल्ली सक्कां, कने हऊँ तुहांरे बारे च बौहत खुश आ। अहां रियां सारियां परेशानियां रे बावजूद बी तुहें मिन्जो बड़ी तसल्ली दित्ति कने हऊँ हुण बी बौहत खुश आ।

5ताहली जे अहें मकिदुनिया प्रदेशा च पुज्जे तां बी अहांजो आराम नीं मिलया था, पर अहांजो हरेक जगह परेशानियां सैहणी पैई थी; बाहर लड़ाईयां थी कने मना च डर था। 6उदास लोकां जो तसल्ली देणे औल़े परमेशरे तीतुस जो येत्थी भेज्जीने अहांजो तसल्ली दित्ति। 7कने न सिर्फ तिसरे औणे ते, पर सै तसल्ली जे तिस्सो तुहांते मिली थी ये सुणीने अहें खुश हुये। ताहली जे तिने तुहांरा गहरा प्यार, कने तुहांरे दुख कने मेरे खातर तुहांरी चिन्ता री खबर अहांजो सुणाई, तिसते मिन्जो होर बी जादा खुशी हुई।

8काँह्भई मेरिया चिट्ठिया ते तुहांजो बड़ा दुख हुया हूणा पर फेरी भीं मिन्जो तिसरे लिखणे रा दुख निआं; चाये पैहले मिन्जो इसरा दुख बी हुया था, पर हुण हऊँ देखीरां भई मेरिया तिसा चिट्ठिया ते तुहांजो थोड़िया देरा तक इ दुख हुया था। 9पर हुण हऊँ खुश आ, इस खातर नीं भई तुहांजो दुख हुया था बल्कि इस खातर भई तिस दुखा रिया बजह नेई तुहें मन फिराया था; काँह्भई तुहांरा दुख परमेशरा रिया इच्छा रे मुतावक इ था ताकि तुहांजो अहां रिया बजह ने कोई नुक्शान नीं ओ। 10काँह्भई सै दुख जे परमेशरा रिया इच्छा रे मुतावक मिलां, सै इक येढ़े मन फिराव जो जन्म देआं तिसरा नतीजा जे छुटकारा कने फेरी तिस्सो पछताणे नीं पौन्दा। पर संसारिक दुख मौती जो जन्म देआं।

11देक्खा, सै दुख जे परमेशरा रिया तरफा तेआ तिने तुहांरे जीवना च क्या-क्या बदलाव कित्तिरा, तियां जे भई कितना उत्साह, अप्पूँजो बचाणे री चिन्ता, गुस्सा, डर, मेरने मिलणे री बेचैनी, सेवा रे प्रति तुहांरा जोश, कने पापा रे प्रति न्याय चुकाणे री भावना। तुहें हर गल्ला च ये साबित कित्या भई इस बारे च तुहें पूरी तरह निर्दोष थे। 12इसी खातर ताहली जे मैं तुहांजो सै कड़क चिट्ठी लिखी थी तां तिस माहणुये रिया वजह ने नीं, तिने जे अन्याय कित्या था कने नांई तिसरिया वजह ने तिसरे प्रति जे अन्याय कित्या गया था। पर इस खातर लिखया था ताकि परमेशर तुहांजो दस्सो भई तुहें अहांरा कितना ख्याल रखां ये।

13इस खातर अहौं बड़ा हौंसला मिल्या; कने अहांरे इस हौंसले सौगी तीतुस रिया खुशिया री बजह ने अहांजो होर बी जादा खुशी हुई, काँह्भई तुहें तिसजो खुश करने च तिसरी मदद कित्ती। 14तुहांरे खातर मैं तिसने सै गल्लां जे बढ़ी-चढ़ी ने कित्तियां थी, तिसरे खातर मिन्जो शर्मिन्दा नीं हुणे पैया; बल्कि अहें तियां जे तुहांजो सारा किछ सच्च-सच्च गलाया था, तियां इ तुहांरे बारे च अहांरा गर्व तीतुस रे सामणे सच्चा साबित हुया।

15सै ताहली जे ये आद कराँ भई तुहें सारयां किस तरिके ने तिसरा हुक्म मन्नया कने डरा रे मारे थर-थर कम्बदे हुये तुहें तिस्सो कियां अपणाया तां तुहांरे प्रति तिसरा प्यार होर बी बधी जां। 16हऊँ खुश आ भई हऊँ तुहां पर पूरी तरह भरोसा करी सक्कां।

Currently Selected:

2 कुरिन्थियों 7: KFSNT

Highlight

Copy

Compare