उत्पत्ति 45

यूसुफ अपनो आप बांदो केरते

1तैखन यहूदेरी गल्‍लां शुन्ते यूसुफे तैना सब, ज़ैना तैसेरे आसे-पासे खड़े थिये, अपने आपे तै रोकी न बटो; ते ज़ोरे सेइं ज़ोवं, “मेरे आसे पासेरां सेब्भी मैन्हन बेइरोवं कढा।” ढ्लान कां अपनो आप बांदो केरनेरे मौके यूसुफे सेइं साथी होरो कोई न थियो। 2तैखन तै चिन्डां मैरतां लेरां लगो देने; ते मिस्रेइं भी शुनू, ते फ़िरौनेरे घरेरे लोकन भी एस गल्‍लरो पतो लगो। 3तैखन यूसुफ अपने ढ्लान सेइं ज़ोने लगो, “अवं यूसुफ आईं, कुन मेरो बाजी हुन्ना तगर भी ज़ींतोए?” तैसेरो जुवाब तैसेरे ढ्ला न देइ बटे; किजोकि तैना तैसेरे सामने डेरि जेवरे थिये। 4फिरी यूसुफे अपने ढ्लान सेइं ज़ोवं, “मेरे नेड़े एज्जा।” एन शुन्तां तैना नेड़े जे। फिरी तैनी ज़ोवं, “अवं तुश्शो ढ्ला यूसुफ आईं, ज़ै तुसेईं मिस्रे जो एजनेबालन जो बेच़ोरो थियो। 5हुनी तुसां लोक पसताथ न, ते तुसेईं अवं ज़ै इड़ी बेच़ी छ़डोरो थियो, एस सेइं परेशान न भोइयथ किजोकि परमेशरे तुश्शे प्राण बच़ांनेरे लेई अवं तुसन अग्री-अग्री भेज़ोरोईं। 6किजोकि हुना इड़ी दूई सालां केरो देंतो काल पेवरोए, ते हेजू पंच़ साल एन्च़रे काल भोनोए, एसमां न हल लग्गेली, ते न अन्न पैदा भोल्हु। 7एल्हेरेलेइ परमेशरे अवं तुसन तुश्शे अग्री-अग्री एल्हेरेलेइ भेज़ोरोईं कि तुस धेरती पुड़ ज़ींते राथ, ते तुश्शे प्राण बच़ने सेइं तुश्शू खानदान अग्रोवं बधे। 8एल्हेरेलेइ हुनी मीं इड़ी भेज़ने बाले तुस नईं, बल्के परमेशरे, अवं फ़िरौनेरे बाजी केरो ज़ेरो ते तैसेरे घरेरो मालिक ते सारे मिस्रेरो प्रभु बनेवरोइं। 9ते लूशी मेरे बाजी कां गेइतां ज़ोथ, कि तुश्शू मट्ठू यूसुफ एन ज़ोते, ‘कि परमेशरे अवं सारे मिस्र मुल्खेरो मालिक बनेवरोइं, एल्हेरेलेइ तू इड़ी मीं कां एजनेरे लेई च़िर न लेइयां। 10ते तुश्शे रानेरे लेई ठार गोशेन मुल्खे मां भोल्ही, ते तुस अपने मट्ठन पोट्लड़न ते गोरू-गब्बन सने सारे मीं कां इड़ी नेड़े राले। 11ते कालेरे होरे ज़ैना पंच़ साल बाकी आन, तैन मां अवं तुश्शू पालन पोशन तैड़ी केरेलो, एरू न भोए कि तुस ते तुश्शो घरानो बल्के ज़ेत्रे तुस आथ नियन्ने न मरथ।’ 12ते तुस एपनी एछ़्छ़ेईं सेइं लातथ, ते मेरो ढ्ला बिन्यामीन भी हेरते कि ज़ै असन सेइं गल्‍लां लगोरोए केरने तै यूसुफे। 13ते तुसेईं मेरी सारी शान-ओ-शोकत, ज़ै इड़ी मिस्र मुल्खे मां लाहोरीए, मेरे बाजी सेइं गेइतां ज़ोथ, ते लूशी मेरे बाजी इरां आनां।” 14ते तै अपने ढ्लाए बिन्यामीनेरे गले सेइं लेगतां लेरां लगो देने, ते बिन्यामीन भी तैसेरे गले सेइं लेगतां लेरां लगो देने। 15ते तै अपने सेब्भी ढ्लान सेइं गले लेगतां लेरां लगो देने, ते तैसेरां बाद तैना तैस सेइं गल्‍लां लगे केरने।

