यशायाह 56

गैर कौमां केरे लेई छुटकारो

1यहोवा अपने लोकन सेइं एन ज़ोते, “सेभी लोकन सेइं न्याय केरा, ते धार्मिकतारू कम केरा; किजोकि अवं लूशी तुश्शो छुटकारो केरेलो, ते मेरू धर्मी भोनू जल्दी बांदू भोल्हु। 2धने तै मैन्हु ज़ै एन्च़रे केरते, ते तै मैन्हु ज़ै एस पुड़ कायम रहते, ज़ै थैकरी दिहाड़ी पवित्र मन्ते ते अपवित्र केरने करां बेंच़तां रहते, ते अपने हथ्थन हर किसमेरी बुरैई करां रोकतां रखते।”

3ज़ैना परदेशी यहोवा पत्ती च़लतन, तैना न ज़ोन, “असन यहोवा सच़्च़े अपने लोकन मरां अलग केरेलो;” ते खोजे भी न ज़ोन “अस त शुक्‍कोरे बुट अहम।” 4किजोकि ज़ैना खोजे मेरे आरामेरे दिहाड़े मनतन ते ज़ैस गल्‍ली सेइं अवं खुशी भोताईं तैस्से अपनातन ते मेरो करार मनतन, तैन केरे बारे मां यहोवा एन ज़ोते, 5“अवं अपने भवन मां ते एपनी शहरपनाही मां अन्तर एरू नवं देइलो; ज़ैन मट्ठन ते कुइयन करां खास भोल्हु; अवं तैन केरू नवं सदा बनेइतां रखेलो ते तैन कधी न मिटवं गालू।

6“परदेशी लोक भी ज़ैना यहोवा सेइं मिलाप रखतन; ताके तैसेरी सेवा केरन, ते तैसेरे नंव्वे सेइं प्यार केरन ते तैसेरे दास बन्न; ज़ेत्रे आरामेरे दिहाड़े अपवित्र केरने करां बच़ोरे रहतन ते मेरे करारे मनतन, 7तैन सेभन अवं अपने पवित्र पहाड़े#56:7 पवित्र पहाड़े सिय्योन पहाड़े पुड़ अपने प्राथनारे भवने मां खुश केरेलो; ते तैन केरि होमबलि ते मेलबलि मेरी वेदी पुड़ कबूल की गैली, किजोकि मेरे भवने जो सेभी मुल्खां केरे लोकां केरे लेई प्राथनारू घर ज़ोले।#मला. 1:11;मरक. 11:17;1 पत. 2:5. 8प्रभु यहोवा ज़ै कढोरे इस्राएली लोकन जम्हां केरनेबालोए, तै एन ज़ोते, कि ज़ैना अकोट्ठे किये जेवरेन तैन सेइं साथी अवं होरन भी अकोट्ठे केरतां मिलेइलो।”

इस्राएलेरे गैर ज़िमेवार अगुवे

9हे मैइदानेरे सब जीपव, ते हे जंगलेरे सब जानबरव खानेरे लेई एज्जा।#56:9 मतलब इस्राएलेरे दुश्मन 10इस्राएलेरे सारे पहरदार काने आन, तैना सब अज्ञानी आन, तैना सब लट्टे कुतरन ज़ैना घुक्‍की न सखन; तैना सब बिश्शोरे सुपना हेरतन, ते तैन निड्ल बड़ी ट्लारीए। 11तैना ढ्लुखोरां कुतरन; ज़ैना कधी न रज़्ज़न, तैना पुहाल आन ज़ैना मां समझ़ नईं। तैन सेभेइं अपने-अपने फैइदेरे लेई अपनि-अपनि बत ट्लावरीए। 12तैना एक्‍की होरि सेइं ज़ोतन, “एज्जा असां, शराब आनम, एज्जा असां पीतां मसत भोम; ते कालां भी अज़्ज़ेरे ज़ेरे भोमेले, बल्के एस करां भी रोड़ो आनन्द केरमेले।”#लूक. 12:19-20;1 कुरि. 15:32.

Currently Selected:

यशायाह 56: BHDNT

Highlight

Copy

Compare