निर्गमन 32

इस्राएली लोक मूरती केरि पूज़ा केरने मां फसतन

1ज़ैखन लोकेईं हेरू कि मूसे पहाड़े पुड़ेरां ओसने मां च़िर भोवरूए तैखन तैना हारूने कां गेइतां अकोट्ठे भोइतां ज़ोने लगे, “हुनी इश्शे लेई देबतो बना, ज़ै असन अग्री-अग्री च़ले किजोकि तैस मैन्हु मूसे ज़ैनी असां मिस्र मुल्खेरां केढतां आनोरेम, अस न ज़ानम कि कुन भोवरूए?” 2हारूने तैन सेइं ज़ोवं, “तुश्शी कौन्शां ते मट्ठां कुइयां केरे कन्नां केरि ज़ैना सोन्नेरी बैलिन तैन खोलतां मीं कां आनां।” 3तैखन सब लोकेईं तैन केरे कन्न मरां सोन्नेरी बैलड़ी खोल्‍ली, ते हारूने कां एन्हीं। 4ते हारूने तैना तैन केरे हथ्थे मरां नी, ते तैसेरू ढैलतां अक बछ़ड़ू बनावं, ते टैंकी सेइं घड़ाई की। तैखन तैना ज़ोने लगे, “हे इस्राएल तेरो परमेशर ज़ैनी तू मिस्र मुल्खेरां छुटेइतां आनोरोस तै ईहीए।” 5एन हेरतां हारूने तैन केरे सामने अक वेदी बनाई; ते ई प्रचार कियो, “कालां यहोवारे लेई तिहार भोल्हु।” 6ते दूइयोवं दिहाड़े लोकेईं झ़ेझ़ां उठतां होमबलि च़ाढ़ी, ते मेलबलि नेइतां आए, फिरी बिशतां खावं पीवं, ते उठतां नच़ने लगे।

7तैखन यहोवाए मूसे सेइं ज़ोवं, “उन्ढो ओस्सी गा, किजोकि तेरे लोक, ज़ैना तीं मिस्र मुल्खेरां केढतां आनोरेन, तैना बिगड़ोरेन; 8ते ज़ैस बत्ती पुड़ च़लनेरो हुक्म मीं तैन दित्तोरो थियो, तै जल्दी छ़ेडतां तैनेईं अक बछ़ड़ू बनेवरूए, फिरी तैस कां मथ्थो टेकने लगोरेन, ते तैसेरे लेई बलिदान भी च़ाढ़ू, ते इन ज़ोने लगोरेन, ‘हे इस्राएली लोकव तुश्शो परमेशर ज़ैने तुसां मिस्र मुल्खेरां छुटेइतां आनोरेथ तै ईहीए।’” 9फिरी यहोवा मूसे सेइं ज़ोवं, “मीं इना लोक लाहोरेन, ते शुन, तैना बड़े ज़िद्दीन#32:9 ज़िद्दीन खलाफत केरनेबाले। । 10हुनी मीं न रोकां, मेरी सरक तैन पुड़ भड़कोरीए ज़ैस सेइं अवं तैन भस्म केरेलो; पन तीं मरां अक बड़ी कौम पैदा केरेलो।”

11तैखन मूसो अपने परमेशर यहोवा इन ज़ोइतां मनाने लगो, “हे यहोवा, तेरो कोप अपने लोकन पुड़ किजो भड़कोरोए, ज़ैस सेइं तू बड़ी शक्ति ते ताकतबर हथ्थेरे ज़िरिये सेइं मिस्र मुल्खेरां केढतां आनोरोस? 12मिस्री लोक इन किजो ज़ोइ बटन, ‘तै तैन बुरे खियाले सेइं, मतलब पहाड़े मां मारनेरे लेई धेरती पुड़ेरां खतम केरनेरे खियाले सेइं केढतां आने?’ तू अपने भड़कोरे कोपे शान्त केर, ते अपने लोकन एरहो नुकसान पुज़ाने करां मन बदल। 13अपने दास अब्राहम, इसहाक, ते याकूब याद केर, ज़ैन सेइं तीं अपनि कसम खेइतां इन ज़ोवरू थियूं, अवं त तेरे खानदाने अम्बरेरे तारे केरे ज़ेरे बड़े जादे बनेइलो, ते ई सारो मुल्ख ज़ेसेरी मीं चर्चा कियोरीए तुश्शे खानदाने देइलो, कि तैना तैसेरे अधिकारी हमेशा भोन।” 14तैखन यहोवाए अपने लोकन नाश केरनेरे वजाई सेइं ज़ैन तैनी ज़ोवरू थियूं पशतावं।

15तैस वक्ते मूसे फिरतां गवैहरी दूईये तेख्ती हथ्थे मां ट्लेइतां पहाड़े पुड़ेरां उन्ढो ओस्सी जेव, तैन तेख्तन पुड़ इलहोरां ओल्होरां दूईये पासन लिखोरू थियूं। 16ते तैना तेख्ती परमेशरेरी बनेवरी थी, ते तैन पुड़ परमेशरे अपने हथ्थन सेइं लिखोरू थियूं।