16एस गल्‍लरो पतो फ़िरौनेरे घरे तगर लग्गो कि यूसुफेरे ढ्ला एवरेन, ते एस गल्‍ली सेइं फ़िरौन ते तैसेरे सारे नौकर बड़े खुशी भोइ जे। 17एल्हेरेलेइ फ़िरौने यूसुफे सेइं ज़ोवं, “अपने ढ्लान सेइं ज़ो कि अक कम केरा: अपने जानबरन लेद्दतां कनान मुल्खे मांजो च़ले गाथ। 18ते अपने बाजी ते अपने-अपने घरेरे लोकन एन्हतां इड़ी मीं कां एज्जा, ते मिस्र मुल्खे मां ज़ैना रोड़ी-रोड़ी चीज़ां आन, अवं तैना तुसन देइलो, ते मुल्खेरी रोड़ी-रोड़ी खानेरी चीज़ां तुसन मैल्हेली। 19ते तुसन हुक्म मैल्होरोए कि तुस अक कम केरा कि अपने बाल बच्‍चे ते कौन्शां आन्नेरे लेई इट्ठां मिस्र मुल्खेरां गेड्डी नेथ, ते अपने बाजी भी इरां आनां। 20ते अपने खानेरी चीज़ां केरि फिक्र न केरा, किजोकि सारे मिस्र मुल्खे मां ज़ैन भी आहे, तैन तुश्शूए।”

21एल्हेरेलेइ इस्राएलेरे मट्ठेईं तैन्ने कियूं, ते यूसुफे फ़िरौनेरे हुक्मेरे मुताबिक तैन गेड्डी दित्ती, ते बत्तरे लेई तैन खानेरे लेई रोट्टी दित्ती। 22ते तैन मरां एक्‍की-एक्‍की ज़ने अक-अक जोड़ी लिगड़ां भी दित्तां, ते बिन्यामीने 300 चैंदरे टुक्ड़े#45:22 चैंदरे टुक्ड़े मतलब सड़े ट्लाई किल्‍लो, अक चैंदरो टुक्ड़ो एक्‍की मैन्हेरी एक्‍की दिहैड़री मज़दूरी थी। ते पंच़ जोड़ी लिगड़ां दित्तां। 23तैनी अपने बाजी कांजो मिस्र मुल्खेरां रोड़ी-रोड़ी चीज़ेइं सेइं लेद्दतां दश गधे, अन्न ते रोट्टी ते तैसेरे बाजी जो बत्तरे लेई खानेरी चीज़ां लेद्दतां दश गेधी भेज़ी। 24तैखन तैनी अपने ढ्ला भेज़े, ते तैना च़ले जे, ते तैनी तैन सेइं ज़ोवं, “बत्तां एप्पु मांमेइं लड़ाई न केरथ।” 25मिस्र मुल्खे मरां च़ेलतां तैना कनान मुल्खे मां अपने बाजी याकूबे कां पुज़्ज़े। 26ते तैस सेइं ऐह सारो बिस्तार शुनाव, यूसुफ हेजू भी ज़ींतोए, ते सारे मिस्र मुल्खे पुड़ हुकूमत केरते, पन तैन केरे बाजी तैन पुड़ विश्वास न कमाव, ते तै अपने आपे मां न राव। 27तैखन तैनेईं अपने बाजी याकूबे सेइं तैना सैरी गल्‍लां शुनेई, ज़ैना तैनी तैन सेइं ज़ोवरी थी, ज़ैखन तैनी तैना गेड्डी लेही, ज़ैना यूसुफे तैन केरे एजनेरे लेई भेज़ोरी थी, तैखन तैस याकीन भोवं। 28ते इस्राएले ज़ोवं, “बस्सा, मेरू मट्ठू यूसुफ हेजू तगर ज़ींतूए; अवं अपने मरने करां पेइले तैस कां गेइतां तैसेरू दर्शन केरेलो।”

Currently Selected:

उत्पत्ति 45: BHDNT

Highlight

Copy

Compare