2 कुरिन्थियों 6
6
1अस ज़ैना परमेशरे सेइं साथी कम केरनेबाले आम ई भी बिनती केरतम, कि परमेशरेरो अनुग्रह ज़ै तुसन पुड़ भोवरोए, ज़ैया न भोने देथ। 2किजोकि परमेशर पवित्रशास्त्रे मां ज़ोते,
“कबूल केरनेरे वक्ते मीं तेरी शुनी,
ते मुक्तरे दिहाड़े मीं तेरी मद्दत की,”
हेरा, हुना तै कबूल केरनेरो वक्ते, हेरा, हुना तै मुक्तरी दिहाड़ीए।
3अस परमेशरे सेइं साथी कम केरनेबाले केन्ची भी गल्ली मां कोई भी मौको न देम, कि इश्शी सेवाई पुड़ कोई दोष लाए। 4पन हर गल्ली सेइं परमेशरेरे सेवकां केरे ज़ेरे अपने रोड़े गुन्न बांदे केरतम, बड़े सबरी सेइं, दुख सेइं, शारे गाने मां, मुशकलन सेइं, 5कोड़े खाने सेइं, कैद भोने सेइं, हैल्लन सेइं मेहनती सेइं, बींझ़े बिशने सेइं, बरत रखने सेइं। 6पवित्रतैई सेइं, ज्ञाने सेइं, सबरी सेइं, दयाई सेइं, पवित्र आत्मा सेइं। 7सच़्च़े प्यारे सेइं, सच़्च़े वचने सेइं, परमेशरेरे शेक्ति सेइं; अस धार्मिकतारे हथियारन इस्तेमाल केरतम, देइने हथ्थे सेइं हमलो केरनेरे लेई ते खिशड़े हथ्थे सेइं अपनो आप बच़ानेरे लेई।
8ते ज़ैखन लोक इश्शी इज़्ज़त केरतन या असन बेइज़्ज़त केरतन, ज़ैखन लोक ज़ोतन अस रोड़ेम या बुरे मैन्हु आम, अस ईमानदारम फिरी भी लोक झूठ ज़ोतम। 9अनज़ाना केरे ज़ेरेम; फिरी भी मुशूरम, मरने बालां केरे ज़ेरेम पन हेरा ज़ींतेम, मार खाने बालां केरे ज़ेरेम, पन जानी सेइं न मैरोम। 10दुख केरनेबालां केरे ज़ेरेम, पन सदा आनन्द केरतम, कंगालम, पन बड़े लोकन आत्मिक धनी केरतम; एरेम कि असन कां किछ भी नईं फिरी भी सब किछ रखतम।
11हे कुरिन्थुस नगरेरे विश्वासी लोकव, असेईं तुसन सेइं खुलतां गल्लां की, अस तुसन सेइं पूरे दिले सेइं प्यार केरतम। 12इश्शे मने मां तुश्शे लेई बड़ी ठारे, पन तुश्शे मन्न मां नईं। 13पन अवं बच्चे सेमझ़तां तुसन सेइं ज़ोताईं, कि तुस भी तैसेरे बदले असन सेइं प्यार केरा।
बुरे लोकन सेइं शामल नईं भोनू
14गैर विश्वासी लोकां केरे सेंगती मां न गाथ, किजोकि धार्मिकता ते अधर्मेरो कुन मेल जोल? या लौ ते आंधरेरो कुन साथ? 15ते मसीहे शैताने सेइं कुन लगाव? या विश्वास केरनेबालेरो विश्वास न केरनेबाले सेइं कुन तालमेल? 16ते परमेशरे मन्दरेरे मां मूरती केरे लेई कोई ठार नईं, किजोकि अस त ज़ींते परमेशरेरां मन्दर अहम; ज़ेन्च़रे परमेशरे पवित्रशास्त्रे ज़ोवं,
“अवं तैन लोकन साथी रेइलो ते तैन मां च़लेलो फिरेलो;
ते अवं तैन केरो परमेशर भोनोईं,
ते तैना मेरे लोक भोल्हे।”
17एल्हेरेलेइ प्रभु पवित्रशास्त्रेरे ज़िरिये ज़ोते,
“विश्वास न केरनेबालन मरां निस्सा
ते अलग राथ;
ते अशुद्ध चीज़न करां दूर राथ;
ते अवं तुसन कबूल केरेलो।
18ते तुश्शो बाजी भोइलो,
ते तुस मेरां मट्ठां ते कुइयां भोल्हां,
इन सर्वशक्तिमान प्रभु परमेशरेरू वचने।”
Currently Selected:
2 कुरिन्थियों 6: BHDNT
Highlight
Copy
Compare
Share
Want to have your highlights saved across all your devices? Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
