जकर्याह 4
4
दीवट ते ज़ैतूनेरो बुट
1ज़ै दूत मीं सेइं गल्लां केरतो थियो, तैनी एइतां अवं एन्च़रे बींझ़ाव ज़ेन्च़रे कोई निड्ली मरां बींझ़ावरो भोए। 2ते तैनी मीं पुछ़ू, “तीं कुन लेइहोते?” मीं जुवाब दित्तो, “अक दीयोए, ज़ै खालिस सोन्नेरोए, ते तैसेरो तेलेरो कुटोरो तैसेरी च़ोटी पुड़े, ते तैस पुड़ तैसेरे सत दीये आन; ज़ैन पुड़ बह बेत्ती केरे लेई सत-सत नैलीन।#प्रका. 1:12;4:5. 3दीवटे कां ज़ैतूनेरे दूई बुट्टन, अक तैस कुटोरेरे देइने पासे ते होरो तैसेरे बांए पासे।” 4तैखन मीं तैस दूते सेइं ज़ै मीं सेइं गल्लां केरतो थियो, पुछ़ू, “हे मेरे मालिक एन कुने?” 5ज़ै दूत मीं सेइं गल्लां केरतो थियो, तैनी मीं जुवाब दित्तो, “कुन तू एन न ज़ानतस कि एन कुने?” मीं जुवाब दित्तो, “हे मेरे मालिक अवं न ज़ैनी।” 6तैखन तैनी मीं जुवाब देइतां ज़ोवं, “जरुब्बाबेलेरे लेई यहोवा एन ज़ोते; न त ज़ोरे सेइं, ते न शेक्ति सेइं, पन मेरी आत्मारे ज़िरिये सेइं भोल्हु, अवं सेना केरो यहोवा एन ज़ोताईं। 7हे बड्डे पहाड़, तू कुन आस? जरुब्बाबेलेरे सामने तू मैइदान भोइ गालू; ते तै भवनेरो खास घोड़ एन फुकारतो एज्जेलो, तैस पुड़ अनुग्रह भोए, अनुग्रह भोए!” 8फिरी यहोवा मीं सेइं ज़ोवं, 9“जरुब्बाबेले अपने हथेइं सेइं इस भवनेरी मुनीयाद रख्खोरीए, ते तैए अपने हथेइं सेइं तैस तियार भी केरेलो। तैखन तीं पतो लग्गेलो कि सेना केरे यहोवा अवं तुसन कां भेज़ोरोईं। 10दूते ज़ोवं, किजोकि केनी निकड़ी गल्लां केरि दिहाड़ी घटिया समझ़ोरीए? यहोवा एपनी एना सत्ते एछ़्छ़ेईं सेइं सैरी ज़मीनी पुड़ नज़र केरतां साहली जरुब्बाबेलेरे हथ्थे मां देलो, ते खुशी भोल्हो।” 11तैखन मीं तैस फिरी पुछ़ू, “एना दूई ज़ैतूनेरे बुट कुन आन ज़ैना दीवटेरे देइने ते बांए पासेन?” 12फिरी मीं दूइयोवं बार तैस पुछ़ू, “ज़ैतूनेरे दूईये डाल कुन आन ज़ैना सोन्नेरी दूईये नैली केरे ज़िरिये एप्पु मरां ज़ैतूनेरो तेल उलटैतिन?” 13तैनी मीं सेइं ज़ोवं, “कुन तू न ज़ानस कि एन कुने?” मीं ज़ोवं, “हे मेरे मालिक, अवं न ज़ैनी।” 14तैखन तैनी ज़ोवं, “एसेरो मतलबे ताज़े तेले सेइं भेरतां तैना दूई मैन्हु आन ज़ैना सैरी धेरतरे परमेशरे कां हाज़र रहतन।”
Currently Selected:
जकर्याह 4: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
