रोमियो 13

अधिकैरी लेई फर्ज़

1हर कोई मैन्हु प्रधान अधिकैरी केरे अधीन राए; किजोकि कोई अधिकार एरो नईं, ज़ै परमेशरेरे तरफां न भोए; ते ज़ैना अधिकारी आन, तैना परमेशरे ठहरावरेन। 2एल्हेरेलेइ ज़ै कोई अधिकैरी केरि खलाफत केरते, तै परमेशरेरे कानूनेरी खलाफत केरते, ते ज़ैना लोक परमेशरेरे कानूनेरी खलाफत केरतन तैन सज़ाह मैल्‍लनीए। 3किजोकि हेरा हाकिम तैस मैन्हु ज़ै भलियाई केरते तैस न डराए, पन तैस मैन्हु डराते ज़ै बुरू कम केरते। अगर तुस हाकिमे करां डरनू न चाथ त भलियाई केरते राथ ते तुसन हाकिमे करां शाबाश मैल्हेली 4हाकिम परमेशरेरो सेवके ते तेरू भलू केरनेरे लेई आहे, पन अगर तू बुराई केरस, त तू डर, किजोकि तैस कां तलवार बेफैइदी नईं, ते तै परमेशरेरो सेवके; ज़ै बुरू कम केरनेबाले पुड़ कोप आनते। 5एल्हेरेलेइ हाकिमेरे लेई तुश्शू समर्पण ज़रूरीए न सिर्फ परमेशरेरे सज़ाहरे वजाई सेइं बल्के तुश्शे अपने ज़मीरेरे वजाई सेइं। 6एल्हेरेलेइ धड़त भी देतथ, किजोकि हुकूमत केरनेबाले परमेशरेरे सेवकन, ते सदा एस्से कम्मे मां लग्गोरो रहतन। 7एल्हेरेलेइ हर केन्चेरू हक देथ, ज़ेसेरी धड़त बनतीए तैस धड़त देथ; ज़ेसेरी चुंगी बनतीए तैस चुंगी देथ; ज़ेसेरी इज़्ज़त ते आदर कियोरी लोड़े तैसेरी इज़्ज़त ते आदर केरा।

एक्‍की होरि सेइं प्यार

8एप्पू मांमेइं प्यारेरे अलावा ते केन्ची गल्‍ली मां कोन्ची चीज़रे कर्ज़दार न राथ; किजोकि ज़ै होरन सेइं प्यार केरते, तैने परमेशरेरे दित्तोरे कानूनेरे हुक्म पूरे किये। 9किजोकि मूसेरे कानूने मां बड़े हुक्म दित्तोरेन ज़ेन्च़रे कि, “बदमाशी न केर, कत्ल न केर, च़ोरी न केरा, लालच़ न केर,” ते एन केरे अलावा होरो कोई भी हुक्म भोए त तैन सैरी केरि बुनीयाद इस्से गल्‍ली मांए, “अपने पड़ोसी सेइं अपने बराबर प्यार केर।” 10प्यार पड़ोसेरी किछ भी बुराई न केरे, एल्हेरेलेइ ज़ै प्यार केरते तै परमेशरेरो दित्तोरो कानून पूरे केरते।

11एल्हेरेलेइ वक्त पिशैनतां इन केरा। तुश्शे लेई निड्ली मरां बींझ़नेरो वक्त एवरोए, किजोकि ज़ैस वक्ते असेईं विश्वास कियोरो थियो, तैस वक्तेरे खियाले सेइं हुनी इश्शी मुक्ति नेड़ीए। 12इस बुरे दुनियाई मां रानेरो इश्शो वक्त लगभग खतम भोवरोए, ज़ेन्च़रे रात ट्लेकड़ोने बालीए, ते लौ भोनेबालीए ते मसीहेरो वापस एजनेरो वक्त नेड़े एवरोए, एल्हेरेलेइ असां तैना कम्मां शारम ज़ैना लोक आंधरे मां केरतन ते तैना हथियार बन्धम ज़ैना लौई मां इस्तेमाल भोतन। 13एल्हेरेलेइ अस भी तैन लोकां केरो ज़ेरो बर्ताव केरम, ज़ैना लौई मां ज़िन्दगी ज़ीतन न कि आंधरे मां, न कि नच़ने, नशो केरने, न बदमाशी केरने मां, ते लुचपने, लड़ैई, ते जलनी मां मसत भोम, 14बल्के ज़ेन्च़रे प्रभु यीशु मसीहे ज़ीवं तेन्च़रे तुस भी ज़ीथ, ते जिसमेरी खुवैइशां पूरी केरनेरी कोशिश न केरा।

Currently Selected:

रोमियो 13: BHDNT

Highlight

Copy

Compare