1 कुरिन्थियों 4
4
मसीह रे प्रेरित
1तां माहणु अहौं मसीह रे सेवक कने परमेशरा रे भेतां रे भण्डारी समझो। 2हुण भण्डारियां ते ये आशा कित्ती जाईं भई सै बफादार हुणे चाहिन्दे।
3पर ये मेरे खातर मायना नीं रखदा जे मेरा न्याय तुहांरे जरिये कने माहणुआं रिया किसी अदालता रे जरिये हो, हकीकत च हऊँ खुद अपणा न्याय नीं करदा। 4काँह्भई मेरा अन्तरात्मा मिन्जो किसी गल्ला च इल्जाम नीं लगान्दा, पर इसते हऊँ निर्दोष नीं ठैहरदा, काँह्भई प्रभु इ हाया सै जे मेरा न्याय कराँ।
5इस खातर तदुआं तकौ जे प्रभु नीं आओ, बगता ते पैहले किसी गल्लां रा न्याय नीं करा, सैई अन्धेरे रियां छिपि रियां गल्लां जो लोई च दसगा, कने माहणुये रे दिला रियां गल्लां जो प्रगट करगा, तां तिस वगत हरेक माहणुये परमेशरा रिया तरफा ते अपणी प्रशंसा पाणी।
मसीह रे खातर मूर्ख
6अरे साथी विश्वासियो, मैं इन्हां गल्लां च तुहांरिया भलाईया रे खातर अपणी कने अपुल्लोसा री चर्चा इक उदाहरणा साई पेश कित्ती, ताकि तुहें लिखी रियां गल्लां रा मतलब अहांते सिक्खी सक्को, “लिखी रियां गल्लां ते बधीने जादा अग्गे नीं जाओ।” फेरी तुहां इक्की माहणुये पर घमण्ड नीं करना कने दुज्जे जो नीच नीं जाणना। 7काँह्भई किसी माहणुये तुहौं दुज्यां ते जादा खास नीं बणाया कने सै किछ जे तेरले आ सै तिज्जो परमेशरे दित्तिरा। कने तंजे तिज्जो मिलीरा, तां अपणे बारे च घमण्ड करना तेरे खातर ठीक नींआ।
8तुहांजो लगां भई तुहें लोक तृप्त हुई चुक्कीरे, तुहें अमीर हुईगरे, तुहें अहांते बगैर राजे बणी चुक्कीरे; पर अच्छा हुंदा भई तुहें सच्चीजो राजा बणी जान्दे ताकि अहें बी तुहां सौगी राजा बणी जान्दे। 9मिन्जो येढ़ा लगां भई परमेशरे अहां प्रेरितां जो जलूसा च मौती री सजा पाईरे माहणुये साई सब्बीते आखिरी जगह च रखीरा। अहें सारे संसार, स्वर्गदूतां कने माहणुआं रे सामणे इक तमाशा बणीगरे।
10इस संसारा रे लोक सोच्चां ये भई अहें मसीह रे खातर मूर्ख ये, पर तुहें सोच्चां ये भई तुहें मसीह च बुद्धिमान ये; बौहत लोक सोच्चां ये भई अहें निर्बल ये, पर तुहें सोच्चां ये भई तुहें बलवान ये, तुहौं लोक आदर दें, पर सै अहांरा निरादर कराँ ये। 11अहें अज्जा तकौ भूखे, त्याये, कने फटे पुराणे कपड़े पैहनां ये, कने मार खांये, कने बेघर रैं; 12कने अहें अपणे हात्थां ने अप्पूँ मेहणत कराँ ये। ताहली जे लोक अहांजो गाल़ी दें, तां अहें तिन्हांजो आशीष देआंये; ताहली जे लोक अहांजो सतायें, तां अहें सही लैं। 13ताहली जे लोक अहांजो बदनाम कराँ ये, तां अहें विनम्रता ने जबाब दें। लोक हुण बी अहांने येढ़ा बर्ताव कराँ ये मन्नो अहें संसारा रा कचरा कने समाजा रा कूड़ा कचरा ये।
चेतावनी
14ये सारा किछ हऊँ तुहांजो शर्मिन्दा करने खातर नीं लिखिराँ, पर अपणे प्यारे बच्चे समझीने तुहांजो चेतावनी देआं। 15काँह्भई जे मसीह च तुहांरे सखाणे औल़े दस हजार बी हुंदे, तां बी तुहांरे बौहत पिता नींये; काँह्भई मसीह यीशु च खुशखबरिया रे जरिया हऊँ तुहांरा पिता हुया। 16इस खातर हऊँ तुहांजो विनती कराँ भई मेरे साई चाल चला। 17इस खातर मैं तिमुथियुसा जो तुहांले भेज्जी राँ, सै जे मेरा प्यारा पुत्र कने प्रभुये च बफादार पुत्र आ। तिस तुहांजो मसीह च मेरा चरित्र याद दिलाणा, तियां जे हऊँ हर जगह हरेक कलीसिया च उपदेश देआं।
18तुहां चते किछ लोक ये सोच्चीने घमण्ड कराँ ये भई मांह होर तुहांले नीं औणा। 19पर प्रभुये चाहया तां माह तुहांले बौहत इ छोड़े औणा, तां फेरी नां सिर्फ तिन्हां घमण्डी लोकां रिया शिक्षा, पर तिन्हां रिया सामर्था जो बी जाणी लेन्गा। 20काँह्भई परमेशरा रा राज गल्लां च नीं पर सामर्था चा। 21तुहें क्या चांये? क्या हऊँ डन्डा लईने तुहांले आऊं, या प्यार कने नम्रता रिया आत्मा सौगी?
Currently Selected:
1 कुरिन्थियों 4: KFSNT
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
