निर्गमन 34

घोड़ां केरि दूई तेख्ती

1फिरी यहोवाए मूसे सेइं ज़ोवं, “पेइली तेख्ती केरे ज़ेरि घोड़ेरी दूई होरि तेख्ती बना; तैखन ज़ैना वचन तैन पेइली तेख्तन पुड़ लिखोरे थिये, ज़ैना तीं ट्लोड़ोरी थी, तैन्ना वचन अवं तैन तेख्तन पुड़ फिरी लिखेलो। 2ते झ़ेझ़ां तियार रेइयां, ते झ़ेझ़ां सुबेले सीनै पहाड़े पुड़ च़ेढ़तां तैसेरी च़ोटी पुड़ मेरे सामने खड़ो भोइयां। 3तीं सेइं साथी होरो कोई पहाड़े पुड़ न एज्जे, पन पूरे पहाड़े पुड़ कोई मैन्हु कोन्च न लेइहोरो लोड़े, ते गोरू-गब्बां भी पहाड़ेरे सामने न च़रन।” 4तैखन मूसे पेइली तेख्ती केरि ज़ेरि दूई होरि तेख्ती घेड़ी, ते झ़ेझ़ां सुबेले उठतां अपने हथ्थे मां घोड़ेरी तैना दूईये तेख्ती नेइतां यहोवारे हुक्मेरे मुताबिक सीनै पहाड़े पुड़ च़ेढ़ी जेव। 5तैखन यहोवा बिदलारी मरां ओस्तां तैस सेइं साथी तैड़ी खड़ो भोइतां यहोवारू नवं ज़ोरे सेइं ज़ोने लगो। 6ते यहोवा तैसेरे सामने भोइतां इन बांदू केरतो च़लो, “यहोवा, यहोवा, परमेशर दया केरनेबालो ते अनुग्रह केरनेबालो, क्रोध केरने मां च़िर लानेबालो, ते बड़ो दया केरनेबालो ते सच़्च़ोए, 7हज़ार पीढ़न तगर हमेशा दया केरनेबालो, अधर्म ते जुर्म ते पाप माफ़ केरने बालोस, पन दोषी तै कोन्ची तरीके सेइं बेकसूर न ठहराए, तै पितरां केरे अधर्मेरी सज़ाह तैन केरे मट्ठन बल्के पोट्लड़न ते पड़पोट्लड़न भी देनेबालोए।” 8तैखन मूसे जल्दी केरतां तल्‍ले झुकतां मथ्थो टेको। 9ते तैनी ज़ोवं, “हे प्रभु, अगर तेरे अनुग्रहेरी नज़र मीं पुड़ भोए त प्रभु, असन लोकन मांमेइं च़लस त इना लोक ज़िद्दी त आन, फिरी भी इश्शे अधर्म ते पाप माफ़ केर, ते असन अपने लोक मेनतां कबूल केर।”

करार दोहरानो

10तैनी ज़ोवं, “शुन, अवं अक करार केरताईं, तेरे सब लोकां केरे सामने अवं चमत्कार केरेलो ज़ेरू धेरती पुड़ ते सब कौमन मां कधी नईं भोवरू; ते तैना सारे लोक ज़ैन मां तू रहतस यहोवारू कम हेरेलो, किजोकि ज़ैन अवं तुसन लोकन सेइं केरनेबालोईं तैन डरने बालू कम्मे। 11ज़ैना हुक्म अवं तीं देताईं तैस तुस लोक मेन्नथ। हेरा, अवं तुश्शे सामनेरां एमोरी, कनानी, हित्ती, परिज्जी, हिब्बी, ते यबूसी लोक कढेलो। 12एल्हेरेलेइ खबरदार राथ कि ज़ैस मुल्खे मां तू गाने बालोस तैसेरे रानेबालन सेइं करार न केरां; कोन्च एरू न भोए तैना तेरे लेई फंदो बेनी गान। 13पन तैन केरि वेदी भी बिछ़ोड़ी छ़ेडां, तैन केरि मूरती ट्लोड़ी छ़ेडां, ते तैन केरि अशेरा नव्वेंरे देबरे खम्भे केट्टी छ़ेडां। 14किजोकि तुसन कोन्ची होरि परमेशर मेनतां मथ्थो टेकनेरो हुक्म नईं, किजोकि यहोवा ज़ेसेरू नवं जलन रखनेबालोए, ते तैस जलन भोनेबालीए। 15एरू न भोए कि तू तैस मुल्खेरे रानेबालन सेइं करार केरस, ते तैना अपने देबतन पत्ती च़लनेरो व्यभिचार केरन, ते तैन केरे लेई बलिदान भी केरन, ते कोई तीं कुजाए ते तू भी तैसेरे बलि दित्तोरू प्रशाद खास, 16ते तू तैन केरि कुइयां अपने मट्ठां केरे लेई आनस, ते तैन केरि कुइयां ज़ैना एप्पु अपने देबतन पत्ती च़लनेरो व्यभिचार केरचन तेरे मट्ठन करां भी अपने देबतां केरे पासे च़लनेरो व्यभिचार करान।

