उत्पत्ति 46

याकूबेरू मिस्र मुल्खे जो गानू

1तैखन इस्राएल अपनु सब किछ नेइतां बेर्शेबा जो च़लो जेव, ते तैड़ी अपने बाजी इसहाकेरे परमेशरे जो बलि दित्ती। 2तैखन परमेशरे इस्राएले सेइं राती दर्शन देइतां ज़ोवं, “हे याकूब, हे याकूब।” तैनी ज़ोवं, “कुन हुक्मे।” 3परमेशरे ज़ोवं, “अवं तेरे बाजी केरो परमेशर आईं, तू मिस्रे मां गाने करां न डेरां; किजोकि अवं तैड़ी तेरी अक बड़ी कौम बनेइलो। 4अवं तीं सेइं साथी-साथी मिस्रे मांजो च़लताईं; ते अवं तीं तैट्ठां फिरी पक्‍को आनेलो; ते मरते बार यूसुफ तेरी एछ़्छ़ी बन्द केरेलो।” 5तैखन याकूब बेर्शेबा जो च़लो जेव; ते इस्राएलेरां मट्ठा अपने बाजी याकूब, ते अपने बाल-बच्‍चन, ते कौन्शन तैन गेड्डन पुड़, ज़ैना फ़िरौने तैन केरे लेई भेज़ोरी थी, च़ेढ़तां च़ेलि पे। 6तैना अपना गोरू-गब्बां, ते कनान मुल्खे मां अपनि अकोट्ठी कियोरी सारी धन-दौलत नेइतां मिस्र मुल्खे आए 7ते याकूबे अपना मट्ठां-कुइयां, पोट्लड़े पोट्लड़ी, मतलब अपनु सारू खानदान एप्पु सेइं साथी एन्हतां मिस्र मुल्खे मां अव।

याकूबेरू टब्बर

8याकूबे सेइं साथी ज़ैना इस्राएली लोक, मतलब तैसेरां मट्ठां, पोट्लड़े, ज़ैना मिस्र मुल्खे मरां आए, तैन केरां नंव्वां इना आन, याकूबेरू बड्डू मट्ठू रूबेन थियूं। 9ते रूबेनेरां मट्ठा हनोक, पल्‍लू, हेस्रोन, ते कर्मी थियां। 10ते शिमोनेरां मट्ठां, यमूएल, यामीन, ओहद, याकीन, सोहर ते अक कनानी कौन्शरू मट्ठू शाऊल भी थियूं। 11लेवेरां मट्ठां गेर्शोन, कहात ते मरारी थियां। 12यहूदेरां मट्ठां केरां नंव्वां ओनान, शेला, पेरेस ते जेरह थियां; पन एर ते ओनान कनान मुल्खे मां मेरि जेवरे थिये; ते पेरेसेरां मट्ठां, हेस्रोन ते हामूल थियां। 13इस्साकारेरां मट्ठां, तोला, पुब्बा, योब ते शिम्रोन थियां। 14जबूलूनेरां मट्ठां, सेरेद, एलोन ते यहलेल थियां। 15लिआरां मट्ठां ज़ैना याकूबे सेइं पद्दनरामे मां पैदा भोवरां थियां, तैन केरां मट्ठां ते पोट्लड़ां इना थियां, ते तैन केरे अलावा तैस अक कुई दीना भी भोइ। इड़ी तगर त याकूबेरे सब कुटमेरे 33 मैन्हु भोए।

16फिरी गादेरां मट्ठां, सपोन, हाग्गी, शूनी, एसबोन, एरी, अरोदी, ते अरेली थियां। 17आशेरेरां मट्ठां, यिम्ना, यिश्वा, यिश्वी ते बरीआ थियां, ते तैन केरि बेइन सेरह थी; ते बरीआरां मट्ठां, हेबेर ते मल्कीएल थियां। 18ते जिल्पा ज़ै लाबाने एपनी कुई लिआ जो दित्तोरी थी, तैसारां मट्ठां ते पोट्लड़ां इना थियां; ते तैसारे ज़िरिये याकूबेरे 16 वंशज पैदा भोए।

