1 कुरिन्थियों 3
3
कलीसिया च गुटबन्दिया री अलोचना
1मेरे साथी विश्वासियो, हऊँ तुहांजो तिसा रितिया ने गल्लां नीं करी सक्कया तियां जे आत्मिक लोकां ने हुआं इयां, पर तियां जे शरीरा रिया इच्छा रे मुतावक चलने औल़यां लोकां ने, कने तिन्हांने सै जे मसीह च छोट्टे बच्चयां साई ये। 2तिस वगत मैं तुहांजो परमेशरा रे बचना री सधारण शिक्षा दित्ति, तियां जे इक माहणु छोट्टे बच्चे जो पीणे रे खातर सिर्फ दुध देआं। मैं तुहांजो परमेशरा रे बचनां री गैहरी शिक्षा नीं दित्ति थी तियां जे कोई बच्चे जो खाणे रे खातर रोटी नीं देन्दा। काँह्भई तिस वगत तुहें येढ़ियां शिक्षां पाणे रे खातर त्यार नीं थे कने हकीकत च हुण तक बी तुहें त्यार नींये।
3काँह्भई तुहें हुण बी अपणे पापी स्वभावा रे मुतावक जींआं ये। हऊँ ये जाणाँ काँह्भई तुहां चते बौहत सारे हिरखल़े कने इक दूये ने लड़ां-झगड़ां ये, तां क्या ये साबित नीं करदा भई तुहें अपणे पापी स्वभावा रे मुतावक जी राँये? कने क्या तुहें इस संसारे रे लोकां साई नीं जीआ राँये?
4इस खातर भई ताहली जे इक बोलां, “हऊँ पौलुसा रा” कने दुज्जा बोलां, “हऊँ अपुल्लोसा रा,” तां क्या तुहें इस संसारे रे लोकां साई नीं जीआ राँये?
5तां फेरी पौलुस कुण आ? कने अपुल्लोस कुण आ? अहें सिर्फ परमेशरा रे सेवक ये तिन्हांरे जरिये जे तुहें विश्वास कित्या, तियां जे हर इक्की प्रभये रे जरिये सौंपी रिया जिम्मेवारिया जो निभाया। 6जे हऊँ इक्की बगीचे ने तुहांरी तुलना करूँ, तां हऊँ इक येढ़े माहणुये साई आ तिने जे ब्यू बाहया कने अपुल्लोसे पाणी दित्या, पर परमेशरे इसजो बधाया। 7इस खातर नां ब्यू बाहणे औल़ा खास आ कने नां पाणी देणे औल़ा खास आ, पर सिर्फ परमेशर इ खास आ सै जे ब्यूआ जो बधां।
8बाहणे औल़े कने पाणी देणे औल़े रा इक इ मकसद आ, पर दुईं जो अपणिया मेहणता रे मुतावक मजदूरी परमेशरा ते मिलणी। 9काँह्भई अहें दोन्नो इकट्ठे परमेशरा रे खातर काम्म कराँ ये; तुहें इक्की खेता साई ये सै जे परमेशरा रा कने तुहें इक्की मकान्ना साई ये तिसजो जे परमेशर बणाईराँ।
सिर्फ इक निऊँ
10तिसा योग्यता रे मुतावक सै जे परमेशरे मिन्जो अनुग्रह ने दित्ति, तिसरा इस्तेमाल करदे हुये मैं इक कुशल करीगरा साई निऊँ बणाई, कने दुज्जा कोई तिसा निऊँआ पर मकान बणाईराँ। पर हरेक माहणुये जो इसा गल्ला रा ध्यान रखणा चाहिन्दा भई सै तिस्सो कियां बणाईराँ। 11काँह्भई सै निऊँ जे पैहले ते पैईरी सै यीशु मसीह आ कने कोई तिस पर दुज्जी निऊँ होर नीं पाई सकदा।
12जे कोई माहणु इसा निऊंवा पर मकान बनाणे खातर सोना चान्दी या बड़ा कीमती पत्थर या लकड़ या घा या फूस इस्तेमाल कराँ, 13तां परमेशरा रे न्याय रे दिन अग्गी हर किसी रे कम्मा रा गुण परगट करना, जे माहणुये रे कम्मा रा कोई गुण आ तां आग्ग तिसजो दिखांगी।
14जे किसी रा बणीरा काम्म तिसा निऊँआ पर टिकिरा रैआं, तां तिस अपणा ईनाम पाणा। 15पर जे आग्ग किसी रा काम्म भस्म करी देंगी, तां तिस अपणा ईनाम खोई देणा; पर तिस अप्पूँ बची जाणा तियां जे कोई भड़कदिया अग्गी जो पार करीने बची जां।
16क्या तुहें नीं जाणदे भई तुहें परमेशरा रा मन्दर ये, कने परमेशरा रा आत्मा तुहां च वास कराँ। 17जे कोई परमेशरा रे मन्दरा जो नाश करगा तां परमेशरा तिसजो नाश करना; काँह्भई परमेशरा रा मन्दर पवित्र आ, कने सै मन्दर तुहें।
संसारिक ज्ञाना ते बचा
18कोई बी अप्पूँजो धोखा नीं देओ। जे तुहां चते कोई इस संसारा रियां गल्लां रे मुतावक अप्पूँजो ज्ञानी समझां, तां तिस्सो मूर्ख बणना चाहिन्दा ताकि सै ज्ञानी हुई सक्को। 19काँह्भई इस संसारा रा ज्ञान परमेशरा रिया नज़राँ च मूर्खता इ, तियां जे पवित्रशास्त्रा च लिखिरा,
“सै ज्ञानियां जो तिन्हांरी चतुराईया च फसाई देआं,”
20कने फेरी, “प्रभु जाणाँ भई ज्ञानियां रा बिचार बेकार आ।” 21इस खातर माहणुआं पर घमण्ड करना छडी दो भई अहांरा अगुवा दुज्जे ते जादा ज्ञानी आ, काँह्भई सब किछ तुहांरा इ हाया। 22क्या पौलुस, क्या अपुल्लोस, क्या कैफा, क्या संसार, क्या जीवन, क्या मरण, क्या वर्तमान, क्या भविष्य, सारा किछ तुहांरा इ हाया, 23कने तुहें मसीह रे, कने मसीह परमेशरा रा।
Currently Selected:
1 कुरिन्थियों 3: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
