निर्गमन 23

न्याय ते बगैर तरफदारी

1“झूठी गल्‍लां न फैलेइयां, ज़ैनी मैन्हे जुर्म कियोरो भोए तैस बच़ानेरे लेई गवाही देइतां तैसेरी मद्दत न केरां। 2बुराई केरने लेई बड़े लोकन सेइं साथी न गेइयां, ते न तैन केरे पासे फिरतां मुकदमेरो फैसलो बिगाड़नेरे लेई गवाह बेना। 3ते गरीब मैन्हेरे लेई भी मुकदमे मां तरफदारी न केरां।

4“अगर तेरे दुश्मनेरो दांत या गधो टेपलोइतां तीं मैल्हे, त तैस तू तैस कां ज़रूर पुज़ेइयां। 5फिरी अगर तू अपने दुश्मनेरे गधे बोझे सेइं देबोरो लास, त चाहे तैस तैसेरे मालिकेरे लेई छुटानेरे लेई तेरो दिल न चाहे, फिरी भी ज़रूर मालिकेरू साथ देइतां तैस छुटेइयां।

6“तुश्शे लोकन मरां ज़ै गरीब भोए तैसेरे मुकदमे मां अन्याय न भोने देइयां। 7झूठे मुकदमे करां दूर रेइयां, ते भले ते धेर्मी कत्ल न केरां, किजोकि अवं दुष्टे बेकसूर न ठहरेइलो। 8न रिश्पत नेइयां, किजोकि रिश्पत लहने बालन#23:8 लहने बालन न्याय केरनेबालन। कांने केरि देतीए, ते धर्मी लोकां केरि गल्‍लां भी बदलतीए।

9“परदेशी लोकन पुड़ ज़ुलम न केरां; तुस त परदेशी केरे मनेरी गल्‍लां ज़ानतथ, किजोकि तुस भी मिस्र मुल्खे मां परदेशी थिये।

सत्तोवं साल ते सत्तोवं दिहाड़ी

10“शा साल त अपनि ज़मीनी बेइयां ते तैसेरी फसल अकोट्ठी केरां; 11पन सत्तोवं साले मां तैस खिल्‍ली राने देइयां, ते एरी राने देनी, ताके तेरे लोकन मरां गरीब लोक तैस मरां खेइ सखन, ते ज़ैन किछ तैन करां बच़े तैन जंगली जानबरां केरे खानेरे लेई भोए ते अपनि दाछ़ ते ज़ैतूनेरी बागन मां भी एन्ने केरां। 12हर हफतेरे शा दिहाड़न तगर त अपनु कम-काज़ केरां, ते सत्तोवं दिहाड़े आराम केरां, कि तेरे दांत ते गधे भी थाकी छ़डन, ते तेरी नौकरेनरां मट्ठां ते परदेशी भी थाकी छ़ेडी सखन। 13ते ज़ैन किछ मीं तुसन सेइं ज़ोवरूए तैस मां खबरदार रेइयां, ते होरि देबतां केरां नव्वां केरि गल भी न केरां, बल्के तैन तेरे ऐशेरां शुनोरू भी न लोड़े।

ट्लाई खास तिहारां

14“हर साल ट्लाई बार मेरे लेई तिहार मनेइयथ। 15अखमीरी रोट्टरू तिहार मनेइयथ, तैस मां ज़ेन्च़रे मीं तुसन हुक्म दित्तोरो थियो, अबीब महीनेरे ठीक वक्ते पुड़ सत दिहाड़न तगर बगैर खमीरी रोट्टी खेइयथ, किजोकि तैस्से महीने मां तुस मिस्र मुल्खे मरां आज़ाद भोइतां एवरे थिये। ते मीं कां कोई खाली हथ्थेइं न एज्जे। 16ते ज़ैखन तेरे ज़मीनरी पेइली फसल तियार भोए, तैखन कटनेरू तिहार मनेइयथ। ते सालेरे आखरी मां ज़ैखन तू मेहनतरे फल अकोट्ठू केरतां ढेर लास, तैखन अकोट्ठू केरनेरू तिहार मनेइयथ। 17हर साल ट्लाई बार तेरे सब मड़द प्रभु यहोवारे सामने गान।

