1 कुरिन्थियों 16
16
बिश्वासियां रे खातर दान
1हुण पवित्र लोकां रिया मददा खातर चन्दे रे बारे च: तेढ़ी आज्ञा जे मैं गलातिया रिया कलीसियां जो दित्ति, तियां इ तुहें बी करा। 2हफ्ते रे पैहले दिन तुहां चते हर इक अपणी-अपणी कमाईया रे मुतावक किछ अप्पूँ ले रखी छड्डा, ताकि मेरे औणे पर चन्दा नीं कठेरने पौ। 3कने ताहली जे मांह औणा, तां तिन्हांजो जे तुहें चाहन्गे तिन्हौं हऊँ चिट्ठियां देईने भेजी देंगा, ताकि तुहांरा दान यरूशलेम पहुँचाई दो। 4कने जे मेरा जाणा बी ठीक हुया, तां तिन्हां मेरे सौगी जाणा।
पौलुस रिया यात्रा रा कार्यक्रम
5कने मांह मकिदुनिया प्रदेश हुईने तुहांले औणा, काँह्भई मिन्जो मकिदुनिया हुईने जाणा जरूरी आ। 6पर हुई सक्कां भई हऊँ किछ वगत तुहांले इ रुकी जाऊँ कने सर्दियां रा ये मौसम तुहांरे येत्थी बिताऊँ, ताकि जिस तरफ मांह जाणा, तिस तरफ जाणे च तुहें मेरी मदद करी सक्को। 7काँह्भई हऊँ हुण रस्ते च तुहांजो मिलणा नीं चाहन्दा; पर मिन्जो आशा इ भई जे प्रभु चाओ तां किछ वगत तुहां सौगी बिताई लेंगा। 8पर मांह पिन्तेकुस्त त्योहारा तक इफिसुस नगरा च रैहणा। 9काँह्भई येत्थी प्रभावशाली कम्मा रे खातर मिन्जो सही मौका मिलीरा, पर मेरा बिरोध करने औल़े बौहत लोक ये।
10जे तिमुथियुस आईजो, तां देख्यां भई सै तुहांरे येत्थी निडर रौ; काँह्भई सै मेरे साई प्रभुये रा काम्म कराँ। 11इस खातर कोई तिस्सो नीच नीं जाणो, पर तिस्सो यात्रा खातर जो किछ जरूरी आ सै सारा किछ देईने भेजी देआं, ताकि सै मेरले आईजो; काँह्भई हऊँ तिसरा इन्तजार करीराँ भई सै साथी विश्वासियां सौगी आओ।
12हुण अहांरे साथी विश्वासी अपुल्लोसा रे बारे च: मैं तिसने बौहत विनती कित्ती भई तुहांले साथी विश्वासियां सौगी जाओ; पर तिन्हें इस बगता जाणे री किछ बी इच्छा नीं कित्ती, पर ताहली मौका औणा तां तिस आई जाणा।
आखरी हुक्म कने नमस्कार
13जागदे रौआं, विश्वासा च बणीरे रौआ, निडर बणा, विश्वासा च मजबूत रौआ। 14तुहें जो किछ कराँ ये प्यारा ने करा। 15साथी विश्वासियो तुहें स्तिफनुस रे घराने जो जाणाँ ये, भई सै अखाया प्रदेशा रे पैहले विश्वासी ये, कने पवित्र लोकां री सेवा रे खातर त्यार रैं। 16इस खातर साथी विश्वासियो हऊँ तुहांजो विनती कराँ भई येढ़यां अगुवेयां रे अधीन रौआ, सै जे मेहणत कराँ ये कने सही भगतिया ने सेवा कराँ ये। 17हऊँ खुश था ताहली जे स्तिफनुस कने फूरतूनातुस कने अखइकुस आये, काँह्भई तिन्हें तेरिया कमिया जो पूरा कित्तिरा। 18कने तिन्हें मिन्जो हौंसला दित्या तियां जे तिन्हें तुहांजो बी दित्या, इस खातर तुहौं येढ़यां लोकां रा आदर करना चाहिन्दा।
19आसिया प्रदेशा री कलीसियां रिया तरफा ते तुहांजो नमस्कार; अक्विला कने तिसरी जनाना प्रिस्का रा कने तिन्हांरे घरा रिया कलीसिया रा बी तुहौं प्रभुये च बौहत-बौहत नमस्कार! 20सब साथी विश्वासियां रा तुहांजो नमस्कार: गले लगीने अप्पूँ चियें नमस्कार करा। 21हऊँ पौलुस तुहांजो अपणे हत्था ते ये नमस्कार लिखां। जे कोई प्रभुये ने प्यार नीं रक्खो तां सै स्रापित हो। 22हे अहांरे प्रभु औ! 23प्रभु यीशुये रा अनुग्रह तुहां पर हुन्दा रौ। 24मसीह यीशुये च मेरा प्यार तुहां सब्बीं सौगी रौ। आमीन।
Currently Selected:
1 कुरिन्थियों 16: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
