2 कुरिन्थियों 5

इश्शू सुर्गेरू घर

1किजोकि अस ज़ानतम, कि ज़ैखन इश्शो जिसम ज़ै धेरतली पुड़े ते तेम्बेरो ज़ेरोए मेरतां नाश भोल्हो, त असन परमेशरेरी तरफां सुर्गे मां अक भवन मैलनोए, ज़ै हथ्थां केरो बनावरो नईं बल्के हमेशारोए। 2इस मां अस बड़ू कर लातम, ते बड़ी इच्छा केरतम; कि असन एरो जिसम मैल्हे ज़ै सुर्गेरे घरेरो ज़ेरो भोए। 3कि ज़ैखन असन सुर्गेरो जिसम मैल्हे त अस नग्गे न लेइहोम।

4ते अस इस तेम्बेरे ज़ेरे घरे मां रेइतां बोझे सेइं देबोइतां करलाते रातम; किजोकि अस दुनियारो जिसम शारनो न चाम, बल्के इन चातम कि परमेशर असन सुर्गेरो जिसम दे, ताके ज़ै मरने बालो जिसमे तै न मरे बल्के हमेशारे ज़िन्दगी मां बेदलोए। 5ते ज़ैनी अस इस नव्वें जिसमेरे लेई तियार कियोरेम ज़ै असन मैलनोए, तै परमेशरे, ज़ैने असन ज़ेन्च़रे साई देतन तेन्च़रे पवित्र आत्मा भी दित्तोरोए।

6असन सदा पूरू याकीने ते इन ज़ानतम; कि ज़ांतगर अस जिसमे मां रहतम, तांतगर अस प्रभु करां अलग आम ज़ै सुर्गे मांए। 7किजोकि अस शकल हेरतां नईं, पन विश्वासे सेइं ज़ीतम। 8एल्हेरेलेइ अस हिम्मत केरते रहतम, ते जिसमे करां अलग भोइतां ज़ैखन अस मरमेले त प्रभु सेइं साथी रानू जादे रोड़ू समझ़तम।

9एल्हेरेलेइ इश्शे मनेरी उमंग ईए, कि चाए अस सुर्गे मां तैस सेइं साथी रहम, चाए अलग इड़ी धेरती पुड़ रहम पन अस तैस पसंद एइते रहम। 10किजोकि ज़रूरीए, कि इश्शो सेब्भी केरो हाल मसीहेरे आदालतरे तखतेरे सामने खुल्‍ले, कि हर कोन्ची मैन्हु अपने रोड़ां बुरां कम्मां केरो बदलो मैल्हे ज़ैना तैने जिसमे सेइं कियोरन।

मसीह मां नंव्वी सृष्टि

11अस प्रभुएरो डर मेनतां लोकन कां बिनती केरतम कि सच़्च़े पुड़ विश्वास केरन, ते परमेशर रोड़े च़ारे ज़ानते; ते मेरी उमीद ईए, कि तुस भी अपने दिले मां असन रोड़े च़ारे ज़ानथ। 12अस फिरी भी अपनि बडीयाई तुश्शे सामने न केरम, बल्के अस अपने बारे मां तुसन घमण्ड केरनेरो मौको देतम, कि तुस तैन जुवाब देइ बटतथ, ज़ैना मने पुड़ नईं, बल्के दिखवटी गल्‍लन पुड़ घमण्ड केरतन।

13अगर कोई ज़ोते कि अस पागलम, त परमेशरेरे लेई अहम; ते अगर कोई ज़ोते कि अस रोड़े अहम त तुश्शे लेई आम। 14किजोकि मसीहेरो प्यार असन मजबूर केरते; एल्हेरेलेइ कि असन याकीने कि ज़ैखन अक मैन्हु सेब्भी केरे लेई मरो त सब मेरि जे। 15ते मसीह एन्च़रे सेब्भी केरे लेई मरो, कि ज़ैना ज़ींते आन, तैना अग्रोवं जो अपने लेई न ज़ीन पन तैसेरेलेइ ज़ै तैन केरे लेई मरो ते फिरी ज़ींतो भोव।

16एल्हेरेलेइ अज़्ज़ेरां पत्ती अस कोन्ची दुनियारे मुताबिक न समझ़ाम, ते अगर असेईं भी मसीह दुनियारे मुताबिक ज़ानोरो थियो त फिरी भी अज़्ज़ेरे पत्ती फिरी एरू न ज़ानम। 17ते अगर कोई मसीह मां आहे त तै नव्वीं सृष्टि आहे, पुरैनी गल्‍लां बीती जेई; हेरा, तैना सब नेव्वीं भोइजेइ। 18ते सब गल्‍लां परमेशरेरी तरफन, ज़ैने मसीह भेज़तां फिरी इश्शो मेल मलाप एप्पू सेइं कराव, ते लोक तैस सेइं मेल मिलाप केरन ई सेवा परमेशरे असन सौंफोरीए। 19मतलब परमेशरे मसीह मां भोइतां एप्पू सेइं साथी दुनियारो मेल मिलाप कियोरोए, ते लोकां केरे पापां केरो दोष तैन पुड़ नईं लेवरो, ते परमेशरे मेल मिलापेरो बिस्तार असन सौंफोरोए।

20अस मसीहेरे राजदूत अहम; मन्ना कि परमेशर इश्शे ज़िरिये बिनती केरते कि तुस तैसेरो सन्देश कबूल केरथ, अस मसीहेरे तरफां बिनती केरतम, कि परमेशरे सेइं साथी मेल मिलाप केरा। 21मसीह पापे करां अनज़ान थियो, तैए परमेशरे इश्शे लेई पापी ठहराव, कि अस परमेशरेरी नज़री मां धर्मी बनम किजोकि मसीहे इश्शी पापां केरि सज़ाह भुगतोरीए।

Currently Selected:

2 कुरिन्थियों 5: BHDNT

Highlight

Copy

Compare