Popular Bible Verses from 2 कुरिन्थियों 5

Share

ते अगर कोई मसीह मां आहे त तै नव्वीं सृष्टि आहे, पुरैनी गल्‍लां बीती जेई; हेरा, तैना सब नेव्वीं भोइजेइ।

मसीह पापे करां अनज़ान थियो, तैए परमेशरे इश्शे लेई पापी ठहराव, कि अस परमेशरेरी नज़री मां धर्मी बनम किजोकि मसीहे इश्शी पापां केरि सज़ाह भुगतोरीए।

किजोकि अस शकल हेरतां नईं, पन विश्वासे सेइं ज़ीतम।

ते सब गल्‍लां परमेशरेरी तरफन, ज़ैने मसीह भेज़तां फिरी इश्शो मेल मलाप एप्पू सेइं कराव, ते लोक तैस सेइं मेल मिलाप केरन ई सेवा परमेशरे असन सौंफोरीए। मतलब परमेशरे मसीह मां भोइतां एप्पू सेइं साथी दुनियारो मेल मिलाप कियोरोए, ते लोकां केरे पापां केरो दोष तैन पुड़ नईं लेवरो, ते परमेशरे मेल मिलापेरो बिस्तार असन सौंफोरोए।

अस मसीहेरे राजदूत अहम; मन्ना कि परमेशर इश्शे ज़िरिये बिनती केरते कि तुस तैसेरो सन्देश कबूल केरथ, अस मसीहेरे तरफां बिनती केरतम, कि परमेशरे सेइं साथी मेल मिलाप केरा।

ते मसीह एन्च़रे सेब्भी केरे लेई मरो, कि ज़ैना ज़ींते आन, तैना अग्रोवं जो अपने लेई न ज़ीन पन तैसेरेलेइ ज़ै तैन केरे लेई मरो ते फिरी ज़ींतो भोव। एल्हेरेलेइ अज़्ज़ेरां पत्ती अस कोन्ची दुनियारे मुताबिक न समझ़ाम, ते अगर असेईं भी मसीह दुनियारे मुताबिक ज़ानोरो थियो त फिरी भी अज़्ज़ेरे पत्ती फिरी एरू न ज़ानम।

किजोकि मसीहेरो प्यार असन मजबूर केरते; एल्हेरेलेइ कि असन याकीने कि ज़ैखन अक मैन्हु सेब्भी केरे लेई मरो त सब मेरि जे।