17ज़ैखन यहोशूए लोकां केरि चिन्डां केरि शोर शुनोई, तैखन तैनी मूसे सेइं ज़ोवं, “डेरन मरां लड़ाईअरी शोर शुनोने लगोरीए।” 18तैनी ज़ोवं, “ई ज़ै शोरे न त ज़ींतने बालां केरीए, ते न हारने बालां केरि, मीं त गीतां केरि शोर शुनोने लगोरीए।” 19डेरे कां एइतां मूसे तैन बछ़ड़ू लाऊं ते तैना लोक नच़ते लाहे, तैखन मूसेरो क्रोध भेड़की जेव, ते तैने तेख्ती अपने हथ्थन मरां पहाड़े पुड़ेरां शैरतां ट्लोड़ी छ़ेडी। 20तैखन तैनी तैन केरू बनेवरू बछ़ड़ू नेइतां अग्गी मां छ़ेडतां फुक्‍की छ़डू, ते पीहतां चूरो-चूरो केरि छ़डो, ते पैनी मां शारू ते इस्राएली लोकन तैन पियावं।

21तैखन मूसो हारूने सेइं ज़ोने लगो, “एन लोकेईं तीं सेइं कुन कियोरू थियूं कि तैना एत्रे बड़े पापे मां फसाए?” 22हारूने जुवाब दित्तो, “मेरे मालिकेरो क्रोध न भड़के; तू त तैन लोकां केरे बारे मां ज़ानतस कि तैना बुरैई मां मन लगोरो रखतन। 23ते तैनेईं मीं सेइं ज़ोवं, ‘इश्शे लेई देबतो बना ज़ै असन अग्री-अग्री च़ले किजोकि तैस मैन्हु मूसे, ज़ैनी असां मिस्र मुल्खेरां छुटेइतां आनोरेम, असन नईं पतो कि तैस कुन भेवरूए?’ 24तैखन मीं तैन सेइं ज़ोवं, ज़ैस-ज़ैस कां सोन्नेरे गेहनोए, तै तैस खोलतां मीं कां आने, ते ज़ैखन तैनेईं मीं दित्ते, मीं तैना अग्गी मां छ़डे, तैखन एप्पु इन बछ़ड़ू निस्सू।”

25तैखन हारूने तैन लोकन अपनि मर्ज़ी केरने दित्तोरी थी कि तैना अपने दुशमनां केरे सामने मज़ाकेरे लैईक भोइ जे। 26तैन बेलगाम हेरतां मूसो डेरे कां सामने खड़ो भोइतां ज़ोने लगो, “ज़ै कोई यहोवारे पासे तै मेरे पासे एज्जे;” तैखन सारे लेवी तैसेरे पासे अकोट्ठे भोए। 27तैने तैन सेइं ज़ोवं, “इस्राएली केरो परमेशर यहोवा इन ज़ोते, कि अपने-अपने मझ़े मरां तलवार लटकेइतां डेरे करां एक्‍की कूनेरां दूइयोवं कूने तगर घुमतां अपने-अपने भियालन, अपने साथी, ते पड़ोसी मैरी छ़डा।” 28मूसेरे ज़ोनेरे मुताबिक लेवी लोकेईं तैन्ने कियूं ते तैस दिहाड़े लगभग 3000 लोक मारे जे। 29फिरी मूसे ज़ोवं, “अज़्ज़ेरी दिहाड़ी यहोवारे लेई अपनो याजकेरे पदेरो संस्कार केरा, बल्के अपने-अपने मट्ठां ते ढ्लां केरे खलाफ भोइतां एरू केरा ज़ैस सेइं तैना अज़ तुसन बरकत देन।”

30दूइयोवं दिहाड़े मूसे लोकन सेइं ज़ोवं, “तुसेईं बड़ो पाप कियोरोए, हुनी मीं यहोवा कां गानूए, भोइ सकते कि तुश्शे पापां केरो प्रायश्चित केरि सेखी।” 31तैखन मूसो यहोवा कां गेइतां इन ज़ोने लगो, “हाय, हाय, तैन लोकेईं सोन्नेरो देबतो बनेइतां बड़ो पाप कियोरोए। 32फिरी भी तू तैन केरो पाप माफ़ केरां नईं त एपनी लिखोरी किताबी मरां मेरू नवं केट्टी छ़डां।” 33यहोवाए मूसे सेइं ज़ोवं, “ज़ैनी मेरे खलाफ पाप कियोरोए तैसेरू नवं मीं अपने किताबी मरां कटनुए। 34हुनी त तू गेइतां तैन लोकन तैस ठारी पुड़ नेइतां गा ज़ेसेरी गल मीं तीं सेइं कियोरी थी, हेर मेरो दूत तीं अग्री-अग्री च़लेलो। पन ज़ैस दिहाड़े तैन अवं सज़ाह देने लग्गेलो तैस दिहाड़े तैन इस पापेरी भी सज़ाह देलो”

35ते यहोवा तैन लोकन पुड़ आफत भेज़ी, किजोकि हारूनेरू बनेवरू बछ़ड़ू तैनेईं बनावावरू थियूं।

Currently Selected:

निर्गमन 32: BHDNT

Highlight

Copy

Compare