2 कुरिन्थियों 4

खुशखबरिया रा प्रकाश

1काँह्भई परमेशरा रिया दया ते तिसरे वचना रा प्रचार करने री सेवा अहांजो मिली, इस खातर अहें निराश नीं हुन्दे। 2पर अहें त शर्मनाक काम्म करने छड्डी तरे, अहें छल-कपट नीं करदे कने नांई परमेशरा रे बचनां च मिलावट कराँ ये। परमेशर अहांरा गवाह भई अहें सच्चाई बोलां ये, कने सै जे कोई ईमानदार आ तिन्हांजो ये पता।

3जिसा खुशखबरिया रा जे अहें प्रचार कराँ ये, जे तिसजो लोक समझी नीं पायें, तां सै नाश हुणे औल़े लोक इ हाये सै जे समझदे नींये। 4इस संसारा रे इश्वरे (शैताने) तिन्हां अविश्वासी लोकां री बुद्धि अन्ही करी तरी, इसी खातर सै मसीह रे बारे री उत्तम खुशखबरिया कने तिसरी महिमा समझदे नींये। मसीह परमेशरा रा स्वरूप आ।

5अहें खुद अपणा प्रचार नीं करदे बल्कि अहें ये प्रचार कराँ ये भई मसीह यीशु इ प्रभु आ, कने अहें यीशुये रिया वजह ने तुहांरे सेवक ये। 6काँह्भई पवित्रशास्त्र बोलां, “परमेशरे जोतिया जो अन्धकारा च चमकणे रा हुक्म दित्या।” हुण परमेशर अहांरे दिलां च चमकीरा, ताकि परमेशरा री महिमा यीशु मसीह च दिखीरी, ये अहें तुहौं दस्सी सक्को।

7पर अहें चिक्का रे भाँडयां साई ये तिसच ये दौलत रखीरी। ये असली सामर्थ अहां रिया तरफा ते नीं, बल्कि परमेशरा रिया इ तरफा ते औआं इ। 8अहें चऊँ तरफां ते दुख तकलीफां त भोगां ये, पर संकटां च नीं पौंदे; अहें डरीरे त हये, पर निराश नींये। 9सताये त जायें; पर त्यागे नीं जान्दे, अहें झुकाईरे त हाये, पर नाश नीं हुन्दे। 10अहें हमेशा यीशुये साई मौती रे डरा ने जीआं ये ताकि लोक यीशुये रे जीवना जो अहांरे कम्मां ते देखी सक्को।

11काँह्भई यीशुये रिया वजह ने अहांजो जीते जी हमेशा मौती रे खतरयां च सौंपया जां, ताकि यीशुये रा जीवन बी अहांरे नाश हुणे औल़यां शरीराँ च साफ तौरा पर परगट हुई जाओ। 12इसा वजह ते अहें मौती रे खतरयां च जीआं ये, पर इसरा नतीजा तुहांरे खातर अनन्त जीवन आ।

13पवित्रशास्त्रा च ये लिखिरा, “मैं विश्वास कित्या था इस खातर मैं गलाया।” अहां च बी विश्वासा री सैई आत्मा इ कने अहें बी विश्वास कराँ ये इस खातर अहें बी बोलां ये।

14काँह्भई अहें जाणाँ ये भई तिने जे प्रभु यीशुये जो मूईरयां चते जिऊंदा कित्या, परमेशरा अहांजो बी यीशुये सौगी रैहणे खातर जिऊंदा करना कने तुहां सौगी अपणे सामणे खड़ा करना। 15ये सारा किछ तुहांरे खातर इ कित्या गईरा, ताकि परमेशर कितना अनुग्रहकारी आ जादा ते जादा लोक जाणगे, कने बौहत सारे लोक परमेशरा री प्रशंसा कने आदर करगे।

16इस खातर अहें निराश नीं हुन्दे: अहांरे बाहरी शरीर कमजोर हुन्दे जाई कराँ ये, तां बी अहांरी अंतरात्मा हर रोज नौंईं त नौंईं हुन्दी जाई कराँ इ। 17अहांरा ये छोट्टा कने पल भरा रा दुख, अहांरे खातर अनन्त कने बौहत इ जादा महिमा त्यार करी रां, तिसरी तुलना जे करी नीं सकदे। 18सै जे किछ देख्या जाई सक्कां अहां रियां आक्खीं तिस पर नीं टिकि रियां, बल्कि अणदेखी चिज़ां पर टिकिरी; काँह्भई देक्खी रियां चिज़ां थोड़े इ दिनां रियां, पर अणदेखी चिज़ां सदा बणीरी रैईंयां।

Currently Selected:

2 कुरिन्थियों 4: KFSNT

Highlight

Copy

Compare