1 कुरिन्थियों 2
2
क्रूसा पर चढ़ाईरे मसीह रे बारे च संदेश
1अरे विश्वासियो, ताहली जे हऊँ परमेशरा रा सन्देश सुणांदा हुआ तुहांले आया, तां मैं बड्डे शब्द इस्तेमाल नीं कित्ते कने अपणी शिक्षा रा प्रदर्शन नीं कित्या। 2काँह्भई मैं ये ठाणी लरा था भई तुहांरे बिच यीशु मसीह यनिके क्रूसा पर चढ़ाईरे मसीहे जो छड्डिने होर किसी गल्लां जो नीं सखाऊं।
3ताहली जे हऊँ तुहांरिया सौगी था तिस वगत मेरा शरीर कमजोर था, कने हऊँ डरा रिया वजह ने कम्बीग्या। 4मेरी शिक्षा, कने मेरे प्रचारा च माहणुये रे ज्ञाना री चलाकिया रियां गल्लां नीं थिआं, पर पवित्र आत्मे तुहां पर सामर्थी तरिके ने दस्या, 5इस खातर भई तुहांरा विश्वास माहणुआं रे ज्ञाना पर नीं, पर परमेशरा री सामर्था पर हो।
परमेशरा रा ज्ञान
6फेरी भीं परिपक्व विश्वासियां च अहें ज्ञाना रा सन्देश सणवांयें, पर इस संसारा रे हाक्मां रा ज्ञान नीं; सै जे नाश हुणे औल़े; 7पर अहें सै जे ज्ञान्ना रियां गल्लां दस्सां ये सै परमेशरा रा ज्ञान आ सै जे माहणुआं ते छिपिरा था, काँह्भई तिसजो जे परमेशरे संसारा जो बनाणे ते पैहले अहां रिया महिमा रे खातर तैह कित्या था। 8तिस्सो जे इस संसारा रे हाक्मां चते कोई बी नीं जाणी पाया, काँह्भई जे सै जाणदे, तां सै तेजोमय प्रभुये जो क्रूसा पर नीं चढ़ांदे। 9पर तियां जे पवित्रशास्त्रा च लिखिरा,
“सै गल्लां जे किन्हिये नीं देखियां कने किन्हिये नीं सुणियां,
कने सै जे अदभुत गल्लां किसी माहणुये नीं समझियां,
तिन्हौं परमेशरे अपणे प्यार रखणे औल़यां रे खातर त्यार कित्तिरा।”
10पर परमेशरे तिन्हांजो अपणे आत्मा रे जरिये अहां पर प्रगट कित्या, काँह्भई परमेशरा रा आत्मा सारियां गल्लां जो येत्थी तक भई परमेशरा रियां गुढ़ियां गल्लां री बी खोज कराँ। 11माहणुआं चते कुण किसी माहणुये रियां गल्लां जाणाँ, सिर्फ माहणुये रा अपणा आत्मा सै जे तिस चा? तियां इ परमेशरा रियां गल्लां बी कोई नीं जाणदा, सिर्फ परमेशरा रा आत्मा। 12पर अहें संसारा रा आत्मा नीं पाया, पर सै आत्मा पाया सै जे परमेशरा रिया तरफा तेआ ताकि अहें तिन्हां गल्लां जो जाणिये सै जे परमेशरे अहांजो मुख्ता त दित्तिरे।
13येई अहें माहणुये रे ज्ञाना ते सखाई रियां गल्लां च नीं, पर पवित्र आत्मा रियां सखाई रियां गल्लां च, आत्मिक गल्लां जो अहें आत्मिक शब्दां च सुणवांये।
14पर तिस माहणुये ले जे पवित्र आत्मा नींआ सै परमेशरा रे आत्मा रियां गल्लां ग्रहण नीं करदा, काँह्भई सै तिसरियां नज़राँ च मूर्खता रियां गल्लां इयां, कने सै तिन्हांजो नीं जाणी सक्कां, काँह्भई तिन्हांरी परख आत्मिक रितिया ने हुआं इ। 15पवित्र आत्मा पाईरा माहणु सब किछ परखां, पर तिसरी परख कोई नीं करी सकदा। 16तियां जे पवित्रशास्त्र बोलां, “काँह्भई कुण आ सै, तिने जे प्रभुये रा मन जाणील्या हो भई सै प्रभुये जो सखाई सक्को?” पर अहां च मसीह रा मन आ।
Currently Selected:
1 कुरिन्थियों 2: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
