रोमियो 14

अपने ढ्लान पुड़ दोष न लाथ

1ज़ै विश्वासे मां कमज़ोरे, तैस तुस कबूल केरा, पन तैस कुन कियेरू लोड़े ते कुन न लोड़े कियेरू तैस पुड़ बेंस केरनेरे लेई नईं। 2किजोकि एक्‍की विश्वासे, कि सब किछ खानू जाइज़े, पन ज़ै विश्वासे मां कमज़ोरे, तै सिर्फ शागां खाते। 3सब किछ खाने बालो तैस पुड़ दोष न लाए ज़ै सब किछ न खाए, किजोकि परमेशरे तैना दूईये कबूल कियोरेन। 4तू कौन आस ज़ै होरेरे नौकरे पुड़ दोष लातस? तैनी भलू कियूं या बुरू इसेरो फैसलो तैसेरो मालिके केरेलो, बल्के तै कामयाब भोल्हो; किजोकि प्रभु तै इस काबल बनेवरोए।

5एन्च़रे किछ लोक एक्‍की दिहाड़ी होरि करां बेद्धतां मनतन, ते किछ सब दिहाड़े बराबर मनतन, हर केन्ची इन याकीन कियेरू लोड़े कि ज़ैन तैना सोचतन तैन ठीके। 6ज़ै कोन्ची दिहाड़े मन्ते, तै प्रभुए इज़्ज़त देनेरे लेई मन्ते। ज़ै सब किछ खाते, तै भी प्रभुए इज़्ज़त देनेरे लेई खाते, किजोकि तै परमेशरेरू शुक्र केरते, ते ज़ै सब किछ न खाए, प्रभुएरे लेई न खाए ते परमेशरेरू शुक्र केरते। 7किजोकि असन मरां कोई न अपने लेई ज़ींते, ते न कोई अपने लेई मरते। 8किजोकि अगर अस ज़ींतेम त, प्रभुएरे लेई ज़ींतेम; ते अगर अस ज़ींम या मरम, अस प्रभुएरेम। 9किजोकि मसीह एल्हेरेलेइ मरो ते ज़ींतो भी भोव, ताके मर्रोरे ते ज़ींतां दूईयां केरो प्रभु भोए।

10तू अपने विश्वासी ढ्लाए पुड़ किजो दोष लातस? या तू फिरी किजो अपने विश्वासी ढ्लाए घटिया समझ़तस? अस सब परमेशरेरे आदालतरे तखतेरे सामने खड़े भोनेम। 11ज़ेन्च़रे पवित्रशास्त्रे मां लिखेरूए,

कि प्रभु ज़ोते, “अवं एप्पू तुसन सेइं वाधो केरताईं,

हर कोई मीं कां ज़ैधू टेकेलो,

ते हर अक ज़िभ परमेशरेरी इकरार केरेली।”

12ते असन मरां हर केन्ची अपने-अपने कम्मां केरो लेखो परमेशरे देलो पेनोए।

अपने ढ्लाएरे लेई ठोकर नईं बन्नू

13एल्हेरेलेइ अग्रोवं जो अस एक्‍की होरि पुड़ दोष न लाम, पन तुस एने थापा, कि कोई भी तुश्शे वजाई सेइं तुश्शो विश्वासी ढ्ला या बेइन पाप न केरे। 14अवं ज़ानताईं, ते प्रभु यीशुएरे तरफां मीं पक्‍कू याकीन भोवं, कि कोई खानेरी चीज़ अपने आपे सेइं अशुद्ध नईं, पन ज़ै तैस अशुद्ध समझ़ते, तैसेरेलेइ अशुद्धे। 15अगर तेरो विश्वासी ढ्लाए या बेइन तेरे खाने सेइं दुख पुज़े ते तै अग्रोवं जो परमेशरे पुड़ विश्वास केरनो शारे, त फिरी तू प्यारेरे रीति पुड़ न च़लस, एरी चीज़ां न खा। ज़ेसेरे लेई मसीह मरो ते तू अपने खाने सेइं तैस नाश न केर। 16एल्हेरेलेइ ज़ैन कम तुश्शे लेई रोड़ूए ते जाइज़े, तैसेरे बारे मां होरन तुहीन केरनेरो मौको न दे। 17किजोकि परमेशरेरे राज़्ज़े मां खानू पीनू माईने न रख्खे; माईने रखते धार्मिकतारी ज़िन्दगी ज़ींनी ते मेल मलाप, ते तै आनन्द ज़ै पवित्र आत्मा देते। 18ज़ै कोई इस रीति सेइं मसीहेरी सेवा केरते, तैस सेइं परमेशरे खुशी भोते, ते मैन्हु भी तैसेरे बारे मां रोड़ू ज़ोतन। 19एल्हेरेलेइ असेईं तैना कम्मां कियोरां लोड़न ज़ैन सेइं लोक मेल मिलापे सेइं रेइ बटन, ते एक्‍की होरि विश्वासे मां मज़बूत केरम। 20तुस ज़ेरू खानू चातथ तैसेरे वजाई सेइं परमेशरेरू कम न बगाड़ा। सब किछ शुद्ध त आहे, पन तुश्शे खाने सेइं अगर होरो कोई मैन्हु परमेशरे पुड़ विश्वास केरनो शारे त तैसेरेलेइ बुरूए। 21रोड़ू त इन्ने, कि तू न मास खास, ते न शराब पीस, ज़ेसेरे वजाई सेइं तेरे ढ्ला या बेइन पाप केरन। 22तेरो इन चीज़ां केरे बारे मां ज़ै विश्वासे, तै तेरे ते परमेशरेरे दरमियाने मांए, धने तैए, ज़ै तैस गल्‍ली मां, ज़ै तै ठीक समझ़े, अपने आपे दोषी न ठहराए। 23पन ज़ै शक केरतां खाते, तै सज़ाहरे काबल भोइ जेव, किजोकि तै विश्वासे सेइं न खाए, ते ज़ैन किछ केरस ते विश्वास केरस कि एन ठीक नईं त तू पाप केरतस।

Currently Selected:

रोमियो 14: BHDNT

Highlight

Copy

Compare