जकर्याह 5
5
उडरने बाले चर्मपेत्रारू दर्शन
1अवं फिरी तकने लगो ते कुन हेरताईं कि अक लिखोरो चर्मपत्र उडरी राहोरोए। 2दूते मीं पुछ़ू, “तीं कुन लेइहोते?” मीं ज़ोवं, “मीं अक लिखोरो चर्मपत्र लेइहोते, ज़ैसारी लम्बाई 20 हथ ते चौड़ाई 10 हथ्थे।” 3तैखन तैनी मीं सेइं ज़ोवं, “ई तै श्रापे ज़ै सारे मुल्खे पुड़ पेने बालोए; किजोकि ज़ै कोई च़ोरी केरते, तै तैसेरे एक्की पासे लिखोरे मुताबिक मैलेरो ज़ेरो कढो गालो; ते ज़ै कोई कसम खाते, तै तैसेरे होरि पासे लिखोरे मुताबिक मैलेरो ज़ेरो कढो गालो।#गिन. 5:23-28;व्यव. 28:15-68;यहे. 2:9-10. 4सेना केरो यहोवा एन ज़ोते, अवं तैस एन्च़रे च़लेइलो कि तै च़ोरेरे घरे मां ते मेरे नव्वेंरी झूठी कसम खाने बालेरे घरे मां एन्च़रे घुसी गालो, ते तै तैस घरेरी लकड़ी ते घोड़न समेत नष्ट केरतां छ़डेलो।”
एपा मां बिशोरी कौन्शरे बारे मां दर्शन
5तैखन ज़ै दूत मीं सेइं गल्लां केरतो थियो, तैनी बेइर गेइतां मीं सेइं ज़ोवं, “एपनी एछ़्छ़ी घैड़तां हेर कि कुन चीज़ निस्सी राहोरीए?” 6मीं पुछ़ू, “उन कुने?” तैनी जुवाब दित्तो? “ऊ चीज़े ज़ै निस्सी राहोरीए, तै अक एपारी नापे।” ते तैनी फिरी ज़ोवं, “सारे मुल्खे मां लोकां केरो एहे पापे।” 7फिरी मीं कुन लावं कि एपारू शीशेरू ढकन खड़ू लगोरू भोने, ते अक कौन्शे ज़ै एपा मां बिशोरीए। 8दूते ज़ोवं, “एसेरो मतलब बुराई आहे।” ते तैनी तै कौन्श तैस टोकरी मां दबेइ छ़डी, ते शीशेरे ढकने सेइं एपारू बिल बन्द केरतां छ़डू। 9तैखन मीं एछ़्छ़ी खेड़ि की, ते कुन हेरताईं कि मेरे सामने दूई कौन्शां थी ते तैन केरि पैखड़न मां हवा भरोरी थी, ते तैन केरि पेखड़ी सारसेरी ज़ेरि थी, ते तैनेईं तैना एपा अम्बर ते धेरतरे मझ़ाटे उडैरतां च़लेवरिन। 10तैखन मीं तैस दूते सेइं ज़ै मीं सेइं गल्लां केरतो थियो, पुछ़ू, “तैनेईं एपा कोरहां च़लेवरोए?” 11तैनी ज़ोवं, “शिनार मुल्खे जो च़लेवरोए कि तैड़ी तैसेरे लेई अक भवन बनान; ते ज़ैखन तै तियार कियो गाए, तैखन तै एपा तैड़ी एपनी जगाई पुड़ रख्खो गाए।”#उत्प. 11:2.
Currently Selected:
जकर्याह 5: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