19फिरी याकूबेरी कौन्श राहेलेरां मट्ठां यूसुफ ते बिन्यामीन थियां। 20ते मिस्र मुल्खेरे ओन नगरेरे याजक पोतीपेरारी कुई आसनती सेइं यूसुफेरां इना मट्ठां भोआं, मतलब मनश्शे ते एप्रैम। 21बिन्यामीनेरां मट्ठां, बेला, बेकेर, अश्बेल, गेरा, नामान, एही, रोश, मुप्पीम, हुप्पीम, ते अर्द थियां। 22राहेलेरां मट्ठां ज़ैना याकूबे सेइं पैदा भोआं तैना इना थियां; तैसारां इना सब मट्ठां पोट्लड़ां 14 मैन्हु भोए।

23फिरी दानेरू मट्ठू हूशीम थियूं। 24नप्तालीएरां मट्ठां, यहसेल, गूनी, येसेर ते शिल्‍लेम थियां। 25बिल्हा, ज़ै लाबाने एपनी कुइये राहेली जो दित्तोरी थी, तैसारां मट्ठां पोट्लड़ां इना थियां; तैसारे ज़िरिये याकूबेरे खानदाने मां 7 मैन्हु भोए।

26याकूबेरे अपने खानदाने मां ज़ैना मैन्हु मिस्र मुल्खे मां आए, ते तैन मरां नुश्शां केरे अलावा सब मिलेइतां 66 मैन्हु भोए। 27ते यूसुफेरां मट्ठां, ज़ैना मिस्र मुल्खे मां तैस सेइं पैदा भोआं, तैना दूई मैन्हु थिये; एन्च़रां सेइं याकूबेरे टब्बरेरे ज़ैना मैन्हु मिस्र मुल्खे मां आहे तैना सब मिलेइतां 70 भोए।

याकूब मिस्र मुल्खे मां

28फिरी याकूब यहूदा एप्पु करां अग्री यूसुफे कां भेज़ो, कि तै तैस गोशेन मुल्खेरी बत हिराए; ते तैना गोशेन मुल्खे मां आए। 29तैखन यूसुफ अपने रथे पुड़ च़ेढ़तां अपने बाजी इस्राएले सेइं मिलने गोशेन मुल्खे मां अव, ते तैस सेइं मिलतां तैसेरे गले लग्गो, ते तैसेरे गले सेइं लेगतां किछ च़िरे तगर लेरां देंतो राव। 30तैखन इस्राएले यूसुफे सेइं ज़ोवं, “अवं हुनी मरनेरे लेई भी खुशी आईं, किजोकि मीं तू ज़ींतो मैल्हो, ते तेरू तुत्तर लावं।” 31तैखन यूसुफे अपने ढ्लान सेइं ते अपने बाजी केरे घरेरे सारे मैन्हन सेइं ज़ोवं, “अवं गेइतां फ़िरौने सेइं तुश्शी खबर शुनेइलो कि, ‘मेरे ढ्ला ते मेरे बाजी केरे घरानेरे सारे लोक, ज़ैना कनान मुल्खे मां रहते थिये, तैना मीं कां एवरेन; 32ते तैना लोक पुहालन, किजोकि तैना जानबर पालते एवरेन; एल्हेरेलेइ तैना अपना गोरू-गब्बां, ते ज़ैन किछ तैन केरूए, तैन सब तैनेईं आनोरूए।’ 33ज़ैखन फ़िरौन तुसन कुजेइतां पुछ़े, ‘तुश्शो कारोबार कुने?’ 34तैखन इन ज़ोइयथ, ‘तेरे नौकर बचपनेरे देंते अज़ तगर जानबर पालते एवरेन, बल्के इश्शे सियाने भी एन्ने कम केरते थिये।’ एल्हेरेलेइ तुस गोशेन मुल्खे मां रेइ बटेले; किजोकि सब पुहालन सेइं मिस्री लोक नफरत केरतन।”

Currently Selected:

उत्पत्ति 46: BHDNT

Highlight

Copy

Compare