निर्गमन 24

इस्राएली लोकन सेइं यहोवारो करार

1फिरी यहोवाए, मूसे सेइं ज़ोवं, “तू हारून, नादाब, अबीहू, ते इस्राएली 70 बुज़ुर्ग लोकन साथी एन्हतां यहोवा कां इड़ी पहाड़े पुड़ एइतां दूरेरां मथ्थो टेकथ। 2ते सिर्फ मूसो यहोवारे सामने एज्जे, पन तैना होरे लोक सामने न एज्जन, ते होरे लोक तैसेरे साथी उबरे न एज्जन।”

3तैखन मूसे लोकन कां गेइतां यहोवारी सैरी गल्‍लां ते नियम शुनाए; तैखन सब लोक एक्‍की आवाज़ी मां ज़ोने लगे, “ज़ेत्री गल्‍लां यहोवा ज़ोवरिन तैना सब गल्‍लां असां मनमेले।” 4तैखन मूसे यहोवारे सब वचन लिखे। ते झ़ेझ़ां उठतां पहाड़े हैठ अक वेदी बनाई ते इस्राएली केरे 12 गोट्लेरे 12 खम्भे भी खड़े किये। 5तैखन तैनी काई इस्राएली जुवान यहोवारे लेई होमबलि ते दांतां केरि मेलबलि च़ाढ़ने भेज़े। 6ते मूसे अध्धो खून कुटोरे मां रख्खो, ते अध्धो वेदी पुड़ छ़िड़को। 7तैखन करारेरी किताब नेइतां लोकन पेढ़तां शुनाई, तैस शुन्तां तैनेईं ज़ोवं, “ज़ैन किछ यहोवा ज़ोवरूए तैन सब अस केरमेले, ते तैसेरे सब हुक्म मनमेले।” 8तैखन मूसे खून नेइतां लोकन पुड़ छ़िड़को, ते तैनी ज़ोवं, “हेरा, ई तैस करारेरो खूने ज़ै यहोवा इना सब वचन्न पुड़ तुसन सेइं साथी कियोरोए#24:8 ई करारेरो तै खूने ज़ै प्रभुए तुसन सेइं अपने सारे वचना केरे ज़िरिये कियोरोए। ।”

9तैखन मूसो, हारून, नादाब, अबीहू, ते इस्राएली केरे 70 बुज़ुर्ग उबरे पहाड़े पुड़ जे। 10ते इस्राएलेरे परमेशरेरू दर्शन कियूं, ते तैसेरे पव्वन हैठ नीलमरे घोड़ेरो ज़ेरो चौक थियो, ज़ैन अम्बरेरू ज़ेरू साफ सुथरु थियूं। 11ते तैनी इस्राएली केरे प्रधान परमेशर हेरने पुड़ नाश न केरे, तैखन खाव ते पीवं।

12तैखन यहोवाए, मूसे सेइं ज़ोवं, “पहाड़े पुड़ मीं कां एई, ते इड़ी बिश, ते अवं तीं घोड़ेरी तेख्ती, ते अपनो लिखोरो कानून देइलो, कि तू तैन शिखालस।” 13तैखन मूसे यहोशू नंव्वेरो अपनो सेवक साथी नेइतां परमेशरेरे पहाड़े पुड़ च़ेढ़ी जेव। 14मूसे पहाड़े पुड़ गाने करां पेइले बुज़ुर्गन सेइं इन ज़ोवं, “ज़ांतगर अस तुसन कां फिरी न एज्जम तांतगर तुस इड़ी असन बलगते रेइयथ; ते शुना, हारून ते हूर तुसन सेइं साथीन, त अगर केन्चेरो मुकदमो भोए त एन कां गेइयथ।”

15तैखन मूसो पहाड़े पुड़ च़ेढ़ी जेव, ते बिदलारां पहाड़ छ़ुपाव। 16तैखन यहोवारी महिमा सीनै पहाड़े पुड़ अई, ते तै बिदलार तैस पुड़ पेई, शा दिहाड़न तगर पेवरी राई; ते सत्तोवं दिहाड़े तैनी मूसे बिदलारी मरां आवाज़ देइतां ज़ोवं। 17ते इस्राएली केरे नज़री मां यहोवारू तेज पहाड़ेरे च़ोटी पुड़ बड़े अग्गरू ज़ेरू लेइहोवं। 18तैखन मूसो बिदलारी मां गेइतां पहाड़े पुड़ च़लो जेव। ते मूसा पहाड़े पुड़ 40 दिहाड़े ते 40 रात राव।

Currently Selected:

निर्गमन 24: BHDNT

Highlight

Copy

Compare