जकर्याह 3
3
प्रधान याजकेरू दर्शन
1यहोवा एक्की होरि दर्शने मां मीं हिरावं कि यहोशू प्रधान याजक यहोवारे दूतेरे सामने खड़ोए, ते शैतान तैसेरे देइने पासे तैसेरी बगावत केरनेरे लेई खड़ो थियो। 2तैखन यहोवाए शैताने सेइं ज़ोवं, “हे शैतान अवं तीं झ़िड़कताईं!#3:2 हे शैतान अवं तीं झ़िड़कताईं! इब्रानी मां यहोवा तीं झ़िड़के। यरूशलेम मेरू नगरे, अवं तीं झ़िड़कताईं! कुन एन अग्गी मरां निस्सोरू मोछ़ोवं नईं?” 3तैस मौके यहोशू मेलां लिगड़ां लेइतां दूतेरे सामने खड़ो थियो। 4तैखन दूते ज़ैना तैसेरे सामने खड़े थिये ज़ोवं, “एसेरां एना मेलां लिगड़ां खोल्ला।” फिरी तैनी तैस सेइं ज़ोवं, “हेर, मीं तेरो अधर्म दूर कियोरोए, ते अवं तीं रोड़ां लिगड़ां#3:4 रोड़ां लिगड़ां याजकेरां लिगड़ां लुवेइलो।” 5तैखन मीं ज़ोवं, “यहोशूएरे दोग्गे पुड़ शुद्ध साफो बन्धा।” ते तैनेईं तैसेरे दोग्गे पुड़ याजकेरे काबल शुद्ध साफो बन्धो, ते तैस लिगड़ां भी लुवां; तैस मौके यहोवारो दूत साथी खड़ो राव।
एजनेबाली शाख
6तैखन यहोवारे दूते यहोशू खबरदार केरतां ज़ोवं, 7“सेना केरो यहोवा तीं सेइं एन ज़ोते; अगर तू मेरी बत्तन पुड़ च़लेलो, ते ज़ैन किछ मीं तीं सौंफतां दित्तोरूए तैसेरी हिफाज़त केरेलो, त तू मेरे भवनेरो न्यायी ते मेरे भवनेरे अंगना केरो रक्षक भोल्हो; ते अवं तीं एन केरे मझ़ाटे एजने-गाने देइलो ज़ैना साथी खड़ेन। 8हे यहोशू प्रधान याजक, तू शुन, ते ज़ैना तेरे साथी याजक ज़ैना तेरे सामने खड़े आन तैना भी शुन्न, किजोकि तैना मैन्हु रोड़े वक्ते हेरतन: शुना, अवं अपने दासेरी शाखी बांदो केरेलो। 9उस घोड़े हेर ज़ै मीं यहोशूएरे सामने रखोरोए, तैस एक्की घोड़े पुड़ बह सत एछ़्छ़ी बेनोरिन, सेना केरो यहोवा एन ज़ोते, हेर अवं तैस घोड़े पुड़ घड़ाई केरताईं, ते इस मुल्खेरे अधर्मे सिर्फ एक्की दिहाड़े माफ़ केरेलो। 10तैस्से दिहाड़े तुसां अपने भियालन दाछ़रे बुट्टे ते फैगेरे बुट्टे हैठ जो कुजाले, सेना केरो यहोवा एन ज़ोते।”
Currently Selected:
जकर्याह 3: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
