2 कुरिन्थियों 2

1इस खातर मैं ये निश्चा करील्या था भई तुहांजो दुबारा दुख देणे तुहांले नीं आऊं। 2काँह्भई जे हऊँ तुहांजो दुख देन्गा, तां सच्चीजो मिन्जो खुश करने रे खातर कोई बी नीं रैहणा, काँह्भई मैं तुहौं दुख दित्तिरा।

3सैई गल्ल त मैं तुहांजो लिखी थी, ताकि ताहली जे हऊँ तुहांले आऊं तां तिन्हाते जे मिन्जो खुशी मिलणी चाहिन्दी थी, तिन्हांते मिन्जो दुख नीं मिलो; काँह्भई तुहां सब्बीं च मेरा इसा गल्ला रा भरोसा भई मेरिया खुशिया ची तुहें सारे बी खुश हुणे। 4काँह्भई तुहौं मैं दुखी मना ते कने पीड़ा सौगी आँसू बहाई-बहाई ने सै चिट्ठी लिखी थी; पर तुहांजो दुखी करने खातर नीं, बल्कि इस खातर भई तुहांरे प्रति सै जे मेरा प्यार आ, सै कितना महान आ, तुहें इसजो जाणी सक्को।

अपराधिये जो माफी

5जे तुहां चते किन्हिये निराश कित्या, तां मिन्जो इ नीं बल्कि थोड़ा बौहत तुहां सब्बीं जो बी निराश कित्या। (इसते जादा किछ होर नीं बोलणा चाहन्दा)। 6येढ़े माहणुये जो तुहां चते कई विश्वासियें सै जे सजा देईती, सैई काफी। 7इस खातर इसते बधिया येआ भई तिसजो माफ करा कने हौंसला देआ ताकि येढ़ा माहणु निराश हुईने पूरी तरह विश्वासा जो छडी नीं देओ।

8इस खातर मेरी तुहांजो ये विनती भई तुहें तिसरे प्रति अपणे प्यारा रा सबूत देआ। 9काँह्भई मैं तुहांजो इसी खातर लिखया था भई तुहांजो परखी लऊँ भई तुहें मेरी सारियां गल्लां जो मनणे जो त्यार ये कि नीं।

10पर जे तुहें किसी जो माफ कराँ ये, तां तिस्सो हऊँ बी माफ कराँ। जे हकीकत च मिन्जो किछ माफ करने री जरूरत इ-तां ताहली जे हऊँ माफ कराँ, तां सै तुहांरी भलाईया रिया वजह ने मसीह रे सामणे माफ कित्तिरा। 11ताकि शैतान अहांजो धोखा नीं देई सक्को; काँह्भई तिसरियां साजिशां ते अहें अंजाण नींये।

मकिदुनिया रे खातर यात्रा

12ताहली जे हऊँ त्रोआस नगरा च मसीह रिया खुशखबरिया रा प्रचार करने आया, तां तित्थी प्रभुये मिन्जो प्रचार करने रा मौका दित्या था। 13मेरे सौगी काम्म करने औल़े तीतुस जो तित्थी नीं पाईने हऊँ बड़ा दुखी था; इस खातर हऊँ त्रोआस नगरा जो छड्डिने वापस मकिदुनिया प्रदेशा च आईग्या।

मसीह च बिजय उत्सब

14पर परमेशरा रा धन्यवाद ओ सै जे मसीह रे जरिये अपणे जीतणे रिया खुशिया च अहांरी हमेशा अगवाई कराँ; कने परमेशर अहांरे जरिये हर जगह मसीह रे ज्ञाना री खुशबु बिखेरदा रैयां। 15काँह्भई अहें परमेशरा रे सामणे मसीह रे जरिये चढ़ाईरी खुशबुआ साई ये, सै जे छुटकारा पाणे औल़आं कने नाश हुणे औल़यां इन्हां दुईं रे बिच बिखराँ इ।

16पर तिन्हां खातर सै जे विनाश रे रस्ते पर ये, सै मौती री येढ़ि दुर्गन्ध ये सै जे तिन्हांजो मौती रिया तरफा लेई जाईं; पर तिन्हांरे खातर सै जे छुटकारे रे रस्ते पर बधदे रैं, ये जिन्दगिया री येढ़ि खुशबु ये, सै जे जीवना री तरफ बधान्दी रैईं। पर इन्हां कम्मां रे खातर कोई बी लायक नींआ। 17परमेशरा रे वचना जो अपणे फायदे खातर, तिसच मिलावट करीने बेचणे औल़े मते सारे दुज्जे लोकां साई अहें नींये। पर अहें त परमेशरा रे सामणे परमेशरा रिया तरफा ते भेज्जीरे माहणुआं रे बराबर मसीह च हुईने सच्चाईया ने बोलां ये।

Currently Selected:

2 कुरिन्थियों 2: KFSNT

Highlight

Copy

Compare