जकर्याह 2
2
नापनेरी डोरारू दर्शन
1फिरी मीं होरू दर्शन लावं, ते कुन हेरतां कि अक मैन्हु हथ्थे मां नापनेरी डोरी ट्लेइतां आहे। 2तैखन मीं तैस पुछ़ू, “तू कोरहां च़लोरोस?” तैनी जुवाब दित्तो, “यरूशलेम नापनेरे लेई च़लोरोईं कि तैस हेरी कि तैसेरी लम्बाई चौड़ाई केत्रीए।”#प्रका. 21:15. 3तैखन मीं कुन लावं कि ज़ै दूत मीं सेइं गल्लां केरतो थियो तै च़लो जेव ते होरो दूत तैस सेइं मिलनेरे लेई एइतां, 4पेइले दूते सेइं ज़ोने लगो, “दौड़तां गा ते उस जुवाने सेइं ज़ो, ‘यरूशलेम मैन्हु केरि जादे आबादी भोनेरे वजाई सेइं ते पैलतू जानबरां केरि वजाई सेइं शहरपनाहेरे बेइर भी बस्सेलू। 5ते यहोवा एन ज़ोते, कि अवं एप्पु तैसेरे च़ेवरे पासन अग्गरी शहरपनाह बनेइलो, ते अवं तैसेरे दरमियान महिमा बालो भोइतां लेइहोलो।’”#निर्ग. 13:21-22;यशा. 4:5.
सिय्योन ते सारे मुल्खां केरो एजनेबालो आनन्द
6यहोवा अपने लोकन सेइं एन ज़ोते, “शुना, बाबेलेरे मुल्खेरे उत्तरे मरां नेश्शी गाथ, किजोकि मीं तुसां च़ेवरे पासन तितर-बितर कियोरेथ। 7हे बाबेलेरे लोकन सेइं साथी रानेबाली, सिय्योने मरां बेच़तां नेश्शी गा! 8किजोकि सेना केरो यहोवा एन ज़ोते, तैस महिमारे बांदे भोनेरां बाद तैनी अवं तैन कौमन कां भेज़ोरोईं ज़ैना तुसन लुटती थी, किजोकि ज़ै तुसन सेइं हुरते, तै मेरी एछ़्छ़री पुतली सेइं हुरते। 9हेरा, अवं तैन पुड़ अपनो हथ खड़ो केरेलो, तैखन तैना तैन्ने करां लुट्टे गाले ज़ैना तैन केरे गुलाम बनोरे थिये। तैखन तुसन पतो लग्गेलो कि सेना केरे यहोवा अवं नबी केरतां भेज़ोरोईं। 10हे सिय्योनेरी कुइये#2:10 सिय्योनेरी कुइये यरूशलेम नगरेरे लोक, उच्ची आवाज़ी सेइं गीतां ज़ो ते आनन्द केर किजोकि हेर अवं एइतां तेरे मझ़ाटे रेइयां केरेलो यहोवा एन ज़ोते।#सप. 3:14. 11तैस मौके बेड़ि कौमां यहोवारे लोक भोइ गाले, ते मेरे लोक भोइ गाले ते अवं तेरे दरमियान बास केरेलो, 12ते तीं पतो लग्गेलो कि सेना केरे यहोवा अवं तुसन कां भेज़ोरोईं। ते यहोवा यहूदा पवित्र प्रदेशे मां अपनो हिस्सो बनेइलो, ते यरूशलेम नगरे फिरी अपनो बनालो।
13“हे सारे लोकव! यहोवारे सामने च़ुप राथ; किजोकि तै खड़ो भोइतां एपनी पवित्र ठारी पुड़ेरां निसोरोए।”
Currently Selected:
जकर्याह 2: BHDNT
Highlight
Share
Compare
Copy
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