18“मेरे बलि देनेरे जानबरेरो खूने खमीरी रोट्टी सेइं साथी नईं च़ाढ़नो, ते मेरे तिहारेरे रोड़े बलिदाने मरां किछ झ़ेझ़ां तगर राने न देइयथ। 19अपने ज़मीनरी पेइली फसल अपने परमेशर यहोवारे घरे मां ऐनथ। छ़ेड़ू तैसेरी अम्मरे दुद्धे मां न बनेइयथ।”

वाधे ते खबरदारी

20“शुन, अवं अक दूत तीं अग्री-अग्री भेज़ताईं ज़ै तेरी बत्तां हिफाज़त केरेलो, ते ज़ै जगाह मीं तियार कियोरीए तैस मां तीं पुज़ालो। 21तैसेरी गल्‍लां ध्याने सेइं मेन्नथ, ते तैसेरी खलाफत न केरथ, किजोकि तै तुश्शो पाप माफ़ न केरेलो, एल्हेरेलेइ मीं पूरो अधिकार दित्तोरोए#23:21 मीं पूरो अधिकार दित्तोरोए तैस मां मेरू नवं तैस मां रहते।। 22ते अगर तू सच़्च़े तैसेरी गल मन्नस ते ज़ैन किछ अवं ज़ोईं तैन केरस, त अवं तेरे दुश्मना केरो दुश्मन ते तेरे खलाफत केरनेबालां केरि खलाफत केरेलो। 23एस तरीके सेइं मेरो दूत तीं अग्री-अग्री च़ेलतां तीं एमोरी, हित्ती, परिज्जी, कनानी, हिब्बी, ते यबूसी लोकां केरि जगाई मां पुज़ालो, ते अवं तैन सत्यानाश केरि छ़डेलो। 24तैन केरे देबतन कां न झुकां, ते न तैन केरि सेवा केरां, ते न तैन केरां ज़ेरां कम्मां केरां, पन तैना मूरती पूरे तरीके सेइं सत्यानाश केरि छ़ेडथ, ते तैन लोकां केरि मूरती केरे टुक्ड़े-टुक्ड़े केरि छ़ेडथ। 25तुस अपने परमेशर यहोवारी सेवा केरथ, तैखन तै तेरे अन्न-पैनी पुड़ बरकत देलो, ते तुसन मरां बिमारी दूर केरेलो। 26तेरे मुल्खे मां न त केन्चेरे गर्भेरो बच्‍चो ज़ैया भोल्हो, ते न कोई बेऔलाद भोल्ही, ते तेरी उमर अवं पूरी केरेलो। 27ज़ेत्रे लोकन मां तू गालो तैन सेब्भी केरे दिले मां अवं अपनो डर बसालो ते तैन बेदिल केरेलो, ते अवं तीं तेरे सब दुश्मना केरि पिठ हिरालो। 28ते अवं तीं करां पेइले तैन पुड़ बड़ो डर भेज़ेलो ज़ैना हिब्बी, कनानी ते हित्ती लोकन तेरे सामनेरां नशैनतां दूर केरि देले। 29अवं तैन तीं अगरां एक्‍की साले मां त न कढेलो, एरू न भोए कि मुल्ख उज़ड़ी गाए ते जंगली जानबर बेन्धतां तुसन दुख देने लग्गन। 30ज़ांतगर तू फुलतां-फैलतां मुल्खे अपनो न बनास, तांतगर अवं तैन तीं अगरां थोड़े-थोड़े केरतां कढतो रालो। 31अवं लाल समुन्दरे करां देंते पलिश्ती लोकां केरे समुन्दर तगर ते जंगलेरे देंते फरात दरियाए तगर मुल्खे तेरे कब्ज़े मां केरि देलो, अवं तैस मुल्खेरे रानेबालन भी तेरे कब्ज़े मां केरि छ़डेलो, ते तीं तैना अपने सामनेरां पूरे केढी छ़डनेन। 32तू न तैन सेइं कोई करार केरां ते न तैन केरे देबतन सेइं। 33तैना तेरे मुल्खे मां न रान, एरू न भोए कि तैना तीं करां मेरे खलाफ पाप करान, किजोकि अगर तू तैन केरे देबतां#23:33 तू तैन केरे देबतां अगर तैन केरे देबतां केरि सेवा केरन। केरि सेवा केरस, त ऐह तेरे लेई फंदो बनेलो।”

Currently Selected:

निर्गमन 23: BHDNT

Highlight

Copy

Compare