2 कुरिन्थियों 1

नमस्कार

1हऊँ पौलुस, परमेशरा रिया इच्छा ते मसीह यीशुये रा प्रेरित आ कने अहांरे साथी विश्वासी तिमुथियुस रिया तरफा ते। ये चिट्ठी हऊँ कुरिन्थुस नगरा च परमेशरा री कलीसिया कने अखाया प्रदेशा च रैहणे औल़े सारे पवित्र लोकां जो लिखिराँ। 2अहांरे पिता परमेशर कने प्रभु यीशु मसीह रिया तरफा ते तुहांजो अनुग्रह कने शान्ति मिलो।

परमेशरा रा धन्यवाद करना

3परमेशरा रा धन्यवाद ओ सै जे अहांरे प्रभु यीशु मसीह रा पिता, सै दया रा पिता कने परमेशर सै जे अहांजो सदा तसल्ली देआं। 4कने सै जे अहांरी सारियां मुशीवतां च अहांजो तसल्ली देआं ताकि अहें बी मुशीवतां च पईरे लोकां जो तियां इ तसल्ली देई सक्को, तियां जे परमेशरे अहांजो दित्ति।

5काँह्भई तियां जे अहें मसीह रे खातर बौहत दुख सैं, तियां इ परमेशर अहौं मसीह रे जरिये बौहत तसल्ली देआं। 6जे अहें दुख सैं, तां ये तुहांरिया तसल्लिया कने छुटकारे खातर आ; कने जे अहें तसल्ली पांये, तां ये तुहांरिया तसल्लिया खातर आ; जिस रिया वजह ते तुहें धीरजा ने तिन्हां दुखां जो सैई लैं जिन्हौं जे अहें बी सैयां ये। 7तुहांरे बारे च अहांजो पूरी आशा इ काँह्भई अहें जाणाँ ये भई तुहें अहां साई दुख सैये, तियां इ तुहां बी अहां साई तसल्ली पाणी सै जे परमेशर अहांजो देआं।

दुखा ते बचाणा

8अहांरे साथी विश्वासियो, अहें चाँये भई तुहें तिन्हां दुखां रे बारे च जाणा सै जे अहांजो आसिया प्रदेशा च झेलणे पै थे; सै अहांरे खातर भयंकर दुख था सै जे अहां रिया सैहण-शक्तिया ते परे था, येत्थी तक भई अहांजो जीणे तक री कोई आशा नीं थी। 9हकीकत च अहें अपणे मना च ये समझी बैठिरे थे भई अहें मरने औल़े, ताकि अहें खुद अप्पूँ पर जादा भरोसा नीं रखीने तिस परमेशरा पर भरोसा करिये सै जे मूईरयां जो बी भीं ते जिऊंदा करी देआं। 10तिने परमेशरे इ अहांजो मौती रे इतणे बड्डे संकटा ते बचाया, कने औणे औल़ियां मुशीवतां ते बी सैई अहांजो बचांगा; अहांरी आशा तिस पर इ टिकिरी कने अग्गे बी तिस इ अहौं बचान्दे रैहणा, 11तियां जे तुहें अपणिया प्राथना रे जरिये अहांरी मदद कराँ ये। ताकि बौहत सारे लोकां री प्रार्थनां रे जरिये अहांजो परमेशरा रा सै अनुग्रह जे मिलया, इसरे खातर बौहत सारे लोक अहां रिया तरफा ते परमेशरा रा धन्यवाद करो।

आच्छा मन

12अहांजो इसरा गर्व आ भई अहें ये गल्ल आच्छे मना ने बोल्ली सक्कां ये भई अहें इस संसारा च कने खास कर तुहां लोकां रे बिच ईमानदारिया ने कने सच्चाईया ने जीवन बिताया सै जे परमेशरा ते मिलीरा। अहें संसारिक ज्ञाना पर नीं पर परमेशरा रे अनुग्रह पर भरोसा कित्तिरा। 13अहें तुहौं होर किछ नीं लिखदे, सिर्फ सैई लिखां ये सै जे तुहें पढ़ी सक्कां ये या समझी बी सक्कां ये, कने मिन्जो आशा इ भई 14तुहां अन्त च अहौं पूरी तरह समझी लेणा हलाँकि हल्तियें तुहें अहांजो बौहत इ कम समझी पाये। ताकि तुहें अहांरे खातर तियां इ गर्व करी सक्कां ये तियां जे अहां तुहांरे खातर तिस दिन गर्व करना ताहली जे अहांरे प्रभु यीशु फेरी भीं औंगे।

पौलुस री यात्रा च बदलाव

15मिन्जो निश्चा था भई तुहें अहांजो थोड़ा बौहत समझी चुक्कीरे, इस खातर मैं पैहले तुहांले औणा चाँह था ताकि मेरे दो बार औणे रा आशीर्वाद तुहांजो मिली सक्को। 16हऊँ सोच्चां था भई मकिदुनिया प्रदेश जान्दे हुये तुहांजो मिलूँ कने ताहली जे मकिदुनिया ते वापस हटूँ तां फेरी तुहांले आऊं; ताकि हऊँ तुहांते यहूदिया प्रदेशा रिया यात्रा खातर मदद पाऊँ।

17ताहली जे मैं ये योजना बणाई थी, तां क्या मैं ये लापरवाईया ने बणाई थी? या हऊँ सै योजना जे बणां, तां क्या तिन्हौं संसारिक तरिके ने बणां भई इक्की घड़िया च हाँ, हाँ बी कराँ कने नां, नां बी करदा रऊँ? 18तियां जे परमेशर बफादार आ, तियां इ सै किछ जे अहें तुहांजो बोलां ये सै हमेशा सच्चा आ।

19काँह्भई तुहां बिच जिस परमेशरा रे पुत्र यीशु मसीह रा प्रचार अहें, यनि सिलवानुस, तिमुथियुस कने मैं कित्या, सै “हाँ” कने “नां” दोन्नों इक साथ नीं थे, पर मसीह च, “हाँ” इ “हाँ” हुई। 20काँह्भई परमेशरा रे जितने बी वायदे, सै सारे मसीह च पूरे हुये;#1:20 पूरे हुये यनि हाँ इस खातर अहें मसीह रे जरिये बी सै जे “आमीन” बोलां ये, सै परमेशरा री इ महिमा खातर हुआं।

21-22परमेशर इ हाया, सै जे तुहां सौगी मसीह च अहांजो मजबूत कराँ, कने परमेशरे अहां पर अपणी मोहर लाईने बयाने रे रुपा च अपणा आत्मा अहांरे दिला च रखीने अहांरा अभिषेक कित्तिरा।

23परमेशर मेरिया इसा सच्चाईया रा गवाह भई हऊँ दोवारा कुरिन्थुस नगरा च इस खातर नीं आया काँह्भई हऊँ तुहांजो पीड़ा नीं देणा चाँह था। 24इसरा मतलब ये नींआ भई अहें तुहांरे विश्वासा पर अपणा हक जताये, काँह्भई तुहें अपणे विश्वासा पर अटल ये, लेकिन अहें त तुहांरिया इ मौज्जा खातर तुहां सौगी काम्म कराँ ये।

Currently Selected:

2 कुरिन्थियों 1: KFSNT

Highlight

Copy

Compare