निर्गमन 33

सीनै पहाड़े पुड़ां गानेरो हुक्म

1फिरी यहोवाए मूसे सेइं ज़ोवं, “तू तैन लोकन ज़ैना मिस्र मुल्खेरां छुटेइतां आनोरेन नेइतां तैस मुल्खे जो गा, ज़ेसेरे बारे मां अब्राहम, इसहाक, ते याकूबे सेइं कसम खेइतां ज़ोवरू थियूं, अवं तैस तेरे खानदाने जो देलो। 2ते अवं तीं अग्री-अग्री अक दूत भेज़ेलो ज़ै कनानी, एमोरी, हित्ती, परिज्जी, हिब्बी, ते यबूसी लोकन कढेलो। 3तुस लोक तैस मुल्खे मांजो गाथ ज़ैस मां दुद्ध ते मैछ़ेरी गड्डां बेगचन#33:3 दुद्ध ते मैछ़ेरी गड्डां बेगचन मतलब फलदार ज़मीन।, पन तुस ज़िद्दी आथ, एल्हेरेलेइ अवं तुश्शे दरमियान भोइतां न च़लेलो, एरू न भोए कि अवं बत्ती मां तुसन मैरी छ़ेडी।”

4ई बुरी खबर शुन्तां तैना लेरां लगे देने, ते केन्चे भी अपनो गेहनो न लव। 5किजोकि यहोवाए मूसे सेइं ज़ोवरू थियूं, “इस्राएली लोकन मेरू इन वचन शुना तुस लोक त ज़िद्दी आथ, अगर अवं एक्‍की पलेरे लेई तुसन साथी भोइतां च़ेलि, ‘त तुश्शो नाश केरि छ़डेलो। एल्हेरेलेइ हुनी अपने-अपने गेहने खोल्‍ली छ़डा, कि अवं बुझ़ी कि तुसन सेइं कुन कियूं गाए।’” 6तैखन इस्राएली लोकेईं होरेब पहाड़े करां अग्रोवं जो अपने गेहने खोलतां रख्खे।

मिलापे बालो तेम्बु

7मूसे तेम्बु, डेरन करां बेइर दूर खड़ो करातो थियो, ते तैस जो मिलापे बालो तेम्बु ज़ोते थिये। ते ज़ै कोई यहोवाए तोपतो थियो तै तैस तैड़ी मिलापे बाले तेम्बु कां ज़ै डेरन करां बेइर थियो निस्सी गातो थियो। 8ज़ैखन-ज़ैखन मूसो तेम्बु कां गातो थियो, तैखन-तैखन लोक उठतां अपने-अपने डेरेरे दारे पुड़ खेड़ोते थिये, ते ज़ांतगर मूसो तैस तेम्बु मां दाखल न थियो भोतो तांतगर तैसेरे पासे तकते रहते थिये। 9ज़ैखन मूसो तेम्बु मां दाखल भोतो थियो, तैखन बिदलारारो अक खम्भो एइतां तेम्बेरे दारे पुड़ रुकतो थियो, ते यहोवा मूसे सेइं गल्‍लां केरतो रहतो थियो। 10ते सब लोक ज़ैखन बिदलारारे खम्भेरे दारे पुड़ेरां तकते रहते थिये, तैखन उठतां अपने-अपने डेरेरे दारे पुड़ेरां झुकते थिये। 11ते यहोवाए मूसे सेइं एस तरीके सेइं आमने-सामने गल्‍लां केरतो थियो, ज़ैस तरीके सेइं कोई अपने ढ्लाए सेइं गल्‍लां केरतो भोए। ते मूसो त डेरे मां फिरी वापस एइतो थियो, पन यहोशू नंव्वेरो अक जुवान, ज़ैन नूनेरू मट्ठू थियूं ते मूसेरो मद्दत केरनेबालो थियो, ते तेम्बु मरां न थियो निस्तो।

मूसे यहोवारे महिमारू दर्शन

12ते मूसे यहोवा सेइं ज़ोवं, “शुन तू मीं सेइं ज़ोतस, ‘इन लोकन नेइतां गा; पन इन न ज़ोवं कि तू मीं सेइं साथी कौन भेज़ेलो। फिरी भी तीं मीं सेइं ज़ोवरू थियूं, तेरू नवं मेरे दिले मां बसेरूए, ते तीं पुड़ मेरे अनुग्रहेरी नज़रे।’ 13ते हुनी अगर मीं पुड़ तेरी अनुग्रहेरी नज़र भोए, त मीं अपनि बत समझ़ा। ज़ैस सेइं अवं एन बुझ़ी कि ज़ैस सेइं तेरू ज्ञान मैल्हे तैखन तेरे अनुग्रहेरी नज़र मीं पुड़ बनोरी राए फिरी एन केरो भी खियाल केर कि ऐह कौम भी तेरे लोकन।” 14यहोवाए ज़ोवं, “अवं एप्पु तीं सेइं साथी च़लेलो ते तीं आराम देलो।” 15तैनी तैस सेइं ज़ोवं, “अगर तू एप्पु न च़लस, त असन इट्ठां अग्रोवं न गाने दे। 16इन केन्च़रे समझ़ू गाए कि तेरे अनुग्रहेरी नज़र मीं पुड़ ते अपने लोकन पुड़े? कुन इस सेइं नईं कि तू असन साथी-साथी च़लस, ज़ैस सेइं अवं ते तेरे लोक दुनियारे सारे लोकन मां अलग भोन?”

17यहोवाए मूसे सेइं ज़ोवं, “अवं इन कम भी ज़ेसेरी चर्चा तीं कियोरीए केरेलो: किजोकि मेरे अनुग्रहेरी नज़र तीं पुड़े, तेरू नवं मेरे दिले मां बसेरूए।” 18तैनी ज़ोवं, “मीं अपनो तेज हिरा।” 19तैनी ज़ोवं, “अवं तीं सेइं साथी च़लते बार अपनि सारी भलियाई#33:19 भलियाई महिमा हिरालो, ते तेरे सामने यहोवारे नंव्वेरो प्रचार केरेलो, ते ज़ैस पुड़ अवं अनुग्रह केरनो चालो तैस पुड़ अनुग्रह केरेलो, ते ज़ैस पुड़ दया केरनी चालो तैस पुड़ दया केरेलो।” 20फिरी तैने ज़ोवं, “तू मेरू तुत्तरेरू दर्शन न केरि बटस; किजोकि मैन्हु मेरू तुत्तरेरू दर्शन केरतां ज़ींतो न रेइ सखे।” 21फिरी यहोवाए ज़ोवं, “शुन मीं कां अक ठारे, तू उस चट्टानी पुड़ खड़ो भो; 22ते ज़ांतगर मेरो तेज तेरे सामने भोइतां च़लतो रालो तैखन अवं तीं चट्टानरे दरारी मां रखेलो, ते ज़ांतगर अवं तेरे सामनेरां भोइतां न निस्तां गेईं तांतगर अपने हथ्थे सेइं तीं ढेकतां रखेलो; 23फिरी अवं अपनो हथ उबरो केरेलो, तैखन तू मेरी पिठ त हेरेलो पन मेरू तुत्तर न हेरी बटेलो।”

Currently Selected:

निर्गमन 33: BHDNT

Highlight

Copy

Compare