17“तू देबतां केरि मूरती ढालेइतां न बनेइयां।

18“अखमीरी रोट्टरू तिहार बनेइयां। तैस मां मेरे हुक्मेरे मुताबिक अबीब महीनेरे ठीक मौके पुड़ सत दिहाड़े अखमीरी रोट्टी खेइयथ, किजोकि तुस मिस्र मुल्खेरां अबीब महीने मां निसोरे थिये। 19हर अक ज़ेठो मेरोए, ते कुन बछ़ड़ू, गबड़ू, तेरे जानबरन मरां ज़ैन नर ज़ेठे भोन सब मेरेन। 20ते गधेरे ज़ेठां केरे बदले गबड़ू देइतां तैस छुटेइयां, अगर तू तैस छुटाने न चास त तैस मुन्डू बड़ देइयां। पन अपने सब बड्डां मट्ठां केरो बदलो देइतां छुटेइयां। कोई खाली हथ्थेइं मीं कां न एज्जे।

21“शा, दिहाड़े कम केरां, पन सत्तोवं दिहाड़े आराम केरां, एन्च़रे फसल बेनेरे मौके ते कटनेरे मौके मां भी आराम केरनो। 22ते हफतां केरू तिहार मनेइयां ज़ैस जो पेइले लून्नेरे गेहुं केरू तिहार ज़ोतन, ते सालेरे आखरी मां कटनेरू भी तिहार मनानू। 23साले मां ट्लाई बार तेरे सब मड़द इस्राएलेरे परमेशर प्रभु यहोवारे सामने एज्जन। 24अवं त गैर कौमन तेरे सामनेरां केढतां तेरी हद्दन बधालो; ते ज़ैखन तू अपने परमेशर यहोवारे सामने सालेरे ट्लाई बार एजस, तैखन कोई तेरे ज़मीनरू लालच़ न केरेलो।

25“मेरे बलिदानेरो खून खमीरे सेइं न च़ैढ़ां, ते न फ़सहरे तिहारेरे बलिदाने मरां किछ झ़ेझ़ां तगर रेखथ। 26अपने ज़मीनरी पेइली फसलरो हिस्सो अपने परमेशर यहोवारे घरे मां ऐनथ। छ़ेड़ू तैसेरी अम्मरे दुद्धे मां न बनेइयथ।”

27ते यहोवाए मूसे सेइं ज़ोवं, “इन वचन लिख; किजोकि एन्ना वचना केरे मुताबिक अवं तेरे ते इस्राएलिन साथी करार केरताईं।” 28मूसो त यहोवाए साथी 40 दिहाड़े ते 40 रात राव; ते तैखन तगर न त तैने रोट्टी खाइ ते न पानी पीवं, ते तैने तैन तेख्तन पुड़ करारेरे वचन मतलब दश हुक्म लिखे।

मूसेरू तुत्तर चमकनू

29ज़ैखन मूसे गवैहरी दूईये तेख्ती हथ्थे मां एन्हतां सीनै पहाड़े पुड़ेरां ओसने लगोरो थियो तैखन यहोवाए सेइं गल्‍लां केरते बार तैसेरू तुत्तरेरां लौ चमकने लगी। पन तै इन न थियो ज़ानतो कि तैसेरे तुत्तरेरां लौ चमकने लग्गोरी थी। 30ज़ैखन हारून ते सब इस्राएली लोकेईं मूसो लाव कि तैसेरू तुत्तरेरी लौ चमकने लग्गोरीए, तैखन लोक तैस कां गाने करां डरने लगे। 31तैखन मूसे तैना कुजाए; ते हारून मेण्डलरे सारे प्रधान समेत तैस कां अव, ते मूसो तैन सेइं गल्‍लां केरने लगो। 32एसेरे पत्ती सब इस्राएली नेड़े आए, ते ज़ेत्रे हुक्म यहोवाए सीनै पहाड़े पुड़ तैस सेइं गल्‍लां केरनेरे मौके दित्तोरे थिये, तैना सब तैने तैन सेइं ज़ोए। 33ज़ांतगर मूसे तैन सेइं गल्‍लां केरतां न मुकेइ तांतगर अपनु तुत्तर ढेकतां रख्खू। 34ते ज़ैखन-ज़ैखन मूसो अन्तर यहोवाए सेइं गल्‍लां केरनेरे लेई तैस कां गातो थियो तैखन-तैखन तै पड़दो खोलतां रखतो थियो, फिरी बेइर एइतां ज़ैना-ज़ैना हुक्म तैस मैलते थिये तैना इस्राएली लोकन सेइं ज़ोतो थियो। 35इस्राएली मूसेरू तुत्तर हेरते थिये कि तैस सेइं लौ चमकती थी, ते ज़ांतगर तै यहोवाए सेइं गल्‍लां केरनेरे लेई अन्तर गातो थियो तैखन तगर तै तैस पड़दे पलेटतां रखतो थियो।

Currently Selected:

निर्गमन 34: BHDNT

Highlight

Copy

Compare